1, 2. Shakudya shani shavanalyudya vanu voe?

MINJINI vyoe vinkubamalegwa na vindangenda. Vanu vakalau vanainjila mumaganisha kwomba dyuti kuvabya vanu voe namene na vanji kuligwa. Vajujumunu vankupela kwamwaa washilwele sha kansa na kuvaleka vananshiva.

² Vinu kenga avyo pavyumilila, vanu voe vanalyudya, “mwaa shani?” Na vanu voe vanalyudya mwaa shani mushilambo vindinjipa vinu vyakunyata na mauvilo. Da wako undiwai kulyudya yadavo?

3, 4. (a) Shakudya shani shaudidye Habakuki? (b) Yeova anjang’uile dashi?

³ Mu Ibibiliya tundilipundisha kenga vatumika vakukulupilika vanímudya Nnungu vyakudya kenga avi. Kwampano, nkúlava Habakuki anímudya Yeova doni: ‘Mwaa shani unkungutadya ngwone vinu vyakunyata? Na mwaa shani unkuleka vitandeka vinu vyamakatange? Mwaa shani kunkupagwa kubamola na ukalau pameo pangu? Na mwaa shani kunkwaneka kwanjadyeka kwa magombi na ding’ondo?’—Abakuki 1:3.

⁴ Mu Lyaandiko limwe Abakuki 2:2, 3, tunashomya mwashi Nnungu mwanjang’ulídile Habakuki na vyakulivikila vyake kwaupande wa matatisho alo. Yeova ankuvanagwaledya namene vanu. Ibibiliya inkuvalanga doni: “nae ankumwangaikangila mwenu.” (1 Patulu 5:7) Kwaumwiu, Nnungu hainannagwela akavona vanu vauvauvanga. (Ishaiya 55:8, 9) Ivedoni tuke tulole shakudya ashi: Mwaa shani mushilambo andinjipa mauvilo?

5. Vananangalaledi vadidini vapundisha nyamani akaumilila matatisho? Ibibiliya itupundisha nyamani?

⁵ Myanda vyoe vamwalimo va mmaganisha, mapadili au vananangalaledi vadidini vanapundisha kenga Nnungu ni avatadya vanu vauvauvange. Vanji vatangola doni matatisho uti lavapata vanu landipangigwa na Nnungu hatulula kumanya ni mwaa shani. Vanu voe vatangola kenga ata vadyoko vankupela pakulota kuka ndanama kuwa na Nnungu. Mapundisho alo ni akushang’apa. Yeova haulula kutadya vinu vyakunyata vitandeke. Ibibiliya inkushidoni: ‘Hayululika Nnungu wiu kutenda shinu shakunyata, Wadimongo-uti mwiko haulula kutenda vinu vikalau!’—Jobi 34:10.

6. Mwaa shani vanu voe vankunapa Nnungu kwamwaa wa mauvilo a mushilambo?

⁶ Vanu voe vankunapa Nnungu kwamwaa mauvilo a mushilambo, mwaa vakumbukila kenga Nnungu ni alangalalela shilambo ashi. Kanji mu lishomo lya 3, tundilipundisha kenga Shatwani ni alangalalela shilambo ashi.

7, 8. Mwaa shani mushilambo andinjipa mauvilo?

⁷ Ibibiliya inkushidoni “shilambo uti shivele mwina mwankalau.” (1 Nshuwau 5:19) Nanangalaledi wa shilambo ashi, Shatwani, ni nkalau. Nae “ankuvaduwanga vanu mushilambo uti.” (Maono 12:9) Vanu uti vankunjedya nae. Ndyomana mushilambo uti undinjipa ukalau, ushwang’a na ing’ou.

⁸ Ipali shabaa inji itadya mushilambo ainjipe mauvilo. Wakati Adamu namu Eva patagile vanditwambukisha madambi avo. Kwamwaa wa madambi, kunkutadya munu amuvyange munu mwagwe. Myanda vinji vanu vanalitumbyanga namene na vakumbukila kenga nae ni ave na mana kuvapunda vanumwagwe. Vanagambana  vanalínjidyanga mwing’ondo, na kuvailudyanga vanumwave. (Nkúvalanga 4:1; 8:9) Wakati unji vanu vankuva kwamwaa vankupagwa ‘mumautu akujowa na wakati hukavaikidile.’ (Nkúvalanga 9:11) Pavanapagwa pashinu na wakati hukavaikidile, vyovya na vinu vinji vyakunyata vinkuulula kumilila.

9. Mwaa shani tunkuvanavo wakika kenga Yeova ankuvanavo shabaa yakuleka mauvilo auka mushu?

⁹ Yeova Mwiko haulula kutadya mauvilo atandeke. Hatulula kunnapa kwamwaa wa ding’ondo, ukalau, au vinu vyakunyata. Hanava shinu Nnungu atadya vitandeke vinu vyakunyata, kenga vindangenda, livambwe au shimbunga. Inkuululika kulyudya doni: ‘Ikava kenga Yeova ni wadimongo uti, mwaa shani hankuleka vinu vyakunyata vitandeka?’ Wetu tunkumanya kenga Nnungu ankutunagwaledya namene, na ndyomana nae ankuvanavo shabaa yambone yakuleka mauvilo auka mushu.—1 Nshuwau 4:8.

10. Shatwani amwitile dashi Yeova?

¹⁰ Kuliteka lyaku Edeni, Ndamoni anínduwanga Adamu namu Eva. Shatwani anínkanidyanga Nnungu kuva nanangalaledi wakunyata. Nae anínshang’apila Nnungu kenga andívaleya Adamu namu Eva vinu vyambone. Shatwani ashilota Adamu namu Eva vakubali kenga nae ni nanangalaledi wambone kumpunda Yeova, na hashilota vaodedye malamulo ake Nnungu.—Kutunduvanga 3:2-5; Lola imbande Igwa Shana 27.

11. Ni shakudya shani shatulota kujang’ula?

¹¹ Adamu namu Eva pavalakile kumwigwilila Yeova vandyapukananganavo.  Vanavo vashikumbukila kenga vandivanavo aki yakulilamulila vo vene kutenda shinu shambone au shakunyata. Kanji Yeova ni amanyite shambone na shakunyata pakati petu, napanelo ikamanyike dashi kenga Adamu namu Eva vandikowa?

12, 13. (a) Mwaa shani Yeova avabamwele muwakati wowo Adamu namu Eva? (b) Mwaa shani Yeova andinneka Shatwani na vanu kuvika dishilikali dyave?

¹² Yeova havabamwele Adamu namu Eva wakati wowo wavatandile lidambi. Yeova andívaulila vavenavo vana. Yeova andivapa litala vana vamwe Adamu namu Eva lyakulota kuntandola nyani avaikidile kuva nanangalaledi wavo. Yeova ashilota shilambo uti shumbaligwe na vanu vakwaloka na vambone, avyo vikandítandeka ata ikava kenga Shatwani ankwita.—Kutunduvanga 1:28; Ishaiya 55:10, 11.

¹³ Shatwani animpinga Yeova pakati padimilioni dya vanjelo. (Jobi 38:7; Daniyele 7:10) Yeova animupa Shatwani wakati padyoko wakulangalela pakulota avenavo wakika kenga kushitaki kwake hakuvé mana. Namomo andivapa vanu litala lyakuvanavo dishilikali dyave vo vene, pakati pautawala umwe Shatwani pakulota kulola kenga vanaulula kulangalela kwabila lipwashalelo lya Nnungu.

14. Kulangalela kumwe Shatwani kunkulilodya nyamani muwakati wa nelo?

¹⁴ Kwa myaka vyoe vipitile, vanu vandilingangila kulilangalalela vo vene kanji vandyuka natatakela. Shinu ashi shindililodya ngala kenga Shatwani nshwang’a. Vanu vankulateka vapate lipwashalelo lya Nnungu. Nkúlava Yelemiya andítangola shana aashidoni: ‘Mwiu ndimanya, Yeova, dindila dya munu hadinava shinu dyake. Hainaululika shinu munu kulilangalalela jo mwene.’—Yelemiya 10:23.

15, 16. (a) Mwaa shani Yeova ankuleka mauvilo auka mushu? (b) Mwaa shani Yeova hanava kumalidya matatisho laumilidile kwamwaa umwe Shatwani?

¹⁵ Mwaa shani Yeova ankuleka mauvilo auka mushu? Mwaa shani anamalidya shinu vinu vyakunyata, vitandeka? Yeova ankuleka wakati woe pakulota alodye kenga Shatwani haulula shinu kulangalalela. Vanu vandilingangila kula inamuna ya ishilikali kanji haipali ishilikali yavapatangila mana. Ata ikava kenga vankuvanavo umanyimanyi kwaupande wa shiyensha, kanji mauvilo ankuka mushu anjadyeka kenga ungave shaliya, ukalau na ding’ondo kupunda kala. Vanu havaulula kulilangalalela vo vene kwabila Nnungu.

¹⁶ Ata ikava davo, Yeova hanava kumalidya matatisho laumilidile kwamwaa umwe Shatwani. Kuleka amalididye ikandiva kenga Nnungu ankungila nkono utawala umwe Shatwani, na mwiko haulula kutenda davo. Vanu uti vakandyamini kenga vankuulula kulilangalalela vo vene, bila Nnungu. Yeova haulula kungila nkono shinu kenga asho. Nae hanashang’apa.—Vabalaniya 6:18.

17, 18. Yeova alota kumalidya dashi mauvilo latenda Shatwani?

¹⁷ Da Yeova ankuulula kumalidya matatisho uti latandile Shatwani na vanu? Elo. Mwaa kwaupande wa Nnungu vinu uti vinkululika. Yeova ankumanya wakati shani walota kunjang’ula Shatwani kwa mauvilo uti latandile kwavanu. Yeova anatadya shilambo shujile kuva ipalaishu kenga momo mwashilotela. Vanu uti vavéle ‘muvyonga vya makumbukililo’ vandadyuka. (Nshuwau 5:28, 29) Hapagwa alota kuva nwele ata kupela. Matatisho uti latandile Shatwani landamalilika. Yeova anantumila Yesu pakulota “abamalangile-uti vitendo vimwe Ndamoni.” (1 Nshuwau 3:8) Tunkunambwalela namene Yeova pakuva mpole, mwaa anditupa litala lyakummanya na kwamuwa  kuntandola nae kuva nanangalaledi wetu. (Shomya 2 Patulu 3:9, 10.) Ata muwakati watuvauvanga, ankutupwashela pakulota tuke mushu tulipililila.—Nshuwau 4:23; Shomya 1 Vakolintu 10:13.

¹⁸ Yeova hanatukanyalidya shinu pakulota kuva nanangalaledi wetu. Nae andivapa vanu ulu wakutandola. Tunauka nalipundisha mwashi mwakutumilila ulu awo.

19. Yeova atupele nyamani? Mwaa shani wetu indituvaikila tunnambwalele?

¹⁹ Ulu wakutandola watupele Yeova unkututadya tuvilinganange na vanyama. Vanyama havanamanya shinu nyamani shavatenda, mwaa havavé mang’amung’amu kanji wetu tunkuulula kwamuwa mwashi mwakunamila na ikava kenga tunantumikila Yeova au mene. (Mikong’o 30:24) Wetu hatunava shinu kenga makina lanalangalalegwa na munu. Wetu tunkuvanavo ulu wakutandola umbodi, mwashi mwakunamila na nyamani shakutenda pakati pashinamilo shetu. Yeova ankulota tupuwangile shinamilo shetu.

20, 21. Ikuvaikidile uvenavo wamushi shani ambi?

²⁰ Yeova alota wetu tunnagwaledye. (Mateu 22:37, 38) Nae ni kenga tatamunu anapuwangila akamwigwa mwanagwe amwaulila doni “Ninkukunagwaledya” kuma muntima mwangu i kwa kungukanyalidya. Yeova anditupa ulu wakutandola kuntumikila au mene. Shatwani, Adamu, namu Eva vanditandola mene kuntumikila Yeova. Kushi wako ulota kutumila dashi ulu wako wakutandola?

²¹ Tandola kuntumikila Yeova. Vanu vakuwika dimilioni vanditandola kuntumikila Nnungu na kumwita Shatwani. (Mikong’o 27:11) Ikuvaikidile utende nyamani ambi pakulota winjile shilambo shaambi shíkalota kupagwa mauvilo? Mu lishomo lyaatika linajag’ula shakudya ashi.