1. Nyani alota kutupundisha indila iu yakulipudidya kwake Nnungu?

DIDINI dyoe dinkuvanavo wakika kenga vankupundisha umwiu kwaupande wa Nnungu. Kanji hainava shinu davo, mwaa shavapundisha shinkuvilingananga na malotelo a Nnungu na mwashi muvaikidile tulipudye. Tulota kuulula dashi kumanya indila yambone yakulipudidya kwake Nnungu? Yeova gweka ni auulula kutupundisha mwashi mwakulota kulipudidya.

2. Ulota kumanya dashi indila yambone yakulipudidya kwake Nnungu?

² Yeova anditupa Ibibiliya pakulota tulipundishe indila shani yambone yakulipudidya kwake. Ivedoni lipundishe Ibibiliya, ukatenda davo Yeova anakupwashela wako kwigwa shana mapundisho ake mwaa nae ankukunagwaledya.—Ishaiya 48:17.

3. Nnungu alota tutende nyamani?

³ Vanu vanji vatangola kenga Nnungu ankulota didini uti, kanji Yesu hapundishidye davo. Nae atedoni: “I uti avalá vangwaulíla ‘Umu, Umu,’ vandainjila muutawala wakuwa, ila aijá átandedya malotelo ake Atata.” Ni shinu shambone namene kulipundisha malotelo a Nnungu na kutandedya. Ashi ni shalinganienge Yesu kwa avalá vakálota kumwigwilila Nnungu, vanavo vankulinganana na vakalau, “vatandedya ungave-lilamulo.”—Mateu 7:21-23.

4. Yesu atangwele nyamani ikava kenga ulota kutenda umbodi na Nnungu?

⁴ Yesu andítangola kenga tukalota kutenda umbodi na  Nnungu, ivaikidile tushumbe vyakunanopa. Nae andítangola doni: “Injilila pannango udikidiki, mwaa indila na nnango uvaúkanavo vanu kukubamalegwa ùkumene, vainjilíla amo vavelé voe; Pakuva nnango wo, ùdikidiki na indila yo, ìdikidiki yúka kushingumi, vaanaléla nnango awo vavé padyoko.” (Mateu 7:13, 14) Indila idikidiki, ai ni indila ivaikidile kulipudidya kwa Nnungu, yanavo ni yúka kushingumi shíkamalilika. Ibalabala ikumene ni indila ikavaikidile kulipudidya kwa Nnungu, yanavo ni yúka kukubamolegwa. Kanji Yeova, hanalota shinu munu woewoe abamolegwe. Ndyomana ankumupa kula munu litala, pakulota alipundishe kwaupande wake.—2 Patulu 3:9.

5. Tulota kuvamanya dashi vakulipudya vaiu vake Nnungu?

⁵ Yesu andítangola kenga wetu tunkuulula kuvamanya vakulipudya vaiu vake Nnungu. Tunkuulula kuvamanya kwa matendo lavo. Nae andítangola doni: “Vanavo mundavamanya kwadindila dyavyepo vyave.” Na akanjedya aashidoni: “Kula nnandi wakukonda upa vyepo vyambone, napane úkakondile upa vyepo vyakunyalanyalanga.” (Mateu 7:16, 17) Ashi shitupundisha kenga avalá valipudya kwake Nnungu, havanava shinu vanu vakwaloka. Ata ikava davo vatumika vake Nnungu vanalikanyalidya ngwengwe kutenda vinu vyalota nae. Ambi tunauka nalola vinu shani vyavanatenda vakulipudya vaiu vake Nnungu.

6, 7. a) Mwaa shani vakulipudya vaiu vake Nnungu vanaodedya Ibibiliya? b) Mpano umwe Yesu utupundisha nyamani?

⁶ Kulipudya kwavo vaodedya vya mu Ibibiliya. Ibibiliya inkushidoni: ‘Maandiko uti andipumuliligwa namu Nnungu na ankupai kupundishidya, kudumila, kulingulila na kupundishidya mwishaliya kwambangidya munu wa Nnungu ave wakuulula, wavampanganienge shana kwashimadengo uti shambone.’ (2 Timoti 3:16, 17) Myombe Paulu  andívaandikila Vaklistu doni: “Pamupwashaladile lilove lya Nnungu kwaupande wetu, mundipwashalela i kenga lilove lyavanu kanji kenga mwalivalalele mwiu lilove lya Nnungu.” (1 Vateshalonika 2:13) Kulipudya kwiu kuvaikidile kwigwanie na lilove lya Nnungu Ibibiliya. Vanavo havanapundisha ding’anong’ano dyavo vo vene, diyadi au madyavalelo loeloe.

⁷ Vinu uti vyashipundísha Yesu ashumya nkati mu lilove lya Nnungu. (Shomya Nshuwau 17:17.) Kula wakati Yesu ashinatambula Maandiko. (Mateu 4:4, 7, 10) Vakulipudya vaiu vake Nnungu vanaoda mpano umwe Yesu na kula shinu shavapundisha vaumya mu Ibibiliya.

8. Yesu atupundíshidye nyamani kwaupande wakulipudya kwake Yeova?

⁸ Valipudya kwake Yeova bai. Dimu 83:18 pankushidoni: ‘Kenga wako lina lyako ni Yeova, gweka wako ni uvé kushanya kwa shilambo uti.’ Yesu ashilota vanu vammanye Nnungu wiu, ndyomana andívapundisha lina lya Nnungu. (Shomya Nshuwau 17:6.) Yesu andítangola doni: ‘Kuka apa Shatwani mwaa indyandikigwa doni, ‘Lipudye kumwe Yeova Nnungu wako na untumikile jojo bai.’ (Mateu 4:10) Ivedoni, wetu kenga tuvatumika vake Nnungu, tunkwoda mipano vyake Yesu. Wetu tunalipudya kwake Yeova gweka, tunatumila lina lyake na tunavapundisha vanu vanji lina lya Nnungu na avilá vyambone vyalota kutenda kwaupande wetu.

9, 10. Tulota kulodya dashi kenga tunkuvanagwaledya vanumwetu?

⁹ Vandavanavo linagwaledyo na vanumwave. Yesu andívapundisha vakwoda vake vanagwaledyanie. (Shomya Nshuwau 13:35.) Havanajali lyutu shani lyaleke, likola shani, ntajili au mmashikini. Linagwaledyo ni livapa lyunganilo lyakuva likola kenga munu na numbugwe. (Vakoloshu 3:14) Ndyomana vanavo havanalinjidyanga mwing’ondo pakulota  kubyana na vanumwave. Ibibiliya inkushidoni: “Amu ni mwavaliladyedya vanavake Nnungu na vanavake Ndamoni: Woewoe ákatandedya vyaishaliya hanava shinu wake Nnungu na ata aijá ákannagwaledya nung’unumunu, momo.” Na kavili kushidoni: “Ituvaikidile tunagwaladyanie; hatunave kenga Kaimu, munu umwe nkalau ámpadidye nung’une.”—1 Nshuwau 3:10-12; 4:20, 21.

¹⁰ Vanatumila wakati, dimongo na mali lavo pakulota kupwashalana na kupana ntima shii. (Vabalaniya 10:24, 25) ‘Vanavatandela vanu uti wambone.’—Vagalata 6:10.

11. Mwaa shani ni shinu shikumene kwamini kenga Yesu ni indila ilangalalela kwa Nnungu?

¹¹ Vanamwigwilila Yesu mwaa nae ni indila ilangalalela kwa Nnungu. Ibibiliya inkushidoni: “Hakunapagwa shinu kwambolegwa kwaindila yamunu junji mwaa mushilambo shapai, halipali lina linji lyajawile Nnungu kuvapa vanu kulota livaambole.” (Vitendo 4:12) Mu lishomo lya 5, tundilipundisha kenga Yeova aníntumidya Yesu aide ajaule shingumi shake shive lyambolelo kwa avalá vamwigwilila. (Mateu 20:28) Yeova anintandola Yesu ave Nanangalaledi na atawale shilambo shapai. Ndyomana Ibibiliya inkutwaulila kenga tukalota kupata shingumi shíkamalilika ituvaikidile tumwigwilile Yesu.—Shomya Nshuwau 3:36.

12. Mwaa shani vaklistu vaiu havanalinjidyanga nkati mushiyasha?

¹² Havanalinjidyanga nkati mushiyasha. Yesu hashilinjidyanga nkati mushiyasha. Muwakati washukumígwa, anímwaulila Pilatu, nanangalaledi wakuloma doni: “Utawala wangu haunava shinu washilambo ashi.” (Shomya Nshuwau 18:36.) Kenga momo mwashitandela Yesu, vaklistu vaiu yadavo vanakulupila Utawala wa Nnungu, ndyomana havanalinjidyanga nkati mushiyasha. Namomo Ibibiliya inkushidoni: “Kula munu alivike mwina mwavamadalaka avalá vatawála,” [au ishilikali]. (Valoma 13:1) Vanavo vanaigwilila malamulo a shilambo shavanama. Kanji, malamulo  a mushilambo lakanaigwania na malamulo a Nnungu, vanajedya mpano wa vamyombe vatangwéle doni: “Ivaikidile tumwigwilile Nnungu kuliko kuvaigwilila vanu.”—Vitendo 5:29; Malukushi 12:17.

13. Vaklistu vaiu vandadya ntenga shani kwaupande wa Utawala?

¹³ Vanamini kenga Ishilikali ya Nnungu ni ilota kuulula kumalidya matatisho a mushilambo. Yesu andítangola kenga “ntenga wambone wautawala” undavalangangigwa mushilambo uti. (Shomya Mateu 24:14.) Haipali ishilikali yavanu ilota kuulula kutenda vinu vilota kutandeka na Utawala wa Nnungu. (Dimu 146:3) Yesu andipundisha tujugwe Utawala wa Nnungu kwaindila yakushwali patangwele doni: “Utawala wako wide. Malotelo ako atandeke, mushilambo shapai kenga kuwa.” (Mateu 6:10) Ibibiliya inkutwaulila kenga Utawala wa Nnungu undabamola dishilikali uti dyavanu, na ‘wanavo gweka unapagwa mumaduva uti.’—Daniyele 2:44.

14. Vanu shani vaunavamini kenga vankulipudya kwake Nnungu Kwaindila iu?

¹⁴ Baada yakulipundisha vinu avi, inkuululika kulyudya doni: ‘Ni vanyani vaodedya mapundisho a mu Ibililiya? Vanu shani vanapundisha lina lya Nnungu? Da vanyani vavenavo linagwaledyo liu na vamini kenga Nnungu ni antumididye Yesu pakulota atwambole? Vanu shani vakanalinjidyanga nkati mushiyasha? Na vanu shani vanandadya ntenga vavalanga kenga Utawala wa Nnungu ni ulota kumalidya mauvilo a vanu?’ Ni mashaidi va Yeova gweka bai.—Ishaiya 43:10-12.

15. Ikuvaikidile utende nyamani ikava kenga ulota Nnungu akubali kulipudya kwako?

¹⁵ Hainatosha shinu bai, kwamini kenga Nnungu apali. Mwaa ata Vandamoni vakwamini kenga Nnungu apali, kanji avatamwa kumwigwilila. (Tiyagu 2:19) Ikava  kenga unkulota Nnungu akubali kulipudya kwako, hainatosha shinu kwamini vila kenga Nnungu apali, ivaikidile utende malotelo ake.

16. Mwaa shani indituvaikila twite didini dyakushang’apa?

¹⁶ Pakulota Nnungu akubali kulipudya kwetu, ituvaikidile twite na tulyumadyange mudidini dyakushang’apa. Nkúlava Ishaiya andyaandika doni: ‘lyumadyange pakati pave, ava mmakutakata.’ (Ishaiya 52:11; 2 Vakolintu 6:17) Wetu ituvaikidile twite kula shinu shivele nkati mukulipudya kwakushang’apa.

17, 18. a) “Babiloni Nkumene” ni nyamani? b) Mwaa shani ni shambone kuma shipajelo?

¹⁷ Didini dyakushang’apa ni dyakwashi? Ni didini uti dipundisha kulipudya kwake Nnungu kuvilingananga na ashilá shipundisha Ibibiliya lilove lya Nnungu. Mu Ibibiliya didini uti dyakushang’apa ishema kuva “Babiloni Nkumene.” (Maono 17:5) Mwaa wa nyamani? Mwaa baada ya Livambwe mumaduva amwe Noe, mapundisho oe a didini dyakushang’apa atunduvangidile kunjini ukumene wa ku Babiloni. Na mapundisho alo akushang’apa andyandavala mushilambo uti. Kwampano, vanu va ku Babiloni vashilipudya kwa vannungu vatatu. Nelo didini dyoe dinkupundisha kenga vankupagwa vannungu vatatu, kanji Ibibiliya ipundisha kenga Nnungu avele jumo bai Yeova, na Yesu ni Mwanagwe. (Nshuwau 17:3) Vanu va ku Babiloni vashipundisha kenga munu akapela shingumi shake au imumu yake inauka mushu inama na inkuulula kuvauvanga kumoto wakushena. Lipundisho ali ni lyakushang’apa.—Lola imbande Igwa Shana 14, 17, na 18.

¹⁸ Nnungu anditangola kenga wakati padyoko didini dyakushang’apa uti dindabamolegwa. (Maono 18:8) Da wako wona dashi kuma shipajelo idini yakushang’apa? Yeova Nnungu alota wako utende davo ukanava kuwika wakati.—Maono 18:4.

19. Yeova alota kutenda nyamani ukatandola kuntumikila nae?

 ¹⁹ Ukatandola kulipudya kwake Yeova na kuleka idini yakushang’apa, vambodi vako au valikola lyako inkuululika mene kulota wamushi wako. Ata ikava davo, Yeova hakuleka shinu gweka. Wako unalyunganianga mulikola likumene lyavanu voe livenavo linagwaledyo liu na yadavo undavanavo lilindililo lyakupata shingumi shíkamalilika mushilambo shaambi. (Malukushi 10:28-30) Badae inkuululika avalá vambodi na valikola vakashilota wamushi wako wakuntumikila Yeova vankuulula kulota kulipundisha Ibibiliya.

20. Mwaa shani ni shambone kulipudya kwake Nnungu kwa indila iu?

²⁰ Wakati wakuvandika, Nnungu andavabamola vanu vakalau na Utawala wake undangalalela shilambo uti. (2 Patulu 3:9, 13) Awo ulota kuva wakati wambone namene! Vanu uti vandalipudya kwake Yeova kulingana na malotelo ake. Ivedoni ni shambone namene wako kwamuwa kulipudya kwake Nnungu kwodana na malotelo ake.