1. Nyani atupele shingumi?

YEOVA ni ‘Nnungu wa shingumi.’ (Yelemiya 10:10) Nae ni atuumbile na atupele shingumi. Ibibiliya inkushidoni: “Wako undyumba vinu uti na kwalilotelo lyako vindikandyangigwa na vipali.” (Maono 4:11) Ndyomana, Yeova alota tuname. Shingumi ni shawadi yatupele Nnungu.—Shomya Dimu 36:9.

2. Ituvaikidile tutende nyamani pakulota tuvenavo lipuwilo mushinamilo shetu?

² Yeova ánkutupa shakulya na medi pakulota tuname shana. (Vitendo 17:28) Kanji nae alota wetu tupuwange. (Vitendo 14:15-17) Pakulota tuname mulipuwilo ituvakidile tumwigwilile Nnungu.—Ishaiya 48:17, 18.

3. Yeova antandile nyamani Kaimu pammyee nung’une?

³ Ibibiliya inkuvalanga kenga, Yeova ankutumbyanga namene shingumi shavanu uti. Kwampano, Kaimu mwanagwe Adamu namu Eva avena shitundi na nung’une Abeli, Yeova akamwaulila Kaimu kenga lilaledye na shitundi shako. Kanji Kaimu halotile kumwigwilila na akashimwa namene kutwala “kumwinjila nung’une kumyaa.” (Kutunduvanga 4:3-8) Yeova anímupa shaushanga Kaimu kwamwaa wakumyaa Abeli. (Kutunduvanga 4:9-11) Munu akaleka shitundi na ing’ou vikulumuka muntima, ankuulula kutenda vinu vyaukalau. Vanu vakalau havapata shinu shingumi shíkamalilika. (Shomya 1 Nshuwau 3:15.) Yeova alota tunnagwaledye na tuvanagwaledye vanu vanji.—1 Nshuwau 3:11, 12.

4. Malamulo laumidye Nnungu kuvapa vanaishilaeli atupundisha nyamani nkati mushingumi?

⁴ Myaka vyoe kunyuma, Yeova andílodya kenga ankwishimu shingumi wakati wampele Musha malamulo  kumi. Lilamulo limo lishitangola doni: ‘Haunabyae.’ (Kumbukumbu 5:17) Ikava kenga munu animyaa muje namadi, nanae momo ishinammaikila apele.

5. Nnungu avenavo maoni shani kwa kutingulanga shitumbo?

⁵ Nnungu avenavo maoni shani kwaing’ano yakutingulanga shitumbo? Yeova ankuvalangilila mpaka shingumi shamwana akanava kuvalekwa. Kwa malamulo lavápele vanaishilaeli, Yeova andívaulila kenga munu woewoe alota kungang’ola nkongwe washitumbo na akavalekwa mwana wakupela liduva likanava kuwika, munu ajo momo ibidi apele. (Shomya Kuma 21:22, 23; Dimu 127:3.) Shinu ashi shitupundisha kenga kutingulanga shitumbo ni shinu shakukaweka.—Lola imbande Igwa Shana 28.

6, 7. Tulota kulilodya dashi kumwe Yeova kenga tunkutumbyanga shingumi?

⁶ Tulota kulilodya dashi kenga tunkuvanavo maoni akulingana namu amwe Yeova kwaupande washingumi shetu na shavanu vanji? Hatunatende shinu shoeshoe shilota kwidanavo shijoidyo pashingumi shetu na shavanu vanji. Indituvaikila hatunamute olya, au kutumila mitela vyakwambalisha mwaa vinu avi vinkuulula kutuvenga na kutubyaa.

⁷ Nnungu ni atupele shingumi na mili wetu, nadoni inkutuvaikila tuname kulingana na mwalatela mwene. Ndyomana, nae alota tushunge shana mili wetu. Tukanatenda davo, tundanyata pameo pa Nnungu. (Valoma 6:19; 12:1; 2 Vakolintu 7:1) Tukanatumbyanga shingumi shetu, Yeova haigwilila shinu kushwali kwetu. Ikava kenga hatunaulula shinu kuleka madyavalelo akunyata, tukalikanyalidya, Yeova anatupwashela pakulota tuleke madyavalelo alo, mwaa tunkutumbyanga shingumi.

8. Ituvaikidile tutende nyamani pakulota tushililidye shingumi shetu na shavanu vanji?

 ⁸ Tundilipundisha kenga shingumi ni shawadi ikumene. Yeova ankuvanavo wakika kenga tunkuulula kushunga shingumi shetu na shavanu vanji. Namomo, inkutuvaikila tutukushe ligali, imota na vyombo vinji vyakuwanela kwa kulilaledya. Hatunajele mishajo vyashijoidyo. (Dimu 11:5) Nayadavo, inkutuvaikila tudenge shana ing’ande yetu. Yeova andívalamulila vanaishilaeli doni: ‘Ukadenga ing’ande yaambi, indikuvaikila uvike lishililidyo pashanya ulungu pakulota haunavenavo makosha amyadi paing’ande yako mwaa munu ankuulula kugwa kugwilila pai.’—Kumbukumbu 22:8.

9. Ituvaikidile tuvatanane dashi vanyama?

⁹ Yeova yadavo ankulota tutanane shana shingumi shavanyama uti. Nae anditulamulila tuvabyae vanyama pakulota tuvamamene, kutwala ligogwe lyake tutende dinguvo, na tuvabyae pakulota tushililidye shingumi shetu. (Kutunduvanga 3:21; 9:3; Kuma 21:28) Ata ikava davo, haituvaikidile kuvauvyanga au kuvabyaa pakulota kuvapikitila.

10. Tunkumanya dashi kenga myadi ni shingumi?

¹⁰ Myadi ni shinu shanashwe pameo pake Yeova mwaa ni shingumi. Baada ya Kaimu kummyaa Abeli, Yeova andimwaulila doni: “Myadi vyanung’uno vyaujaile muulongo, nangu ndyona na vinkungulamadikila.” (Kutunduvanga 4:10) Myadi vimwe Abeli ni shingumi shake, na Yeova animupa shaushanga Kaimu kwamwaa wakumyaa nung’une Abeli. Baada yalivambwe mumaduva amwe Noe, Yeova andívalodya kavili kenga myadi ni shingumi. Yeova anímanyiya Noe pamo na likola lyake kenga vanyama uti vankuulula kuvamamena. Nae atedoni: “Vanyama uti vawanawanánga ninkumupa muvamamene. Kenga  momo mwanimpalalele vyakulya vinji, nelo apa ninkumupa uti.” Kanji, Yeova andívaulila shinu shimo: “Hamunamamene inyama pamo na myadi vyake mwaa shingumi shivelé mmyadi.”—Kutunduvanga 1:29; 9:3, 4.

11. Yeova avapele malamulo shani vanaishilaeli kwaupande wamyadi?

¹¹ Myaka 800 baada yakumwaulila Noe analye myadi, nae andívalamulila kavili venentete vake aashidoni: ‘Munu woewoe pakati pavanaishilaeli au njeni akapagwa pakati penu akannumbata na akankamula nnyama au shuni pakulota ammamene, inimmaikila anshinde myadi aimbile pai.’ Na akatangola kavili aashidoni: ‘Amunalye myadi.’ (Valawi 17:13, 14) Yeova áshilota venentete vake vamanye kenga myadi ni shinu shanashwe. Andívalamulila vamamene inyama kanji myadi mene. Muwakati wavashishinda inyama myadi indívavaikila vaimbile pai.

12. Vaklistu vavele na maoni shani kwaupande wa myadi?

¹² Myaka padiki baada yakupela Yesu, vamyombe na vanang’olo vashipinga au likola lya vaklistu vaku Yelusalemu vandimang’ananga pakulota kwamuwa imbande shani ya malamulo ishilateka vanaishilaeli vauke mushu vaodedya kwaupande washinamilo sha vaklistu. (Shomya Vitendo 15:28, 29; 21:25.) Yeova andívapwashela pakulota vapate kumanya kenga myadi ni shinu shikumene, na indívavaikila vaishimu. Vaklistu vakala havashilya na havashikumbila myadi vya nnyama wakuwa. Mwaa kukumbila myadi na kumamena inyama yakuwa ni shinu shakukaweka, kenga momo kulipudya kumashinamu au kulavalava. Kutunduvangila wakati wowo kuka mushu, vaklistu vaiu havanalya na havanakumbila myadi. Kushi nelo? Yeova alota twishimu myadi mwaa ni shinu shikumene.

13. Mwaa shani vaklistu vanaita kutaja myadi mumili?

 ¹³ Da vaklistu, indivavaikila vaite kutaja myadi mumili? Elo. Mwaa Yeova anditangola kenga, hatunalye na atunakumbile myadi. Kwampano, ikava kenga madiku andikwaulila haunakumbile ugwalwa, da wako unkuulula kutwala ugwala kulitalalela mumili mwako? Mene! Mwaa kutaja myadi mumili au kulitalalela, kunkulingana na kulya myadi.—Lola imbande Igwa Shana 29.

14, 15. Mwaa shani ni shambone vaklistu vatumbyange shingumi na vamwigwilile Yeova?

¹⁴ Ikava kenga madiku anditangola doni: tukaita kutaja myadi tunapela, tutandele mwashi? Kula munu inimmaikila amuwe jo mwene ikava kenga anaodedya malamulo a Nnungu kwaupande wa myadi au mene. Vaklistu vanaishimu namene shingumi mwaa ni shawadi yambone ya kwalakela kwa Nnungu, ndyomana wetu tunalambela inamuna inji yakulota kupona, bila kutumila myadi.

¹⁵ Wetu tunatenda shoeshoe pakulota shingumi shetu shive shambone kuliko kutaja myadi mumili, mwaa shingumi ni shinu shikumene kwake Nnungu. Napanelo, ni shambone kutandedya malamulo amwe Yeova kuliko kulyambola tuvene. Yesu atedoni: “Woewoe álota aposhe shingumi shake andakatoka na woewoe álota akatoke shingumi shake kwamwaa wangu nangu, andaposha.” (Mateu 16:25) Tunalota kumwigwilila Yeova mwaa tunkunnagwaledya. Yeova ni amanyite shambone kwetu na anamupa dinudyo aijá amwigwilila, napavedoni, wetu tunkwona shingumi kuva shinu shikumene na shanashwe kenga momo mwaonela Yeova.—Vabalaniya 11:6.

16. Mwaa shani avalá vantumikila Nnungu vankwishimu malamulo ake?

¹⁶ Avalá vantumikila Nnungu vankwishimu malamulo kwaupande wa myadi. Vanavo havanalya na havanakumbila myadi, na havanakubali kutumila myadi pakulota  kulilaulila. * Nayadavo, vanavo vanakubali valambele inamuna inji pakulota vapone vakava valwele. Mwaa vankuvanavo wakika kenga aijá aumbile shingumi na myadi ankumanya nyamani shambone kwave. Da wako unkwamini kenga Nnungu ankumanya wambone kwako wako?

17. Inamuna shani yakubalídye Yeova pakulota vanaishilaeli vatumile myadi?

¹⁷ Lilamulo lya Nnungu lyampele Musha, Yeova andívaulila vanaishilaeli doni: ‘Shingumi sha nnyama shiva mu myadi, ndyomana nangu nindimupa alutali pakulota mwenu mútenda ligwanilo [au pakulota mujugwe kulivalivigwa kwa madambi enu] mwaa myadi ni shingumi.’ (Valawi 17:11) Muwakati vanaishilaeli vakatenda madambi vanavo vashinanjugwa Yeova avalivalive madambi lavo vaumya shadaka sha nnyama vanjugwa nkúlangalalela-shadaka pakulota ashululidye myadi padiki palutali. Ai ni inamuna imo yakubalídye Yeova pakulota vanaishilaeli vatumile myadi.

18. Kupitila shadaka shimwe Yesu, Yeova ankutupa litala shani?

¹⁸ Yesu paidile mushilambo shapai, andibadili lilamulo lyakunshinda nnyama kuntandela shadaka, kwa kujaula shingumi shake au myadi kuva lyambolelo lya madambi etu. (Mateu 20:28; Vabalaniya 10:1) Shingumi shimwe Yesu shivele na paida ikumene namene ndyomana baada yakupela, Yeova aníndyuwa Yesu pakulota kujila kuwa, Yeova andavapa vanu vamwigwilila litala lyakupata shingumi shíkamalilika.—Nshuwau 3:16; Vabalaniya 9:11, 12; 1 Patulu 1:18, 19.

19. Ivaikidile tutende nyamani pakulota “hatunavenavo likosha lya myadi kwavanu”?

 ¹⁹ Tunkunambwalela Yeova kwamwaa wakutupa shawadi ya shingumi. Tunálota kuvaulila vanu kenga vakankulupila Yesu, vankuulula kunama mushingumi shíkamalilika. Wetu tunkuvanagwaledya vanu, ndyomana tunkulikanyalidya kuvapundisha mwashi mwakupatila shingumi. (Shakiyele 3:17-21) Mwaa, tukavamanyia tunava kenga myombe Paulu átangwele doni: “Nangu hanguve likosha kwamyadi vyenu, mwaa ndivalanganga panikapiyapiyanga malotelo uti a Nnungu.” (Vitendo 20:26, 27) Mwiu, wetu tunalilodya kenga tunkwishimu shingumi kwa kuvavalangangila vanu kenga shingumi ni shinu shikumene kwaupande wake Yeova.