LISHOMO 8
Utawala wa Nnungu ni nyamani?
1. Kushwali shani kumanyikene kwatulota kumanya?
VANU voe vankumanya kushwali kushamegwa Atata wetu au Umu wetu. Yesu andítumila kushwali aku pakulota kuvapundisha vakwoda vake mwashi mwakushwalidya. Nae ashwalidye ajugwa nyamani? Mwaa shani kushwali aku kunkuvanavo mana kwetu?
2. Vinu shani vitatu vyatupundishidye Yesu pakulota tujugwe?
2 Yesu atedoni: “Napenelo amu ni mwakushwalidya mwenu, ‘Atata wetu úvele kuwa, lina lyako lishwalele. Utawala wako wide. Malotelo ako atandeke, mushilambo shapai kenga kuwa.’” (Shomya Mateu 6:9-13.) Mwaa shani Yesu anditupundisha pakulota tujugwe vinu vitatu?—Lola imbande Igwa Shana 20.
3. Ni vyakwashi viloteka tumanye kwaupande wa Utawala wa Nnungu?
3 Wetu tundilipundisha kenga lina lya Nnungu ni Yeova. Nayadavo, tundilipundisha nyamani shalota Nnungu kwaupande wavanu na shilambo. Manaake nyamani Yesu patangwele doni: “Utawala wako wide”? Inkulateka tumanye Utawala wa Nnungu ni Nyamani, na Utawala awo ulota kutenda nyamani na ulota kushwaledya dashi lina lya Nnungu.
UTAWALA WA NNUNGU NI NYAMANI?
4. Utawala wa Nnungu ni nyamani? na Nanangalaledi ni nyani?
4 Yeova andivika ishilikali yake kuwa, na anintandola Yesu pakulota kuva nanangalaledi wa Utawala awo. Ibibiliya inkushema ishilikali ayo kuva Utawala wa Nnungu. Yesu ni ‘Nanangalaledi wavananangalaledi na Umu wavaumu.’ (1 Timoti 6:15) Yesu ankuvanavo dimongo dyakutenda vinu vyambone kwaupande wavanu kumpunda ntawala woewoe wamushilambo shapai.
5. Ishilikali ya Nnungu ilota kutawala kwashi?
5 Yesu andyújila kuwa akapite maduva 40 baada yakudyuka. Andítandalegwa namu Yeova pakulota kuva nanangalaledi wa Utawala awo. (Vitendo 2:33) Ishilikali ya Nnungu ivele kuwa, ni yanavo ilota kutawala mushilambo shapai uti. (Maono 11:15) Ndyomana Ibibiliya inkushema kuva Utawala wa Nnungu mwaa ni “Utawala wa kuwa.”—2 Timoti 4:18.
6, 7. Mwaa shani Yesu ni nanangalaledi wambone kuvapunda vananangalaledi vamushilambo?
6 Ibibiliya inkuvalanga kenga Yesu ni Nanangalaledi wambone kuvapunda vananangalaledi vamushilambo mwaa nae ni “jumo ákapela.” (1 Timoti 6:16) Vananangalaledi vamushilambo vankupela kanji Yesu mwiko hapela. Vinu uti vyambone vyalota kututandela Yesu havimalilika.
7 Vyakulava vya mu Ibibiliya vinkuvalanga kenga Yesu anava Nanangalaledi washididi na waishaliya. Vyakulava avyo vinkushidoni: ‘Imumu yake Yeova indava namu nae, imumu ya limanyilo na ya umanyimanyi, ya midimu na ya dimongo na ya kunjopa Yeova. Nae haukumu shinu kulingana na mwavalalele munu na ata haukumu shinu kwashinu shaigwite vila, nae anavaukumu avalá vakulishapeya kwa ishaliya.’ (Ishaiya 11:2-4) Inkukunagwela kuvanavo nanangalaledi kenga aju?
8. Tunkumanya dashi kenga Yesu hatawala shinu gweka?
8 Nnungu andivatandola vanu vanji pakulota vatawale pamo namu Yesu kuwa. Kwampano, myombe Paulu anímwaulila Timoti doni: “Ikava kenga tunkulipililila, namu nae namomo tundatawala.” (2 Timoti 2:12) Vanu vangapi valota kutawala namu Yesu?
9. a) Vanu vangapi valota kutawala pamo namu Yesu? (b) Yeova atunduvenge duvani kuvatandola?
9 Mu lishomo 7, tundilipundisha kenga myombe Nshuwau anímwona Yesu kwaindila yamaono avele Nanangalaledi pamo na vanu 144.000. Vanu avo 144.000 ni vanyani? Nshuwau andívalanga kenga “lina lya Ngandolo [au Yesu] na lya Tatamunu lindyandikigwa pavyenye vyave.” Na akauka mushu aashidoni: “Vanavo vankumwoda Ngandolo [au Yesu], kwoekwoe kwauka. Vovo vo, vandishumigwa pakati pavanu.” (Shomya Maono 14:1, 4.) Vanu 144.000 ni Vaklistu vakukulupilika vatandalegwe na Nnungu pakulota “vatawale mushilambo” pamo namu Yesu. Vanavo vakapela, vankudyuka pakulota kuka ndanama kuwa. (Maono 5:10) Yeova anditunduvanga kuvatandola Vaklistu vakukulupilika 144.000 tangu wakati wa vamyombe.
10. Tunkumanya dashi kenga vanu 144.000 vavatandwele Yeova vanatumanya shana?
10 Yeova ankutunagwaledya namene wetu, ndyomana andivatandola vanu pakulota vatawale pamo namu Yesu. Yesu andava nanangalaledi wambone mwaa nae ankutumanya shana. Nae ankumanya shinamilo shetu na mauvilo latupata. Paulu anditangola kenga Yesu ankutumanya mwashi mwatunamila, na “ankuulula kutwanangila shididi mukudabadabanga kwetu” na “andyuvauvanga dinamuna uti dyakutubigwa kenga wetu.” (Vabalaniya 4:15; 5:8) Ata avalá 144.000 vankumanya shinamilo shetu. Mwaa vanavo vandipitila mulidambi na vilwele. Napavedoni, tunkuulula kukulupila kenga Yesu pamo na vanu 144.000 vanatumanya shana shinamilo shetu na vanatwangangola.
UTAWALA WA NNUNGU ULOTA KUTENDA NYAMANI?
11. Mwaa shani Yesu andívapundisha vakwoda vake pakulota vashwali vajugwa malotelo a Nnungu atandeke kuwa?
11 Yesu andívapundisha vakwoda vake pakulota vashwali vajugwa malotelo a Nnungu atandeke kuwa. Mwaa wa nyamani? Mu lishomo lya 3 tundilipundisha kenga Shatwani Ndamoni andilivika kuva mmongo wake Yeova. Baada ya apo, Yeova andíkubali kunneka Shatwani anama kuwa muwakati padyoko. Muwakati wowo i vanjelo uti ve vavele kuwa vashinatenda malotelo a Nnungu. Mu lishomo lya 10, tunalipundisha vinu vyoe kwaupande umwe Shatwani na vandamoni vake.
12. Vinu shani vivili vikumene vivalangangigwa mu Maono 12:10?
12 Ibibiliya inkuvalanga kenga baada Yesu yakuva Nanangalaledi wa Utawala wa Nnungu, akanditenda ing’ondo namu Shatwani. (Shomya Maono 12:7-10.) Nshitali wa 10 unkutwaulila vyakumilila vivili vikumene. 1) Utawala wa Nnungu ukanditunduvanga kulangalela baada Yesu Klistu yakuva Nanangalaledi wa Utawala awo. 2) Shatwani vakaníminga kuwa kunjela mushilambo shapai. Kenga tundilipundisha vinu avyo vinditandeka.
13. Shumilidile nyamani baada yakuvingigwa Shatwani kuwa?
13 Ibibiliya inkuvalanga kenga vanjelo vakukulupilika vandívanavo lipuwilo lyoe wakati pavamingenge Shatwani na vandamoni vake kuwa. Tushomya doni: “Kuwa ko puwanga pamo na mwenu múnama ako!” (Maono 12:12) Napanelo kuwa kunkupagwa amani na lyunganilo mwaa vanjelo uti vanama kwanavo vankumwigwilia Nnungu.
Mauvilo mushilambo ankumamodya namene tangu Shatwani na vandamoni vake kuvingigwa kuwa. Kanji mauvilo ala andamalilika muwakati wakuvandika
14. Baada yakuvingigwa Shatwani kuwa, shinamilo mushilambo shinkuva dashi?
14 Kanji shinamilo mushilambo shindivilingananga namene. Vinkutandeka vinu vyoe vyakunyata “mwaa Ndamoni andishuluka” na “andishimwa poe namene, nae andimanya kenga wakati wake wo, ubakidile padyoko.” (Maono 12:12) Shatwani andishimwa namene. Nae andivingigwa kuwa na ankumanya kenga ubakidile wakati padyoko pakulota kubamolegwa. Ndyomana nae ankutenda kula shinu pakulota vanu mushilambo vapate mauvilo.
15. Nnungu alota kutenda nyamani mushilambo?
15 Kanji ata ikava davo, vyakulivikila vyake Nnungu kwaupande washilambo shapai anatandedya. Nae ankulota vanu vakukulupilika vaname myaka víkamalilika mu palaishu. (Dimu 37:29) Utawala wa Nnungu ulota kutandedya dashi vyakulivikila avyo?
16, 17. Vyakulava vyake Daniyele 2:44 vinkutupundisha nyamani kwaupande wa Utawala wa Nnungu?
16 Vyakulava vyake Daniyele 2:44 vinkushidoni: ‘Mumaduva a vaumu avo, Nnungu wakuwa anaidanavo Utawala hukalota kubamolegwa mwiko. Na utawala awo haupitila shinu mmanda mwavenentete vanji. Unabamola na kuvika mwisho wa dishilikali uti, na wanavo gweka tu undapagwa mumaduva uti.’ Vyakulava avyo vinkutupundisha nyamani kwaupande wa Utawala wa Nnungu?
17 Shitandi, vyakulava avyo vinkutupundisha kenga Utawala wa Nnungu ukanditunduvanga kulangalela ‘Mumaduva a vaumu avo.’ Manaake ni dishilikali dinji hadinatawale baada yakutunduvanga Utawala wa Nnungu kulangalalela. Shambili, Vyakulava avyo vinkuvalanga kenga Utawala wa Nnungu unapagwa mumaduva uti na haipali ishilikali inji ilota kudiva lyutu alyo. Shantatu, Utawala wa Nnungu unabamola dishilikali uti dyavanu na wanavo unatawala mushilambo uti. Kumwisho kwake, vanu vanapata ishilikali yambone ivaikidile kuvanavo.
18. Ing’ondo yamwisho pakati pa Utawala wa Nnungu na dishilikali dyavanu vashema dashi?
18 Utawala wa Nnungu ulota kubamola dashi dishilikali dyavanu? Dishilikali dya mushilambo dindalota kutendana ing’ondo na Nnungu. Mwaa wa nyamani? Mwaa vitendo vyavo vandambukishigwa na vandamoni, pakulota kukadyanianga “muliduva likumene lya ing’ondo ya Nnungu Wadimongo-uti.” Ing’ondo ayo vashema Alimagedoni. Kanji dishilikali dyavanu mwiko haditema shinu. Baada ya apo, Utawala wa Nnungu unalangalalela shilambo uti.—Maono 16:14, 16; lola imbande Igwa Shana 10.
19, 20. Mwaa shani tunkulota namene Utawala wa Nnungu ulangalalele mushilambo?
19 Mwaa shani tunkulota namene Utawala wa Nnungu? Dipali dishaliya nnatu. Itandi, kwamwaa wakuva tuvakutega, tunkuula na tunkupela. Kanji, Ibibiliya inkuvalanga kenga Utawala wa Nnungu unkutupa litala lyakupata shingumi shíkamalilika. Lyaandiko limwe Nshuwau 3:16 linkushidoni: ‘Amu ni mwanagwaladidye Nnungu shilambo, ata mpaka nae kumumya mwanagwe àvele jumo jojo pakulota uti vankulupíla nae havanabamolegwe kanji vavenavo shingumi shíkamalilika.’
20 Yambili, mwaa tunkunama na vanu vakalau, vakákulupilika na vavitendo vikavé mana. Wetu hatulula kuvamalidya vanu kenga ava, kanji Nnungu andilivikila kenga andavabamola. Vanu uti vatenda vinu vikalau vandabamolegwa mu ing’ondo ya Alimagedoni. (Shomya Dimu 37:10.) Yantatu, dishilikali dyavanu hadinaulula shinu kumalidya matatisho, vanavo vakalau na havanakulupilika shinu. Ishilikali yambone ishilateka ivapwashele vanu kumwigwilila Nnungu, kanji ishilikali yavanu hainatenda shinu davo. Ndyomana Ibibiliya inkushidoni ‘munu ankuntawala munu mwagwe kwaukalau.—Nkúvalanga 8:9.
21. Utawala wa Nnungu ulota kutenda nyamani?
21 Napenelo, Utawala wa Nnungu ulota kutenda nyamani? Utawala wa Nnungu unatadya malotelo a Nnungu atandeke mushilambo. Kwampano, mu ing’ondo ya Alimagedoni Shatwani na vandamoni vake vandaungwa. (Maono 20:1-3) Kwamwaa wa lyambolelo vanu vamwigwilila Nnungu vandavanavo shingumi shambone na vanapata shingumi shíkamalilika mu Palaishu. (Maono 22:1-3) Utawala awo unatadya lina lya Nnungu lishwalele. Ashi manaake doni, Utawala paulota kulangalalela, vanu uti vanamwishimu Nnungu na kuntumbyanga.—Lola imbande Igwa Shana 21.
YESU ATUNDUVENGE DUVANI KUVA NANANGALALEDI?
22. Tunkumanya dashi kenga Yesu hatunduvenge kuva Nanangalaledi muwakati wavele mushilambo au baada yakudyuka?
22 Yesu andívapundisha vakwoda vake pakulota vashwali doni: “Utawala wako wide.” Shinu ashi shinkulodya ngala kenga Utawala awo ukanditunduvanga kulangalela badae. Shitandi, Yeova akandivika ishilikali yake kuwa na kummika Yesu pakulota ave Nanangalaledi. Napanelo, Yesu atunduvangidinneu kuva Nanangalaledi baada yakujila kuwa? Mene, nae andílindila. Wakati padyoko baada Yesu yakudyuka, Myombe Patulu namu Paulu vandívalanganga vyakulava vishimwamba Yesu kupitila mu Dimu 110:1. Vyakulava avyo, Yeova anímwaulila Yesu doni: “Ikala kunkanakono kwangu, mpaka nangu ndivatende kuva lyutu lyakuluvatila.” (Vitendo 2:32-35; Vabalaniya 10:12, 13) Yeova akamikile duvani Yesu kuva Nanangalaledi?
Utawala wa Nnungu unatadya malotelo a Nnungu atandeke mushilambo shapai
23. (a) Yesu atunduvenge duvani kuva Nanangalaledi wa Utawala wa Nnungu? (b) Tulota kulipundisha nyamani mu lishomo lyaatika?
23 Myaka vyoe vipitile kunyuma, shipinga sha Vaklistu vakukulupilika vandímanya kenga mwaka wa 1914 vindatandeka vyakulava vya mu Ibibiliya. Kwa vitendo vitandeka mushilambo tangu mwaka 1914, vinkulodya ngala kenga vanavo vandívanavo ishaliya. Yesu andítunduvanga kutawala mwaka wowo. (Dimu 110:2) Baada ya kutunduvanga Yesu kutawala, aníminganga Shatwani kuwa kunjela mushilambo shapai na nae “andimanya kenga wakati wake wo ubakidile padyoko.” (Maono 12:12) Mu lishomo lyaatika, tunauka namanya kenga tunkunama wakati wowo wavenavo Shatwani. Nayadavo, tunalipundisha kenga muwakati padyoko Utawala wa Nnungu unatadya malotelo a Nnungu atandeke mushilambo shapai.—Lola imbande Igwa Shana 22.
