Nnungu ankuvalalika vanu vakuvilingananga pakulota vatangole namu nae kupitila mukushwali. (Dimu 65:2) Kanji, nae hanaigwilila kushwali kwa vanu uti. Kwa mpano, Nnungu hanaigwilila kushwali kwa nnume anamuvyanga ndyagwe. (1 Patulu 3:7) Na yadavo, Vanaishilaeli pavashuka mushu vatenda vinu vyaukalau, Nnungu hashigwilila kushwali kwavo. Napanelo, pankwaneka ngala kenga kushwali ni dinema. Kanji, Nnungu anaigwilila kushwali kwa vanu vakútega, vakalyambila.—Shomya Ishaiya 1:15; 55:7.

Kushwali ni indilia imo yakulota kulipúdya kwa Nnungu. Napavedoni, indituvaikila tushwali kwake Yeova bai, Namalunda wetu. (Mateu 4:10; 6:9) Na yadavo, kwadananga mwaa wakuva tuvakutega, indituvaikila tushwali kupitila lina limwe Yesu, mwaa nae andipela kwa mwaa wa mabadambi letu. (Nshuwau 14:6) Yeova hanalota kushwali kwakujidya-ujidya au pavandike pa shinu. Nae alota tushwali kwakwaloka muntima.—Shomya Mateu 6:7; Vapilipo 4:6, 7.

Nnungu ankulula kuigwa kushwali kwashimaladi. (1 Samuwele 1:12, 13) Nae ankuvalalika vanu vashwali wakati woewoe, kenga muwakati wakutakatuka, wakulya, wakulala na patupata matatisho.—Shomya Dimu 55:22; Mateu 15:36.

Kuva mbodi umwe Yeova ni shinu shakukamadyanga pakati pakunama na vanu vakamwigwilila Nnungu, na vakavé likulupililo mu vyalivikidile Nnungu kwa shilambo sha amani.  (2 Timoti 3:1, 4; 2 Patulu 3:3, 13) Napavedoni, inkubidi tupane ntima shii navanung’unumunu.—Shomya Vabalaniya 10:24, 25.

Kukadyanianga na vanu vannagwaledya Nnungu kunkulula kutupwashela kuva tuvambodi va Nnungu. Mikutano vya Mashaidi va Yeova vinkutupatiya litala lya kupana ntima shii mu likulupililo lyavavetu vanji.—Shomya Valoma 1:11, 12.

Wako unkulula kuva mbodi umwe Nnungu kwa kukumbukila avilá vyaulipundishidye mu Lilove lyake. Kumbukila matendo, midimu na vyakulivikila vya Nnungu. Kukumbukila na kushwali kwa vinu avi kunkulula kukupwashela kumanya linagwaledyo na limanyilo lyake Nnungu.—Shomya Yoshuwa 1:8; Dimu 1:1-3.

Unkulula kuva mbodi umwe Nnungu ukavanavo likulupililo kwake. Likulupililo ni kenga nandi ulateka kutajangila medi pakulota ukulumuke. Na momo, likulupililo lyako linananowangika wakati waulota kulipundisha vya Nnungu.—Shomya Mateu 4:4; Vabalaniya 11:1, 6.

Yeova ankuvashunga vanu uti vanagwaledya nae. Nae ankulula kuvashililidya kwa shinu shoeshoe shilota kutadya kutimbanga likulupililo na lilindililo lyavo lyakunama mu shingumi shikamalilika. (Dimu 91:1, 2, 7-10) Nnungu ankutumanyia mu vinu vilota kutimbanga shingumi na lipuwilo lyetu. Nae yadavo ankutupundisha mwashi mwakunamila shana.—Shomya Dimu 73:27, 28; Tiyagu 4:4, 8.