LISHOMO 36
Ava wakukulupilika muvinu uti
Vanu uti vankulota vavenavo mbodi wakukulupilika. Yeova momo ankulota vambodi vake vave vakukulupilika. Kanji kuva wakukulupilika ni shinu shakukamadyanga mushilambo shatunama mwaa vanu voe havanakulupilika shinu. Kanji ata ikava davo mwaa shani ni shambone kuva wakukulupilika?
1. Ishabaa shani ikumene yakuva vakukulupilika?
Tukava tuvakukulupilika kwa vanu vanji tunannodya Yeova kenga tunkunnagwaledya na tunkumwishimu. Kumbukila kenga Yeova ankumanya vinu uti vyatukumbukila na vyatutenda. (Vabalaniya 4:13) Nae ankutwona patwamuwa kuva vakukulupilika, na nae ankupuwangila. Lilove lyake linkushidoni: ‘Yeova anavanyatila vakushang’apa, kanji umbodi wake uve na avalá vakukulupilika.’—Mikong’o 3:32.
2. Tulota kuva dashi tuvakukulupilika kula liduva?
Yeova alota ‘kula munu atangole umwiu kwa muje.’ (Shakaliya 8:16, 17) Asho mana ake nyamani? Asho mana ake hatunatangole ata lilove limo lyakushang’apa kwa valikola vetu, vatukolanavo madengo, vanung’unumunu na valumbumunu Vaklistu, au kwa vamadalaka, hatuvalanga ata dyabali dyatukavenavo wakika. Vanu vakukulupilika havanaiva au havanavakwinyanga vanu vanji. (Shomya Mikong’o 24:28 na Vaepeshu 4:28.) Munu wakukulupilika analipa ukodi uti. (Valoma 13:5-7) Kwa inamuna ai au inji, wetu tunakulupilika muvinu uti.—Vabalaniya 13:18.
3. Mwaa shani ni shambone kuva wakukulupilika?
Tukamanyika kuva vanu vakukulupilika, vanu vanatukulupila. Tukatenda davo tundapwashela shipinga kuva shakukulupilika kenga likola liu. Kuleka davo momo tundavanavo makumbukililo a muntima lambone. Tukava tuvakukulupilika “tundanemya muvinu uti mapundisho ake Nnungu Mwamboli wetu,” na tunavautidya vanu vanji pakulota kulyunganiange namu wetu vaide valipudye kwake Nnungu.—Titu 2:10.
LAMBELA KUMANYA VYOE
Manya mwaa shani kuva wakukulupilika kundakwambukisha wako na umbodi wako namu Yeova, na lipundishe ulota kuulula dashi kuva wakukulupilika muvinu uti mushingumi shako.
4. Kukulupilika kunampuwangidya Yeova
Shomya Dimu 44:21 na Malakiya 3:16, na badae mwambangile mwaa vyakudya vya mwina:
-
Kwa maoni lako, mwaa shani haituvaikidile kukumbukila kenga tunkuulula kushang’apa pamevo pamwe Yeova?
-
Wako wona kenga Yeova ankuligwa dashi tukamuwa kutangola umwiu, ata ikava kenga ni shinu shakukamadyanga kutenda davo?
Vana vakatangola umwiu, vatatamunu vandapuwanga namene. Wetu tukatangola umwiu Yeova andapuwanga namene
5. Ava wakukulupilika muvinu uti
Vanu voe vamini kenga ni shinu shakukamadyanga kuva wakukulupilika muvinu uti. Kanji manya mwaa shani ituvaikidile tuve vakukulupilika muwakati uti. Lola VIDEO.
Shomya Vabalaniya 13:18, na badae mwambangile mwaa tulota kuva dashi tuvakukulupilika . . .
-
palikola.
-
ku madengo au kushikola.
-
na muvinu vinji.
6. Kukulupilika kunkutupa ipaida
Kwaumwiu kuva wakukulupilika wakati unji kunkuulula kwidanavo matatisho. Kanji ashi ni shinu shambone shituvaikidile tutende kula liduva. Shomya Dimu 34:12-16, na badae mwambangile mwaa shakudya sha mwina:
-
Kukulupilika kulota kupwashela dashi shingumi shako kuva shambone?
-
Vatwamunu na vadyamunu vakukulupilika vanananowanga shitamu shavo
-
Vamadengo vakukulupilika vandaminika kwa shepi wavo
-
Venentete vakukulupilika vanaishimika na vakola madengo kushilikali
VANU VANJI VANKUSHIDONI: “Kushang’apa padyoko ni shinu shakawaida.”
-
Mwaa shani unkwamini kenga Yeova ankuvangedya ushwang’a wa kula inamuna?
KWAUNGWIPI
Yeova alota vambodi vake vave vakukulupilika muvinu uti vyavatangola na vyavatenda.
Tukumbukilange
-
Tunkuulula kuva vakukulupilika kwa dindila shani?
-
Mwaa shani haituvaikidile kukumbukila kenga tunkuulula kupiya shinu pamevo pamwe Yeova?
-
Mwaa shani wako unkulota kuva wakukulupilika muvinu uti?
LIPUNDISHE
Vatatamunu valota kuvapwashela dashi vanavavo kuva vakukulupilika?
Tunkupata ipaida shani tukatandedya ashilá shatulivikidile?
Manya mwaa shani ituvaikidile tulipe ukodi ata ikava kenga vankutumila mukunyata.
“Je,—Ni Lazima Ulipe Kodi?” (Mnara wa Mlinzi, Septemba 1, 2011)
Nyamani shintadidye nnume jumo hakashikulupilika kubadili shingumi shake?
“Nilijifunza Kwamba Yeova Ni Mwenye Rehema na Mwenye Kusamehe” (Mnara wa Mlinzi, Mei 1, 2015)
