LISHOMO 50
Likola lyako lilota kupata dashi lipuwilo?—Imbande 2
Vana ni shawadi yaloka kumwe Yeova. Nae avalindila vatatamunu vashunge shana shawadi ai. Yeova ankujaula midimu vyambone pakulota kuvapwashela vatatamunu kutenda davo. Midimu vya Nnungu momo, vinkuvapwashela vana kutenda imbande yavo pakulota likola livenavo lipuwilo.
1. Yeova ankuvapa midimu shani vatatamunu?
Yeova ankulota vatatamunu vavanagwaledye vanavavo na vatumile wakati wambone na vanavo. Nae momo ankuvalindila vatatamunu pakulota vavashililidye vanavavo na vavadume vatumila malamulo ákabadilika la mu Ibibiliya. (Mikong’o 1:8) Nae ankuvaulila vatatamunu aashidoni: ‘Valele mumapundisho na mukuduma . . . kwake Yeova.’ (Shomya Vaepeshu 6:4.) Yeova andavanavo lipuwilo vatatamunu vakaigwilila midimu avi, nae momo andapuwanga vatatamunu vakatandedya madalaka lavavenavo kwabila kunnakela munu junji.
2. Yeova ankuvapa midimu shani vana?
Yeova ankuvaulila vana: “Mmana, vaigwilile vatatavenu.” (Shomya Vakoloshu 3:20.) Vana vakavaigwilila vatatavavo, vanavo vanampuwangidya Yeova namomo vatatamunu vanapuwanga. (Mikong’o 23:22-25) Yesu avale mpano wambone namene pavele mwana. Kanji nae avele wakwaloka, ata ikava davo halakíle kuvaigwilila vatatavake vákavele vakwaloka.—Lukashi 2:51, 52.
3. Likola lilota kuulula dashi kummandika Nnungu?
Wako ukava tatamunu au jujumunu, kwaumwiu unkulota vanavako vannagwaledye Yeova kenga wako umwene. Shilota kuululika dashi shinu asho? Ukatandedya ashilá shivalanga Ibibiliya: ‘Na wako vakamalele [malove lamwe Yeova] vanavako na uvavalangangila wikele pang’ande pako, uwena mbalabala, paulala na pautakatuka.’ (Kumbukumbu 6:7) “Vakamalele” mana ake kuvapundisha ngwengwe. Wako inkuululika unkumanya kenga pakulota kuvapundisha vanavako na vavike mmuti, inkulateka kuvapundisha kula wakati. Pavedoni lyaandiko ali lilota kuvalanga kenga ikuvaikidile ulambele wakati pakulota kuvavalangangila malove lamwe Yeova vanavako. Inamuna yambone ni kumya wakati kula ishumana, pakulota kulipudya kumwe Yeova, kwaindila yakulipudya kwa palikola. Namomo wako úkanavanavo vana ni shinu shambone kulambela wakati pakulota kushomya Ibibiliya kula ishumana.
LAMBELA KUMANYA VYOE
Lambela maoni lalota kukupwashela pakulota likola lyako livenavo lipuwilo na lishililidyo.
4. Vadume vanavako na linagwaledyo
Kuvaduma vana ni shinu shakukamadyanga. Kanji Ibibiliya ilota kukupwashela dashi? Shomya Tiyagu 1:19, 20, na badae mwambangile mwaa vyakudya vya mwina:
-
Vatatamunu valota kulodya dashi linagwaledyo pavatangola na vanavavo?
-
Mwaa shani tatamunu au jujumunu haivaikidile andume mwanagwe muwakati pashimwenge? a
5. Vashililidye vanavako
Pakulota kuvashililidya vanavako, ni shambone wako utangonavo kwaupande wa wendi. Ata úkanaligwa shana muntima pakulota kutenda davo. Lola VIDEO, na badae mwambangile mwaa shakudya sha mwina.
-
Mwaa shani ni shinu shakukamadyanga kwa vatatamunu vanji kutangonavo vana kwaupande wa wendi?
-
Dinamuna shani dinji dyavatangola vatatamunu na vanavavo kwaupande wa wendi?
Kenga mwaivalangila Ibibiliya, shilambo shimwe Ndamoni shinkuka mushu shiva shakunyata. Shomya 2 Timoti 3:1, 13, na badae mwambangile mwaa shakudya sha mwina:
-
Nshitali wa 13 unkuvavalanga vanu vakunyata, na tunkumanya kenga vatee kwinjipa ni vavainjilila vanavetu nkati mu wendi. Pavedoni, mwaa shani ni shinu shikumene vatatamunu, kutangola na vanavavo kwaupande wa wendi na kuvapundisha pakulota kuvashililidya kwa vakalau?
Wako ushindamanya?
Mashaidi va Yeova vankuvanavo mabuku loe lavapwashela vatatamunu pakulota kutangola na vanavavo kwaupande wa wendi na kuvapundisha pakulota kuvashililidya kwa vakalau. Lola mipano vinji:
-
Vashililidye vanavako (video)
-
“Wafundishe Watoto Wako Kuhusu Ngono” (Amkeni! Na. 52016)
6. Vaishimu vatatavako
Vana vanang’olo vanalodya ishima kwa vatatavavo kwa inamuna yavatangola. Lola VIDEO, na badae mwambangile mwaa vyakudya vya mwina.
-
Mwaa shani ni shinu shambone vanemba kulikanyalidya pakulota kwambanga mwaa na vatatavavo?
-
Nnemba alota kuulula dashi kutangola na vatatavake kwaishima?
Shomya Mikong’o 1:8, na badae mwambangile mwaa shakudya sha mwina:
-
Nnemba ivaikidile avenavo maoni shani, vatatavake vakamwaulila shinu shivaikidile nae atende?
7. Lipudye kumwe Yeova palikola
Likola lya Mashaidi va Yeova vanaumya wakati kula ishumana pakulota kushomya Ibibiliya pamo. Shinu asho vashema kulipudya kwa palikola. Kulipudya ako kutandeka dashi? Lola VIDEO, na badae mwambangile mwaa vyakudya vya mwina.
-
Likola lilota kuvanavo dashi mpangililo pakulota kutenda kulipudya kwa palikola?
-
Vatatamunu valota kutenda dashi pakulota kulipudya kwa palikola kuve kwambone na kuvapwashele vana?—Lola ipisha kunantandi lishomo.
-
Kwaupande wako nyamani shikatadidye kukamadyanga kulipudya kwa palikola?
Kala venentete va ku Ishilaeli, Yeova ashilota makola ngwengwe vatangole kwaupande wa maandiko. Shomya Kumbukumbu 6:6, 7, na badae mwambangile mwaa shakudya sha mwina:
-
Wako ulota kuvikila dashi mmitendo lilamulo ali?
Maoni kwaupande wakulipudya kwa palikola:
-
Panganianga mikutano vya pashipinga.
-
Shomya maimyo la mu Ibibiliya badae mwambangile mwaa.
-
Ikava kenga unkuvanavo vana vadikidiki, umya au impilimili mpangililo wa vadyoko mu saiti jw.org.
-
Wako ukavanavo vana vanemba, ambangila mwaa kwaupande wa lishomo lya vanemba mu inteleneti jw.org.
-
Jedya maimyo la mu Ibibiliya na vanavako.
-
Lola video mu inteleneti jw.org na ambangila mwaa kwaupande wa video avyo.
VANU VANJI VANKUSHIDONI: “Ibibiliya ni yakukamadyanga namene kwa vadyoko.”
-
Wako ukate dashi?
KWAUNGWIPI
Yeova alota vatatamunu vavadume vanavavo, vavanagwaledye, na vavashililidye; vana vavaigwilile vatatavavo; na likola uti lilipudye kwake Yeova pamo.
Tukumbukilange
-
Vatatamunu valota kuvaduma dashi vana na kuvashililidya?
-
Vana valota kulodya dashi kenga vankuvaishimu vatatavavo?
-
Mwaa shani ni shambone kutenda kulipudya kwa palikola kula ishumana?
LIPUNDISHE
Mashomo shani lalota kuvapanganianga vanavako pavakulumuka?
“Masomo Sita Muhimu ya Kuwafundisha Watoto” (Amkeni! Na. 22019)
Lola midimu vyamu Ibibiliya kwa avalá vavashunga vatatavavo vakukangapala.
“Biblia Inasema Nini Kuhusu Kutunza Wazazi Waliozeeka?” (Makala iliyo kwenye mtandao)
Nnole nnume jumo ákashimanya mwashi mwakuvakulumuwidya vana, mwaukidile ndava tatamunu wambone.
Lola mwashi tatamunu mwalota kuululila kuvanavo umbodi wakunanopa na mwanagwe.
“Akina Baba Wanawezaje Kuwa na Uhusiamo wa Karibu na Wana Wao?” (Mnara wa Mlinzi, Novemba 1, 2011)
a Kulingana na Ibibiliya, “kuduma” kunkuvika nkati kupundisha, kulangalalela, na kulingula. Kanji hainalodya shinu kenga ivaikidile kuntanana mwana mukunyata au kwa ukatili.—Mikong’o 4:1.
