LISHOMO 55
Pwashela shipinga shako
Mushilambo uti, dimilioni dya vanu vankuntumikila Yeova mu vipinga vyoe. Vanu avo vankutumbyanga midimu vyavapwashalela na vankulota kupwashela shipinga mu dinamuna dyakuvilingananga. Da ni amu mwauligwidya wako kwaupande washipinga shako?
1. Ulota kutumila dashi wakati na dimongo dyako pakulota kupwashela shipinga?
Uti wetu tunkuulula kupwashela shipinga. Kwampano, da wako unkuulula kuvatwala vanang’olo vashilinga au avalá valota lipwashalelo lya kuvaukanavo ku mikutano? Panji unkuulula kuvapwashela mu vinu vinji, kenga kuvashumila vinu au kutenda ulanda pakaja? (Shomya Tiyagu 1:27.) Namomo wetu tunkuulula kuva tayali pakulota kupwashela kutenda ulanda na kutataliyanga Ing’ande ya Utawala. Hapali wavamungila pakulota kutenda vinu avi. Linagwaledyo lyatuvenavo kwake Nnungu na kwa vanung’unumunu vetu ni litupa dimongo pakulota ‘kulijaula kwakulitalela.’—Dimu 110:3.
Mashaidi va Yeova vakubatishwa vankuulula kupwashela vipinga mu dinamuna dinji. Kwampano, vanung’unumunu vankuulula kulikanyalidya pakulota kutumikila kenga ntumika wakupwashela au nang’olo washipinga. Vanung’unumunu pamo na valumbumunu vankuulula kupwashela shimadengo shakwandadya ntenga kwa kuva mapionelu. Mashaidi va Yeova vanji vanaulula kupwashela kudenga mautu lakulipudidya kumwe Yeova. Vanji vanauka ku vipinga vilota lipwashalelo.
2. Tulota kutumila dashi njuluku na mali letu pakulota kupwashela shipinga?
Tunkuulula ‘kumwishimu Yeova na mali letu latuvenavo.’ (Mikong’o 3:9) Kwetu wetu ni ibati ikumene kumya mishango pakulota kupwashela shipinga na shimadengo shakwandadya ntenga shitandeka mushilambo uti. (Shomya 2 Vakolintu 9:7.) Mishango vyetu namomo vinatumika pakulota kupwashela vikaumilila vyovya. Voe vanamuwa “kwapula isemu imo ya shinu” kula ishumana au mwendi pakulota kumya nshango. (Shomya 1 Vakolintu 16:2.) Tunkuulula kutenda shinu ashi mu mashanduku lapagwíte mu ding’ande dya Utawala au mu saiti donate.pr418.com. Inamuna yatutumila mali letu inatupa litala pakulota kulodya linagwaledyo kumwe Yeova.
LAMBELA KUMANYA VYOE
Manya dinamuna dinji dyakupwashela shipinga.
3. Pwashela shipinga na mishango vyako
Yeova namu Yesu, vanannagwaledya munu anaumya mishango na ntima wake uti. Kwampano, Yesu anímwona namwili jumo hakave pashinu muwakati washumya nshango. Shomya Lukashi 21:1-4, na badae mwambangile mwaa vyakudya vya mwina:
-
Tushidoni inkulateka tumye njuluku woe pakulota kumpuwangidya Yeova?
-
Yeova namu Yesu, vankuligwa dashi na mishango vyetu vyatumya na ntima wetu uti?
Pakulota umanye mwashi mwavatumilila mishango, lola VIDEO. Badae mwambangile mwaa shakudya sha mwina.
-
Mishango vinkutumika dashi pakulota kupwashela vipinga mushilambo uti?
4. Tunkuulula kulitalela pakulota kupwashela
Vatumika vamwe Yeova vakala ishinavanagwela namene kutataliyanga mautu lavashitumila pakulota kulipudya kumwe Yeova. Kanji pakulota kutenda shinu asho vishilateka vinu vyoe kuliko njuluku. Shomya 2 Maimyo 34:9-11, na badae mwambangile mwaa shakudya sha mwina:
-
Vanaishilaeli vashipwashela dashi pakulota kutataliyanga ing’ande imwe Yeova au lyutu lyakulipudidya?
Pakulota umanye mwashi Mashaidi va Yeova mwavaodedya mpano wamu Ibibiliya, lola VIDEO. Badae mwambangile mwaa vyakudya vya mwina.
-
Mwaa shani ni shinu shikumene kutataliyanga Ing’ande ya Utawala?
-
Dinamuna shani dyaulota kuulula wako kupwashela?
5. Vanung’unumunu vankuulula kupwashela poe pashipinga
Ibibiliya inkuvapa ntima shii valume Vaklistu pakulota valikanyalidye kupwashela shipinga. Pakulota kwona mpano, lola VIDEO. Badae mwambangile mwaa shakudya sha mwina.
-
Kulingana na video, Pedro atandile nyamani pakulota kupwashela poe shipinga?
Ibibiliya inkuvalanga mavalelo lavaikidile vanung’unumunu vavenavo, pakulota kutumikila kenga vatumika vakupwashela na badae vanang’olo vashipinga. Shomya 1 Timoti 3:1-13, na badae mwambangile mwaa vyakudya vya mwina:
-
Mavalelo shani lavaikidile vanung’unumunu vavenavo, pakulota kutumikila kenga vatumika vakupwashela na badae vanang’olo vashipinga?
-
Mavalelo shani lavaikidile makola lavo lavenavo?—Lola nshitali 4 na 11.
-
Vanung’unumunu vakalikanyalidya pakulota kuvanavo mavalelo ala, shipinga uti shilota kupata ipaida shani?
VANU VANJI VANKUULULA KUDYA: “Da njuluku wavatumila Mashaidi va Yeova pakulota kutenda shimadengo shakwandadya ntenga vapata pashi?”
-
Wako ukajang’wile dashi?
KWAUNGWIPI
Yeova ankutumbyanga namene kulikanyalidya kwetu pakulota kupwashela shipinga tutumila wakati, dimongo, na mali letu.
Tukumbukilange
-
Tulota kutumila dashi wakati na dimongo dyetu pakulota kupwashela shipinga?
-
Tulota kutumila dashi mali letu pakulota kupwashela shipinga?
-
Wako ikunagwadile upwashele shipinga kwa inamuna shani?
LIPUNDISHE
Nnungu havavikidile lilamulo vatumika vake pakulota vaumye lipungu lya kumi.
“Biblia Inasema Nini Kuhusu Kutoa Fungu la Kumi?” (Makala iliyo kwenye mtandao)
Manya mana ake kulikanyalidya pakulota “kuvanavo” madalaka pashipinga.
“Je ‘Unajitahidi Kufikia’ Mapendeleo?” (Mnara wa Mlinzi, Septemba 15, 2014)
Vamanye Mashaidi va Yeova vanji vavenavo ntima shii, valijawile pakulota kutwala mabuku kukanavo kwa vanung’unumunu.
Kuvilingananga na didini dinji, manya mwashi mwatutumilila njuluku wetu wa mishango, pakulota kutenda shimadengo shakwandadya ntenga.
“Kazi ya Mashahidi wa Yehova Inagharimiwaje?” (Makala iliyo kwenye mtandao)
