Ézudu 1:1-22
1 Kes-li é nómi di kes fidju di Israel ki bai ku el* pa Ijitu, kada ómi ku se família:
2 Ruben, Simion, Levi i Judá;
3 Isakar, Zebulon i Benjamin;
4 Dan i Naftali; Gade i Azer.
5 Pa tudu, kes disendenti di Jakó éra 70 algen,* má Juzé dja staba na Ijitu.
6 Dipôs Juzé, tudu se irmons i tudu kel jerason móre.
7 Kes israelita* tevi fidju i es bira txeu. Es kontinua ta omenta i ta bira fórti faxi, pur isu es intxi país.
8 Ku ténpu, parse un rei novu na Ijitu ki ka konxeba Juzé.
9 Nton, el fla se povu: “Nhos odja! Povu di Israel é más txeu i más fórti ki nos.
10 Nu ten ki aji ku es ku spertéza. Sinon, es ta kontinua ta bira txeu, i si kontise un géra, es ta djunta ku nos inimigu, es ta luta kóntra nos i es ta sai di país.”
11 Pur isu, es skodje kapatás* pa poi kes israelita ta faze trabadju forsadu. Asi, es faze kes sidadi di Piton i Ramesés pa sirbi di lugar pa guarda kumida di Faraó.
12 Má, kantu más es ta maltrataba es, más txeu es ta fikaba, i es kontinua ta spadja. Pur isu, kes algen di Ijitu fika ku txeu medu di kes israelita.
13 Nton, es poi kes israelita ta bira skravu i es pô-s ta trabadja duru aforsa.
14 Es poi ses vida ta bira margós, es obriga-s trabadja duru na faze masa di arjila i tijolu i tanbê ta trabadja duru na kanpu. Es maltrata-s i es pô-s ta faze tudu tipu di trabadju di skravu.
15 Dipôs, rei di Ijitu pâpia ku kes partera ki éra ebreu, ki txomaba Sifrá i Puá,
16 i el fla-s: “Óras ki nhos djuda kes mudjer ebreu ten fidju, nhos debe djobe si kel mininu é matxu ô fémia. Si el é matxu nhos debe mata-l, má si el é fémia nhos dexa-l vive.”
17 Má, kes partera tinha grandi ruspetu pa Deus verdaderu i es ka faze kuzê ki rei di Ijitu fla-s. Envês di kel-li, es dexa kes mininu vive.
18 Un ténpu dipôs, rei di Ijitu txoma kes partera i el pergunta-s: “Pamodi ki nhos dexa kes mininu vive?”
19 Kes partera responde Faraó: “Kes mudjer ebreu é ka sima kes mudjer di Ijitu. Es é mudjer fórti i es ta ten fidju antis di partera txiga na es.”
20 Pur isu, Deus trata kes partera dretu, i povu ba ta bira más txeu i más fórti.
21 I dja ki kes partera tinha grandi ruspetu pa Deus verdaderu, dipôs el da-s fidju.
22 Nton, Faraó da tudu se povu kel órdi li: “Nhos bota na riu Nilu tudu kes mininu matxu ki nase di kes ebreu, má nhos dexa kes fémia vive.”
Nótas di rodapé
^ Na ebraiku ta fla: “Jakó”.
^ Na ebraiku ta fla: “kes alma ki sai di koxa di Jakó éra 70 alma”.
^ Na ebraiku ta fla: “fidju di Israel”.
^ Ô: “xéfis di skravu”.
