Ézudu 11:1-10
11 Nton, Jeová fla Muizés: “N ta torna manda más un praga riba di Faraó i riba di Ijitu. Dipôs di kel-li, el ta manda nhos bai nhos kaminhu. Óras ki el manda nhos pa nhos bai nhos kaminhu, el ta bota nhos pa fóra di li.
2 Gósi fla povu ma tudu ómi ku mudjer debe pidi ses vizinhu kuzas di prata i kuzas di oru.”
3 I Jeová poi gentis di Ijitu ta djuda se povu. Tanbê, Muizés bira un algen txeu ruspetadu na téra di Ijitu, na meiu di kes sérvu di Faraó i tanbê na meiu di kel povu.
4 Nton Muizés fla: “É si ki Jeová fla: ‘Pa vólta di meia-noti N ta pasa pa Ijitu,
5 i tudu primeru fidju na téra di Ijitu ta móre, désdi primeru fidju di Faraó ki sta xintadu na se tronu ti primeru fidju di kel skrava ki ta trabadja na muinhu di mô. Tanbê tudu kes primeru fidju di ribanhu ta móre.
6 Na téra di Ijitu interu ta ben ten un txoru altu, ki nunka ka kontiseba antis i nen el ka ta ben kontise otu bês.
7 Má ka ta ten nen un katxor ta ladra na israelitas, nen na ómis i nen na ses ribanhu, asi pa nhos fika ta sabe ma Jeová ta pode distrinsa gentis di Ijitu di israelitas.’
8 I tudu bus sérvu di serteza ta ben na mi, es ta inbaxa nha dianti i es ta fla: ‘Bai, abo ku tudu povu ki sta sigi-u.’ I dipôs di kel-la N ta sai.” Nton, Muizés sai di dianti di Faraó ku txeu raiba.
9 Nton, Jeová fla Muizés: “Faraó ka ta ben obi ku nhos, asi pa N pode poi nhas milagri ta bira txeu na téra di Ijitu.”
10 Muizés i Aron faze tudu kes milagri li dianti di Faraó, má Jeová dexa korason di Faraó bira duru, pur isu el ka dexa israelitas sai di país.
