Ézudu 13:1-22
13 Jeová fla Muizés tanbê:
2 “Santifika* pa mi tudu kes primeru fidju matxu di kes israelita. Kel primeru fidju di un israelita i di un animal ki nase é di meu.”
3 Nton Muizés fla povu: “Nhos lenbra di kel dia li ki nhos sai di Ijitu, kel téra ki nhos éra skravu, pamodi Jeová tra nhos di li ku se grandi puder. Pur isu, ka nhos kume nada ki ten fermentu.
4 Nhos sta ta sai oji, na mês di abibe.*
5 Jeová jura bus gentis grandi ma el ta daba es kel téra di kes kananeu, kes itita, kes amoreu, kes eveu i kes jebuzeu, un téra ki ta da leti ku mel. Óras ki el leba-u pa la, bu ten ki kontinua ta faze kel komemorason na kel mês li.
6 Nhos debe kume pon sen fermentu duránti 7 dia, i na sétimu dia ta ten un fésta pa Jeová.
7 Bu debe kume pon sen fermentu na kes 7 dia. Bu ka debe atxadu ku nada ki ten fermentu i bu ka debe atxadu ku ninhun masa ki ten fermentu na tudu bu tiritóriu.*
8 Na kel dia li bu debe fla bus fidju: ‘É pamodi kuzê ki Jeová faze pa mi kantu N sai di Ijitu.’
9 I kel komemorason ta sirbi di sinal na bu mô i sima un lenbransa na bu tésta,* asi pa kel lei di Jeová sta na bu bóka, pamodi Jeová tra-u di Ijitu ku se grandi puder.
10 Tudu anu bu debe kunpri kel lei li na kel ténpu markadu.
11 “Óras ki Jeová pô-u ta entra na kel téra di kes kananeu, ki el jura ma el ta da-u abo i bus gentis grandi,
12 bu ten ki guarda pa Jeová tudu kes primeru fidju matxu, i tudu kes primeru fidju matxu di kes animal ki bu ranja. Tudu es é di Jeová.
13 Si bu ten un buru ki é primeru fidju, bu ten ki resgata-l. Bu ta faze kel-li óras ki bu sakrifika un ovelha na lugar di kel buru. Si bu ka sakrifika un ovelha, bu debe kebra kel buru piskôs. Tudu kes primeru fidju di bu família ten ki resgatadu.
14 “Si dipôs bu fidju pergunta-u: ‘Kuzê ki kel-li ta siginifika?’ bu debe fla-l: ‘Jeová tra-nu di Ijitu, kel téra ki nos éra skravu, ku se grandi puder.
15 Kantu Faraó nega dexa-nu bai, Jeová mata tudu kes primeru fidju di ómi i di animal ki staba na téra di Ijitu. É pur isu ki N sta ta sakrifika pa Jeová tudu kes primeru fidju matxu di kes animal i N ta paga un resgati pa tudu kes primeru fidju di nhas fidju.’
16 Kel-li debe sirbi sima un sinal na bu mô i sima un faxa na bu tésta, pamodi Jeová tra-nu di Ijitu ku se grandi puder.”
17 Kantu Faraó manda povu pa bai se kaminhu, Deus ka leba-s pa kaminhu di téra di filisteu, enbóra éra más pértu. Pamodi Deus fla: “Talvês óras ki povu infrenta géra, es pode muda di ideia i volta pa Ijitu.”
18 Nton, Deus poi povu ta ba da vólta pa kaminhu di dizértu di mar Brumedju. Má, kantu kes israelita sai di téra di Ijitu, es staba organizadu sima trópa ki sta priparadu pa géra.
19 Muizés tanbê leba kes osu di Juzé, pamodi Juzé poba kes fidju di Israel ta jura: “Di serteza, Deus ta torna djobe pa nhos i nhos ten ki leba nhas osu pa fóra di li.”
20 Es sai di Sukote i es arma ténda na Etan, na undi ki dizértu ta kumesa.
21 Jeová staba ta bai ses frenti, duránti dia na un kuluna di núven pa gia-s na kaminhu i di noti na un kuluna di lumi pa limia-s, asi pa es pode viajaba di dia i di noti.
22 Kel kuluna di núven ka ta afastaba di povu duránti dia nen kel kuluna di lumi duránti noti.
Nótas di rodapé
^ Ô: “Poi apárti”.
^ Na ebraiku ta fla: “na tudu bus limiti”.
^ Na ebraiku ta fla: “entri bus odju”.
