Ézudu 14:1-31
14 Nton Jeová fla Muizés:
2 “Fla kes israelita pa es volta i pa es arma ses ténda na frenti di Pi-Airote, entri Migdol i mar, dianti di Baal-Zefon. Es debe arma ses ténda pértu di mar, na frenti di Baal-Zefon.
3 Nton Faraó ta fla sobri kes israelita: ‘Es sta ta anda atoa na país. Dja es fika serkadu na dizértu.’
4 N ta ben dexa korason di Faraó bira duru. El ta bai nhos tras i N ta ben glorifika nha kabésa através di Faraó i di tudu se trópas. I kes algen di Ijitu di serteza ta ben sabe ma mi é Jeová.” I é kel-li ki kes israelita faze.
5 Dipôs, es fla rei di Ijitu ma povu fuji. Kel óra, Faraó i se sérvus rapende di kuzê ki es faze i es fla: “Pamodi ki nu faze kel-li? Pamodi ki nu liberta kes israelita di skravidon?”
6 Nton, el pripara se karus di géra i el leba se trópas djuntu ku el.
7 El leba 600 di kes midjór karu i tudu kes otu karu di Ijitu, ku trópas na kada un di es.
8 Nton, Jeová dexa korason di Faraó, kel rei di Ijitu, bira duru i el bai tras di israelitas, timenti israelitas staba ta sai di país ku koraji.*
9 Kes algen di Ijitu bai ses tras, i tudu kes kabalu di géra di Faraó, kes ómi montadu na kabalu i se trópas txiga pértu di israelitas timenti es staba kanpadu na bera-mar, djuntu di Pi-Airote, na frenti di Baal-Zefon.
10 Kantu Faraó txiga pértu, kes israelita djobe i es odja ma kes algen di Ijitu staba ta pirsigi-s. Kes israelita fika xeiu di medu i es kumesa ta grita i ta pidi Jeová ajuda.
11 Es fla Muizés: “É pamodi ka ten lugar pa intera-nu na Ijitu ki bu traze-nu li, pa nu ben móre na dizértu? Kuzê ki bu faze-nu? Pamodi ki bu tra-nu di Ijitu?
12 Nu ka fla-u na Ijitu: ‘Dexa-nu en pas, pa nu sirbi kes algen di Ijitu’? Pamodi é midjór nu sirbi kes algen di Ijitu di ki móre na dizértu.”
13 Nton Muizés fla povu: “Ka nhos xinti medu. Nhos aguenta firmi i nhos odja modi ki Jeová ta ben salva nhos oji. Pamodi nunka más nhos ka ta ben odja kes algen di Ijitu ki nhos sta ta odja oji.
14 Jeová ta ben luta pa nhos, i nhos ta ben fika kétu na nhos lugar.”
15 I Jeová fla Muizés: “Pamodi ki bu sta kontinua ta grita ta pidi-m ajuda? Fla kes israelita pa es labanta kanpamentu.
16 I abo, labanta bu pó, stika bu mô riba mar i dividi-l, asi pa kes israelita pasa na meiu di mar na txon séku.
17 I ami, N ta ben dexa korason di kes algen di Ijitu bira duru, i asi es ta entra na mar tras di kes israelita. Nton N ta ben glorifika nha kabésa através di Faraó i di tudu se trópas, di se karus di géra i di kes ómi montadu na kabalu.
18 I kes algen di Ijitu di serteza ta ben sabe ma mi é Jeová óras ki N glorifika nha kabésa através di Faraó, se karus di géra i di kes ómi montadu na kabalu.”
19 Nton, kel anju di Deus verdaderu ki staba ta bai na frenti di povu di Israel afasta i el bai fika ses tras, i kel kuluna di núven ki staba ses frenti bai fika ses tras.
20 Asi, el fika entri kes trópa di Ijitu i povu di Israel. Na un ladu, kel núven ta poba lugar ta fika sukuru. Na kel otu ladu, el ta limiaba di noti. Di kel manera li, un grupu ka txiga pértu di kel otu grupu duránti kel noti interu.
21 Nton, Muizés stika se mô pa riba di mar. I Jeová uza un béntu fórti di lésti duránti kel noti interu pa poi mar ta râkua,* i el poi fundu di mar ta bira txon séku, i kes agu fika divididu.
22 Di kel manera li, kes israelita pasa na txon séku na meiu di mar, timenti kes agu staba sima un paredi grandi na ses direita i na ses skerda.
23 Kes algen di Ijitu pirsigi-s, i tudu kes kabalu di Faraó, se karus di géra i kes ómi montadu na kabalu kumesa ta bai ses tras pa déntu di mar.
24 Duránti madrugada,* di déntu di kel kuluna di lumi i di núven, Jeová djobe pa kes trópa di Ijitu, i el pô-s ku medu i dizorientadu.
25 Es fika ta konduzi kes karu ku difikuldadi pamodi kes róda staba ta sai. Nton, kes algen di Ijitu fla: “Nu fuji di kes israelita, pamodi Jeová sta ta briga pa es kóntra Ijitu.”
26 Nton Jeová fla Muizés: “Stika bu mô riba di mar pa agu pode kai riba di kes algen di Ijitu, riba di ses kabalu di géra i di kes ómi ki sta montadu na es.”
27 Kel óra, Muizés stika se mô riba di mar, i kantu staba ta manxe, mar fika sima el staba antis. Kes trópa di Ijitu tenta skapa di kes agu, má Jeová kaba ku kes algen di Ijitu na meiu di mar.
28 Kes agu volta i es kubri kes karu di géra i tudu kes trópa di Faraó ki staba montadu na kabalu, ki entra na mar tras di kes israelita. Ninhun di es ka skapa.
29 Má, kes israelita anda na txon séku déntu di mar, i kes agu fika sima un paredi grandi na ses direita i na ses skerda.
30 Asi, na kel dia, Jeová salva Israel di mô di kes algen di Ijitu, i Israel odja-s mortu na bera-mar.
31 Israel tanbê odja kel grandi puder* ki Jeová uza kóntra kes algen di Ijitu, i povu kumesa ta ten grandi ruspetu pa Jeová i ta ten fé na Jeová i na se sérvu Muizés.
Nótas di rodapé
^ Na ebraiku ta fla: “ku mô labantadu”.
^ Ô: “rekuá”.
^ Kel-li krê fla di uns 2 óra ti 6 óra di palmanhan.
^ Na ebraiku ta fla: “kel mô grandi”.
