Ézudu 15:1-27
15 Na kel ténpu, Muizés ku kes israelita kanta kel kántiku li pa Jeová:
“N ta kanta pa Jeová pamodi el ganha ku txeu glória.
El bota kabalu ku kel ómi ki staba montadu na el na mar.
2 Jeová* é nha forsa i nha puder, pamodi el bira nha salvason.
Kel-li é nha Deus, i N ta lova-l. Kel Deus di nha pai, i N ta da-l ónra.
3 Jeová é un gereru poderozu. Jeová é se nómi.
4 El bota kes karu di géra di Faraó i se trópas na mar,I kes midjór trópa di sel ba fundu na mar Brumedju.
5 Kes agu brabu kubri-s i es bai pa fundu sima un pédra.
6 Ó Jeová, bu mô direita ten txeu puder.Ó Jeová, bu mô direita pode distrui inimigu.
7 Bo é grandi dimás, ki bu ta poi ta kai kes ki ta labanta kóntra bo.Bu ta manda bu raiba, i el ta kema-s sima padja.
8 Ku folgu di bu narís kes agu labanta.Kes agu fika paradu sima un paredi.Kes agu brabu fika firmi na meiu di mar.
9 Inimigu fla: ‘N ta ben pirsigi-s! N ta alkansa-s!
N ta toma ses rikéza!
N ta toma tudu kel ki N krê! N ta puxa nha spada i N ta ben distrui-s!’
10 Bu sopra ku bu folgu i mar kubri-s.Es bai fundu sima txunbu na kes agu poderozu.
11 Ó Jeová, ki deus ki é sima bo?
Kenha ki ta mostra ma el é kel más santu sima bo?
Abo é Kel ki debe ruspetadu i lovadu ku kántikus, Kel ki ta faze kuzas ki ta poi algen dimiradu.
12 Bu stika bu mô direita i téra inguli-s.
13 Ku bu amor lial, bu gia kel povu ki bu salva.Ku bu forsa, bu ta leba-s pa kel lugar ki bu ta mora ki é santu.
14 Povus ten ki obi i es ta ben treme.
Dór ta ben toma kónta* di kes algen ki ta mora na Filístia.
15 Na kel ténpu, kes xéfi di tribu* di Edon ta ben fika xeiu di medu,Kes governanti poderozu di Moabe ta ben treme.
Tudu kes algen ki ta mora na Kanan ta ben fika dizanimadu.
16 Medu dimás ta ben toma kónta di es.
Pamodi bu brasu ki é poderozu, es ta ben fika sima pédra ki ka ta mexeÓ Jeová, ti ki bu povu pasa,Ti ki povu ki bu forma pasa.
17 Bu ta ben leba-s i planta-s na kel monti di bu eransa,Ó Jeová, kel lugar ki bu pripara pa bu mora,Ó Jeová, un santuáriu ki bu mô poi ta fika firmi.
18 Jeová ta ben reina pa tudu ténpu.
19 Kantu kes kabalu di Faraó, se karus di géra i kes ómi ki staba montadu na kabalu entra na mar,Jeová poi kes agu di mar ta kai pa riba di es,Má povu di Israel anda na txon séku na meiu di mar.”
20 Dipôs, Mirian, kel irman di Aron ki éra profetiza, panha un panderu, i tudu kes mudjer bai se tras ta toka panderu i ta badja.
21 Mirian responde kes ómi ta kanta si:
“Nhos kanta pa Jeová, pamodi el ganha ku txeu glória.
El bota kabalu i kel ki staba montadu na el na mar.”
22 Dipôs, Muizés leba Israel di mar Brumedju, es bai pa dizértu di Sur i es anda duránti três dia na dizértu, má es ka atxa agu.
23 Es txiga na Mara,* má es ka konsigi bebe agu di Mara pamodi el éra margós. Pur isu, el txoma kel lugar di Mara.
24 Nton, povu kumesa ta rasmunga kóntra Muizés. Es fla: “Kuzê ki nu ta bebe?”
25 El inplora Jeová, i Jeová mostra-l un arvi. Kantu Muizés bota kel arvi déntu di agu, kel agu bira dósi.
Deus da-s un lei i el mostra-s ku bazi na kuzê ki el ta julgaba es, i el pô-s na próva la.
26 El fla: “Si bu obi vós di Jeová, bu Deus, ku atenson, bu faze kuzê ki é dretu pa el, bu presta atenson na se mandamentus i bu obi ku tudu se leis, N ka ta manda ninhun di kes duénsa ki N manda pa kes gentis di Ijitu, pamodi ami, Jeová, é kel ki ta kura-u.”
27 Dipôs es txiga na Elin, i la tinha 12 fonti di agu i 70 palmera. Nton, es arma ses kanpamentu la, pértu di agu.
Nótas di rodapé
^ Na ebraiku ta fla: “Jah”. Kel-li é un fórma abreviadu di nómi Jeová.
^ Na ebraiku ta fla: “Dór di ten fidju ta ben toma kónta”.
^ Ô: “kes xéki”.
^ Kel-li krê fla “margós”.
