Ézudu 17:1-16
17 Povu di Israel interu sai di dizértu di Sin. Es viaja di un lugar pa kel otu, sima Jeová mandaba, ti ki es arma kanpamentu na Refidin. Má la ka tinha agu pa povu bebe.
2 Nton, povu kumesa ta diskuti ku Muizés i es fla: “Da-nu agu pa nu bebe.” Má Muizés fla-s: “Pamodi ki nhos sta ta diskuti ku mi? Pamodi ki nhos sta kontinua ta poi Jeová na próva?”
3 Má povu staba ku txeu sedi la, pur isu es kexa kóntra Muizés i es fla: “Pamodi ki bu tra-nu di Ijitu djuntu ku nos fidjus i nos animal pa ben mata-nu di sedi?”
4 Dipôs Muizés inplora Jeová: “Kuzê ki N ta faze ku kel povu li? Di li más un bokadu es ta da-m ku pédra!”
5 Nton, Jeová fla Muizés: “Bai na frenti di povu, i leba alguns ansion di Israel ku bo i tanbê kel pó ki bu da na riu Nilu. Bai ku kel pó na mô.
6 N ta sta bu dianti riba di rótxa, na Orebe. Bu debe da ku pó na rótxa i di el ta sai agu pa povu bebe.” Muizés faze si dianti di ansions di Israel.
7 Nton, el txoma kel lugar di Masá* i Meribá,* pamodi kes israelita diskuti ku Muizés i pamodi es poi Jeová na próva i es fla: “Jeová sta ô el ka sta ku nos?”
8 I kes amalekita bai géra kóntra Israel na Refidin.
9 Nton Muizés fla Juzué: “Skodje alguns ómi i bai géra kóntra kes amalekita. Manhan N ta sta riba di monti, ku kel pó di Deus verdaderu na mô.”
10 Juzué géra kóntra kes amalekita, sima Muizés flaba el. I Muizés, Aron i Ur subi riba di kel monti.
11 Timenti Muizés staba ku se mô pa riba, israelitas ta ganhaba, má óras ki el ta baxaba se mô, amalekitas ta ganhaba.
12 Kantu Muizés fika ku mô pizadu, es panha un pédra es pô-l se baxu, i el xinta na el. Nton, Aron ku Ur pega-l kada un na un mô, asi pa el fikaba ku mô labantadu ti ki sól kanbaba.
13 Asi Juzué ganha géra kóntra Amaleki i se povu, ku spada.
14 Nton, Jeová fla Muizés: “Skrebe kel-li na livru, asi pa lenbradu di el i ripiti-l pa Juzué: ‘N ta ben paga tudu lenbransa di amalekitas ki sta dibaxu di séu.’”
15 Nton Muizés faze un altar i el txoma-l di Jeová-Nisi,*
16 i el fla: “Pamodi se mô é kóntra tronu di Jeová,* Jeová ta ben sta na géra kóntra Amaleki pa tudu jerason.”
Nótas di rodapé
^ Ki krê fla “tésti; próva”.
^ Ki krê fla “diskuson”.
^ Ki krê fla “Jeová é nha sinal”.
^ Na ebraiku ta fla: “Jah”. Jah é un fórma abreviadu di nómi Jeová.
