Ézudu 19:1-25
19 Na tirseru mês dipôs ki kes israelita sai di téra di Ijitu, na kel mésmu dia,* es txiga na dizértu di Sinai.
2 Es sai di Refidin, es txiga na dizértu di Sinai i es arma kanpamentu na dizértu. É la ki Israel arma kanpamentu, na frenti di monti.
3 Nton, Muizés subi pa inkontra ku Deus verdaderu. Jeová txoma-l di monti i el fla-l: “É kel-li ki bu debe fla kaza di Jakó i kes israelita:
4 ‘Nhos odja ku nhos própi odju kuzê ki N faze ku Ijitu, i modi ki N karega nhos riba di aza di ágia i N traze nhos pa mi.
5 Gósi, si nhos obi ku nha vós na tudu kuza i nhos kunpri nha kontratu, di serteza nhos ta bira nha povu* spesial* na meiu di tudu povu, pamodi téra interu é di meu.
6 Nhos ta bira pa mi un reinu di saserdótis i un nason santu.’ É kes palavra li ki bu debe fla kes israelita.”
7 Nton, Muizés manda txoma kes ansion di povu i el fla-s tudu kes kuza ki Jeová manda-l.
8 Dipôs di kel-la, povu interu responde di mésmu manera: “Nu sta dispostu na faze tudu kel ki Jeová fla.” Kel óra, Muizés leba Jeová respósta di povu.
9 I Jeová fla Muizés: “Odja! N ta bai na bo na un núven sukuru, asi pa povu obi óras ki N pâpia ku bo i tanbê pa es ten sénpri fé na bo.” Nton Muizés fla Jeová kuzê ki povu fla.
10 Jeová fla Muizés: “Bai na povu, santifika-s oji i manhan, i es debe laba ses ropa.
11 I na tirseru dia es debe sta prontu, pamodi na tirseru dia Jeová ta dixi riba di monti Sinai na frenti di odju di povu interu.
12 Bu debe poi un limiti pa povu na vólta di monti i fla-s: ‘Nhos toma kuidadu pa nhos ka subi na monti i nen pa nhos ka pasa kel limiti. Ken ki toka na monti di serteza ta móre.
13 Ningen ka debe toka na ken ki faze kel-li, má el debe dadu ku pédra ô ku lansa.* Ka ta inporta si el é un animal ô un ómi, el ka ta fika bibu.’ Má, óras ki tokadu buzina ku txifri di karneru, es pode txiga pértu di monti.”
14 Nton, Muizés dixi di monti ti undi ki povu staba, i el kumesa ta santifika povu, i es laba ses ropa.
15 El fla povu: “Nhos pripara pa tirseru dia. Ka nhos ten relason seksual.”*
16 Na tirseru dia di palmanhan, faze strubada i relánpagu. Un núven pizadu kubri monti i es obi un son txeu altu di buzina. Tudu algen ki staba na kanpamentu kumesa ta treme.
17 Nton, Muizés leba povu pa fóra di kanpamentu pa inkontra ku Deus verdaderu, i es fika na pé di monti.
18 Monti Sinai bota fumu pa tudu ladu, pamodi Jeová dixi riba di el na lumi. Kel fumu staba ta subi sima fumu di un fornadja, i kel monti interu fika ta treme ku forsa.
19 Sima kel son di buzina ba ta fika kada bês más altu, Muizés pâpia i kel Deus verdaderu responde-l.
20 I Jeová dixi riba monti Sinai, na kel párti más altu di monti. Nton Jeová fla Muizés pa el subi la di riba di monti, i Muizés subi.
21 Jeová fla Muizés: “Dixi i aviza povu pa es ka tenta pasa kel limiti pa odja Jeová, sinon txeu di es ta móre.
22 I kes saserdóti ki sénpri ta txiga pértu di Jeová debe santifika, asi pa Jeová ka mata-s.”
23 Nton Muizés fla Jeová: “Povu ka pode subi na monti Sinai pamodi dja bu aviza-nu: ‘Poi limiti na vólta di monti, i bira-l sagradu.’”
24 Má Jeová fla-l: “Bai, dixi i dipôs subi otu bês ku Aron. Má ka bu dexa pa kes saserdóti i povu pasa kel limiti pa subi undi ki Jeová sta, asi pa el ka mata-s.”
25 Nton, Muizés dixi ti undi povu staba i el fla-s kel-li.
Nótas di rodapé
^ Talvês kel-li krê fla na kel mésmu dia ki es dexa Refidin.
^ Na ebraiku ta fla: “propriadadi”.
^ Ô: “ki ten txeu valor”.
^ Talvês dadu ku flexa.
^ Na ebraiku ta fla: “Ka nhos txiga pértu di un mudjer”.
