Ézudu 2:1-25
2 Na kel ténpu, un ómi di família di Levi kaza ku un fidju-fémia di Levi.
2 Kel mudjer fika grávida i el tevi un fidju. Kantu el odja modi ki el éra bunitu, el sukundi-l duránti três mês.
3 Má, kantu el ka staba ta konsigi sukundi-l más, el panha un sestu* di papiru i el fora-l ku alkatron.* Dipôs, el poi kel mininu na el i el poi kel sestu na meiu di kes planta* ki ta fikaba na bera di riu Nilu.
4 Má, se irman fika di lonji pa el odja kuzê ki ta kontiseba ku el.
5 Kantu fidju-fémia di Faraó dixi pa ba toma banhu na riu Nilu, se sérvas staba ta anda na bera di Nilu. Nton, el odja un sestu na meiu di kes planta. I kel óra el manda se skrava pa ba panha-l.
6 Kantu el abri kel sestu, el odja un mininu i kel mininu staba ta txora. El xinti péna di el, má el fla: “Kel-li é un mininu di kes ebreu.”
7 Nton, irman di kel mininu fla fidju-fémia di Faraó: “Nha krê pa N ba txoma un mudjer ebreu pa da nha es mininu mama?”
8 Fidju-fémia di Faraó fla-l: “Bai!” Kel minina bai lógu i el txoma mai di kel mininu.
9 Fidju-fémia di Faraó fla-l: “Leba kel mininu li ku bo, da-m el mama i N ta paga-u.” Nton, kel mudjer leba kel mininu i el fika ta da-l mama.
10 Kantu kel mininu kria, el leba-l pa fidju-fémia di Faraó, i el bira sima un fidju pa el. Fidju-fémia di Faraó pô-l nómi di Muizés* i el fla: “É pamodi N tra-l di agu.”
11 Kantu Muizés bira grandi,* el bai ti se irmons pa el odja kel karga pizadu ki es ta lebaba, i el odja un ómi di Ijitu ta sota un di se irmons ebreu.
12 Nton, el djobe pa un ladu i pa kel otu, i kantu el ka odja ningen, el mata kel ómi di Ijitu i el sukundi-l na areia.
13 Má, kel otu dia kantu el sai, el odja dôs ebreu ta briga ku kunpanheru. Nton, el fla kel ki ka tinha razon: “Pamodi ki bu sta sota bu irmon?”
14 Nton el fla: “Ken ki pô-u nos prínsipi i nos juís? Bu krê mata-m sima bu mata kel ómi di Ijitu?” Muizés fika ku medu i el fla: “Di serteza dja es sabe kuzê ki N faze!”
15 Dipôs, Faraó fika ta sabe di kel-li i el tenta mata Muizés. Má Muizés fuji di Faraó i el bai mora na téra di Midian. La, el xinta bera di un posu.
16 Kel saserdóti di Midian tinha 7 fidju-fémia, i es bai tra agu pa intxi bebedoru pa ribanhu di ses pai bebe.
17 Má sima éra di kustumu, kes pastor bai i es kóre ku es di la. Nton, Muizés labanta i el djuda* kes mudjer, i el da ses ribanhu agu.
18 Kantu es bai pa kaza, Reuel,* ses pai, pergunta-s dimiradu: “Pamodi ki oji nhos ben pa kaza faxi si?”
19 Es responde-l: “Un ómi di Ijitu difende-nu di kes pastor, i ti el tra agu pa nos i el da ribanhu agu.”
20 El fla se fidjus-fémia: “Má undi ki el sta? Pamodi ki nhos dexa kel ómi la? Nhos txoma-l, asi pa el pode ben kume ku nos.”
21 Dipôs di kel-li, Muizés seta mora ku kel ómi i el da Muizés se fidju-fémia, Zípura, pa ser se mudjer.
22 Ku ténpu, Zípura tevi un fidju i Muizés txoma-l di Jérson,* pamodi el fla: “N bira ta mora sima stranjeru na un téra stranjeru.”
23 Dipôs di txeu ténpu,* kel rei di Ijitu móre. Má kes israelita kontinua ta jeme i ta kexa pamodi skravidon, i ses pididu di ajuda kontinua ta subi pa Deus verdaderu.
24 Deus obi-s ta jeme i el lenbra di kontratu ki el fazeba ku Abraon, Izaki i Jakó.
25 Nton, Deus volta se atenson pa kes israelita i el odja ses sufrimentu.
Nótas di rodapé
^ Ô: “arka; kaxa”.
^ Ô: “betumi i pixi”. Pixi é un kuza sima alkatron.
^ Ô: “kana”. Djobe Disionáriu di Bíblia.
^ Ki krê fla “tradu”. Kel-li krê fla salvadu di agu.
^ Ô: “bira fórti”.
^ Ô: “difende”.
^ Kel-li krê fla Jetru.
^ Ki krê fla “kel ki ta mora sima stranjeru la”.
^ Na ebraiku ta fla: “dia”.
