Ézudu 23:1-33
23 “Bu ka debe spadja* un notísia falsu. Ka bu djunta ku un algen mau pa da un tistimunhu ku mau intenson.
2 Bu ka debe sigi un monti di algen pa faze kel ki é mariadu i nen bu ka debe da un tistimunhu ki ta bai kóntra justisa, sô pa apoia un monti di algen.
3 Bu ka debe faze diferénsa na un prubléma ki ta involve un algen póbri.
4 “Si boi ô buru di bu inimigu perde i bu atxa-l, bu debe da se dónu el.
5 Si bu odja ma buru di un algen ki ta odia-u dja kai baxu di se karga, bu ka debe bai bu kaminhu sen djuda-l. Bu debe djuda kel algen tra kel animal di la.
6 “Bu ka debe faze kuzas ki ta straga justisa óras ki un póbri ki ta vive na bu meiu ta julgadu.
7 “Ka bu involve na un akuzason falsu i ka bu mata un algen inosenti ô un algen justu, pamodi N ka ta fla ken ki faze kuzas mariadu ma el é justu.*
8 “Bu ka debe seta subornu, pamodi subornu ta sega kes algen ki ten sabedoria i el pode muda palavra di kes algen justu.
9 “Bu ka debe maltrata un stranjeru ki ta mora djuntu ku nhos. Nhos sabe kuzê ki é ser stranjeru,* pamodi nhos éra stranjeru kantu nhos ta moraba na téra di Ijitu.
10 “Símia bu txon duránti 6 anu i kodje kuzê ki el da.
11 Má, na sétimu anu bu ka debe trabadja txon, má dexa-l diskansa. Asi kes ki é póbri na bu povu ta kume kel ki téra da, i kel ki es dexa, kes animal brabu ta kume. É kel-li ki bu debe faze ku bu plantason di uva i ku bu plantason di olivera.
12 “Bu debe trabadja 6 dia. Má na sétimu dia, bu ka debe faze ninhun trabadju, asi pa bu boi i bu buru diskansa i fidju di bu skrava i kel stranjeru ki ta mora djuntu ku nhos ganha forsa otu bês.
13 “Nhos debe ten serteza ma nhos ta faze tudu kel ki N fla. Nhos ka debe fla nómi di otus deus. Ses nómi ka debe sai di nhos bóka.
14 “Três bês pa anu bu ten ki faze un fésta pa mi.
15 Bu ta faze kel Fésta di Pon sen Fermentu. Duránti 7 dia bu ta kume pon sen fermentu, sima N manda-u, i na ténpu markadu, na mês di abibe,* pamodi foi na kel mês la ki bu sai di Ijitu. Ningen ka debe parse nha dianti ku mô baziu.
16 Tanbê bu ta faze Fésta di Kodjéta.* Bu ta faze kel fésta li óras ki bu ta kodje kes primeru frutu maduru di kel ki bu símia na bu txon. Dipôs, na fin di anu bu ta faze Fésta di Baraka,* óras ki bu ta panha di bu txon kes rezultadu di bu trabadju.
17 Três bês pa anu tudu ómi ten ki bai adora Jeová, kel Sinhor verdaderu.
18 “Bu ka debe oferese sangi di nha sakrifisiu djuntu ku un kuza ki ten fermentu. I bu ka debe guarda ti kel otu dia di palmanhan kel gordura di kes sakrifisiu ki bu oferese na kes fésta ki bu faze pa mi.
19 “Bu debe leba pa kaza di Jeová, bu Deus, kel midjór párti di kes primeru kodjéta di bu txon.
“Bu ka debe kuzinha kabritu na leti di se mai.
20 “N ta ben manda un anju na bu frenti pa proteje-u na kaminhu i pa pô-u ta entra na kel lugar ki N pripara.
21 Presta atenson na el i obi ku se vós. Ka bu rabela kóntra el pamodi el ka ta ba púrdua nhos pekadu, dja ki nha nómi sta na el.
22 Má, si bu obi ku tudu kel ki el fla-u i bu faze tudu kel ki N fla, N ta bira inimigu di bus inimigu i N ta bira kóntra kes ki é kóntra bo.
23 Pamodi nha anju ta bai bu frenti i el ta leba-u pa undi ki sta kes amoreu, kes itita, kes perizeu, kes kananeu, kes eveu i kes jebuzeu, i N ta kaba ku es.
24 Bu ka debe inbaxa dianti di kes deus di kes nason i nen ka bu dexa pa es konvense-u pa bu sirbi kes deus, i tanbê bu ka debe faze kes kuza ki es ta faze. Má, bu debe distrui kes deus i kebra ses pilar sagradu.
25 Nhos debe sirbi Jeová, nhos Deus, i N ta abênsua nhos ku kumida* i agu. N ta tra kes duénsa di nhos meiu.
26 Kes mudjer grávida na bu téra ka ta perde fidju i nen es ka ta fika sen ten fidju, i N ta da-u un vida kunpridu.
27 “Mésmu antis di bu txiga, es ta xinti medu di mi. N ta poi tudu povu ki bu infrenta baradjadu, i N ta poi tudu bus inimigu ta fuji di bo.
28 Antis di bu txiga N ta poi bus inimigu ta xinti dizanimadu,* i N ta ben tra kes eveu, kes kananeu i kes itita di bu dianti.
29 N ka ta ben tra-s di bu dianti sô na un anu, asi pa téra ka fika bandonadu i kes animal brabu ka bira txeu i ataka-u.
30 Poku-poku, N ta tra-s di bu dianti, ti ki bu bira txeu i bu toma kónta di téra.
31 “N ta ben poi frontera di bu país ta bai di mar Brumedju ti mar di kes filisteu i di dizértu ti riu Eufratis.* Pamodi N ta ben da-u na bu mô kes algen ki ta mora na kel téra, i bu ta ben tra-s di bu dianti.
32 Bu ka debe faze ninhun kontratu ku es i nen ku ses deus.
33 Es ka debe mora na bu téra, asi pa es ka pô-u ta peka kóntra mi. Si bu sirbi ses deus, kel-li di serteza ta ser un armadilha pa bo.”
Nótas di rodapé
^ Na ebraiku ta fla: “labanta”.
^ Ô: “N ka ta dexa di kastiga kel ki é mau”.
^ Ô: “Nhos konxe vida (alma) di un stranjeru”.
^ Tanbê konxedu pa Fésta di Simana, ô Pentikósti.
^ Tanbê konxedu pa Fésta di Ténda.
^ Ô: “pon”.
^ Ô talvês: “txeu medu”.
^ Na ebraiku ta fla: “Riu”.
