Ézudu 25:1-40
25 Nton, Jeová fla Muizés:
2 “Fla povu di Israel pa es traze un kontribuison pa mi. Nhos seta kel kontribuison pa mi di kalker algen ki krê oferese di korason.
3 Kel-li é kel kontribuison ki nhos debe seta: oru, prata, kóbri,
4 linha azul, lan roxu,* fiu brumedju,* linhu finu, kabélu di kabra,
5 péli di karneru tinjidu di brumedju, péli di fóka, madera di akásia,
6 azeti pa kes lánpida, bálsamu* pa faze óliu sagradu i pa kel insénsu purfumadu,
7 kes pédra di óniks i kes otu pédra pa poi na éfodi* i na kel bólsa ki ta fika na petu di saserdóti prinsipal.
8 Es ta faze un santuáriu pa mi i N ta mora na ses meiu.
9 Pa nhos faze tabernáklu i tudu ses mobília i otus kuza ki ten na el, nhos ten ki faze tudu sima kel modelu* ki N ta ben mostra nhos.
10 “Es ten ki faze un arka* di madera di akásia, di un métru i 10 sentímetru di kunprimentu, 67 sentímetru di largura i 67 sentímetru di altura.*
11 Dipôs bu ta kubri-l ku oru puru pa déntu i pa fóra, i bu ta faze-l un moldura* di oru na se vólta.
12 Bu ta faze kuatu argóla di oru fundidu i bu ta pô-s riba di kes kuatu pé: dôs argóla di un ladu i dôs argóla di kel otu ladu.
13 Bu ta faze kes vara di madera di akásia i bu ta kubri-s di oru.
14 Bu ta pasa kes vara na kes argóla na ladu di Arka, asi pa es pode karega Arka ku es.
15 Kes vara ta fika na kes argóla di Arka. Es ka debe tradu di el.
16 Bu ta poi déntu di Arka kel Tistimunhu* ki N ta ben da-u.
17 “Bu ta faze un tanpa di oru puru, di un métru i 10 sentímetru di kunprimentu i 67 sentímetru di largura.*
18 Bu ten ki faze dôs kerubin di oru. Bu ta faze-s di oru trabadjadu ku martélu i bu ta pô-s na kes dôs pónta di tanpa.
19 Faze kes kerubin i pô-s na kes dôs pónta, un kerubin na kada pónta di tanpa.
20 Kes kerubin ten ki fika ku ses dôs aza stikadu pa riba, asi pa es pode kubri tanpa. Es ta fika frenti di kunpanheru. Kes kerubin ta fika ku róstu inbaxadu pa tanpa.
21 Bu ta kubri kel Arka ku se tanpa i bu ta poi kel Tistimunhu ki N ta ben da-u déntu di Arka.
22 N ta ben parse bu dianti la i N ta ben pâpia ku bo di riba di kel tanpa. I di meiu di kes dôs kerubin ki sta riba di arka di Tistimunhu, N ta ben da-u tudu kes órdi ki é pa bu da kes israelita.
23 “Tanbê bu ta faze un méza di madera di akásia, di 90 sentímetru di kunprimentu, 45 sentímetru di largura i 67 sentímetru di altura.*
24 Bu ta kubri-l ku oru puru i faze un moldura* di oru na se vólta.
25 Bu ta faze na vólta di méza un borda di largura di mô* i un moldura* di oru na vólta di borda.
26 Bu ta faze kuatu argóla di oru pa méza i bu ta poi kes argóla na kes kuatu kantu, undi kes kuatu pé sta fiksadu.
27 Kes argóla ten ki fika pértu di borda i es ta sirbi pa mete kes vara ki ta uzadu pa karega kel méza.
28 Bu ta faze kes vara di madera di akásia i bu ta kubri-s di oru i bu ta karega kel méza ku kes vara.
29 “Tanbê bu ta faze kes pratu i kes kópu, i tanbê kes jaru i kes tijéla pa baza kes oférta di bebida. Bu ten ki faze-s di oru puru.
30 I sénpri bu ta poi kes pon sagradu na méza na nha frenti.
31 “Bu ta faze un kandelabru di oru puru. Kel kandelabru ten ki trabadjadu ku martélu. Kel bazi, kel párti di meiu, kes brasu, kes kópu, kes boton i kes flor ta ser un pésa sô.
32 Di kel párti di meiu di kandelabru ta sai 6 brasu: três brasu di un ladu i três brasu di kel otu ladu.
33 Na un ladu, kada brasu ta ten três kópu na fórma di flor di améndua, ki ta muda entri kes boton i kes flor. I na kel otu ladu, kada brasu ta ten três kópu na fórma di flor di améndua, ki ta muda entri kes boton i kes flor. É si ki kes 6 brasu ki ta sai di kel párti di meiu di kandelabru ta ser.
34 Na kel párti di meiu di kandelabru ta ten kuatu kópu na fórma di flor di améndua, ki ta ba ta muda entri kes boton i kes flor.
35 Dibaxu di kel primeru par di brasu ki ta sai di kel párti di meiu ta ten un boton. Dibaxu di kel sugundu par di brasu ta ten un boton, i dibaxu di kel últimu par di brasu ta ten un boton. É si ki kes 6 brasu ki ta sai di kel párti di meiu ta ser.
36 Kes boton, kes brasu i kel kandelabru interu debe ser sô un pésa di oru puru, trabadjadu ku martélu.
37 Bu ta faze 7 lánpida pa el, i óras ki kes lánpida sta sendedu, el ta límia kel lugar ki sta se frenti.
38 Se pinsa i kuzas pa poi braza debe ser di oru puru.
39 Bu debe uza 34 kilu* di oru puru pa faze kel kandelabru i tudu kes otu kuza.
40 Toma kuidadu pa bu faze-s di akordu ku kel modelu* ki bu mostradu na monti.
Nótas di rodapé
^ Ô: “lan tinjidu di roxu”.
^ Kel tinta ki uzadu na kel fiu li tradu di un insétu ki txoma coccus.
^ Djobe Disionáriu di Bíblia.
^ Djobe Disionáriu di Bíblia.
^ Ô: “prujétu”.
^ Ô: “kaxa”.
^ Na ebraiku ta fla: “dôs kôvadu i meiu di kunprimentu, un kôvadu i meiu di largura i un kôvadu i meiu di altura”. Un kôvadu ta daba 44,5 cm. Djobe Ap. B14.
^ Ô: “kabamentu”.
^ Djobe Disionáriu di Bíblia.
^ Na ebraiku ta fla: “dôs kôvadu i meiu di kunprimentu i un kôvadu i meiu di largura”.
^ Na ebraiku ta fla: “dôs kôvadu di kunprimentu, un kôvadu di largura i un kôvadu i meiu di altura”.
^ Ô: “kabamentu”.
^ Ô: “kabamentu”.
^ Ô: “prujétu”.
