Ézudu 26:1-37
26 “Bu ten ki faze tabernáklu ku 10 panu di linhu di bon kualidadi, linha azul, lan roxu i fiu brumedju. Bu ten ki faze-s ku kes kerubin bordadu na es.
2 Kada panu ta ten 12 métru i meiu di kunprimentu i dôs métru di largura.* Tudu panu ten ki ten kel mésmu tamanhu.
3 Sinku panu ten ki kozedu na kunpanheru pa es forma un konjuntu, i kes otu sinku panu ta kozedu na kunpanheru pa es forma otu konjuntu.
4 Bu ta faze alsa di linha azul na borda di kel panu ki ta fika na fin di un konjuntu, i bu ten ki faze mésmu kuza na borda di kel panu ki ta fika na pónta di kel otu konjuntu, undi kes dôs konjuntu ta djunta.
5 Bu ten ki faze 50 alsa na un panu i 50 alsa na borda di kel otu panu, asi pa kes alsa fika un frenti di kel otu, undi kes dôs konjuntu ta djunta.
6 Bu ten ki faze 50 kolxeti di oru i djunta kes konjuntu di panu ku kes kolxeti, asi ta forma tabernáklu.
7 “Tanbê, bu ta faze panu di kabélu di kabra pa kubri tabernáklu ku es. Bu ta faze 11 panu.
8 Kada panu ta ten 13 métru i meiu di kunprimentu i dôs métru di largura.* Tudu kes 11 panu ten ki ten kel mésmu tamanhu.
9 Bu ten ki koze sinku panu na kunpanheru, i koze kes otu 6 panu na kunpanheru. Bu ten ki dobra kel sestu panu na párti di frenti di ténda.
10 Bu ten ki faze 50 alsa na borda di kel panu ki ta fika na pónta di kel konjuntu, i 50 alsa na borda di kel panu ki ta fika na pónta di kel otu konjuntu, na undi ki es ta djunta.
11 Bu ten ki faze 50 kolxeti di kóbri i poi kes kolxeti na alsa pa djunta kes párti di ténda, i es ta bira un panu sô pa kubri tabernáklu.
12 Kes panu ki resta ta fika prindadu. Metadi di kes panu ki resta ta fika na párti di tras di tabernáklu.
13 I na kada ladu ta resta 45 sentímetru di kunprimentu di panu, i es ta fika prindadu pa kubri tabernáklu.
14 “Tanbê, bu ta faze un kubertura di péli di karneru tinjidu di brumedju pa ténda, i pa riba di el bu ta poi un kubertura di péli di fóka.
15 “Bu ta faze armason di madera di akásia pa tabernáklu i bu debe pô-s di pé.
16 Kada armason ten ki ten kuatu métru i meiu di altura i 67 sentímetru di largura.*
17 Na pé di kada armason ta ten dôs pésa di madera djuntadu na kunpanheru. É si ki bu debe faze tudu kes armason di tabernáklu.
18 Bu ten ki faze 20 armason pa ladu sul di tabernáklu.
19 “Tanbê, bu ta faze 40 bazi di prata pa poi baxu di kes 20 armason: baxu di un armason ta ten dôs bazi ki ta inkaxa na dôs pésa di madera, i baxu di kes otu armason tanbê ta ten dôs bazi ki ta inkaxa na dôs pésa di madera.
20 Na kel otu ladu di tabernáklu, na ladu nórti, faze 20 armason.
21 Tanbê, faze-s 40 bazi di prata: baxu di un armason ta ten dôs bazi i baxu di kes otu armason tanbê ta ten dôs bazi.
22 Na kel párti di tras di tabernáklu, na oésti, bu ta faze 6 armason.
23 Tanbê bu ta faze dôs armason ki ta sirbi di dôs pósti pa kes kantu na párti di tras di tabernáklu.
24 Kes armason debe ten dôs pésa di bazi ti párti di riba, undi ki sta kel primeru argóla. É si ki tudu dôs armason debe fazedu. Es ta forma kes dôs pósti di kantu.
25 El ta ten 8 armason i ses 16 bazi di prata: baxu di un armason ta ten dôs bazi i baxu di kada un di kes otu armason tanbê ta ten dôs bazi.
26 “Bu ta faze vara di madera di akásia: sinku vara pa kes armason di un ladu di tabernáklu,
27 sinku pa kes armason di kel otu ladu di tabernáklu i sinku pa kes armason di ladu oésti di tabernáklu, ki é kel párti di tras.
28 Kel vara di meiu, ki ta fika na meiu di kes armason, debe bai di un pónta pa kel otu.
29 “Bu ta kubri kes armason di oru, i faze-s argóla di oru, na undi ki bu ta pasa kes vara. Tanbê kubri kes vara di oru.
30 Bu debe faze kel tabernáklu di akordu ku kel prujétu ki bu mostradu na monti.
31 “Bu ten ki faze un kurtina di linha azul, lan roxu, fiu brumedju i linhu di bon kualidadi. Kel kurtina ta ten kerubin bordadu na el.
32 Prinda-l na kuatu pilar di akásia kubridu di oru. Ses ganxu debe ser di oru. Kes pilar debe sta riba di kuatu bazi di prata.
33 Bu debe prinda kel kurtina baxu di kes kolxeti i leba arka di Tistimunhu pa tras di kurtina. Kel kurtina ta sipara kel Lugar Santu di kel Lugar Más Santu.
34 Bu debe poi tanpa riba di arka di Tistimunhu, na kel Lugar Más Santu.
35 “Di kel otu ladu di kurtina, bu ta poi méza. Na frenti di méza bu ta poi kandelabru. Kel méza ta fika na ladu nórti di tabernáklu i kandelabru ta fika na ladu sul.
36 Bu ta faze un kurtina* ku linha azul, lan roxu, fiu brumedju i linhu di bon kualidadi pa entrada di ténda.
37 Bu ta faze pa kel kurtina sinku pilar di akásia kubridu di oru. Bu ta faze pa es ganxu di oru i sinku bazi di kóbri fundidu.
Nótas di rodapé
^ Na ebraiku ta fla: “28 kôvadu di kunprimentu i 4 kôvadu di largura”. Un kôvadu ta daba 44,5 cm. Djobe Ap. B14.
^ Na ebraiku ta fla: “30 kôvadu di kunprimentu i 4 kôvadu di largura”.
^ Na ebraiku ta fla: “10 kôvadu di altura i un kôvadu i meiu di largura”.
^ Djobe Disionáriu di Bíblia.
