Ézudu 29:1-46
29 “É kel-li ki bu ten ki faze pa santifika-s, asi pa es ser nhas saserdóti: skodje un toru novu i dôs karneru sen ninhun difeitu.
2 Bu ta faze pon sen fermentu, pon ku fórma di anel sen fermentu ki fazedu ku azeti i pon finu* sen fermentu untadu ku azeti. Bu ten ki faze-s ku farinha di trigu finu.
3 Bu ta pô-s déntu di un sestu i bu ta oferese-s djuntu ku kel toru i kes dôs karneru.
4 “Bu ta leba Aron i se fidjus ti entrada di ténda di runion i bu ta laba-s ku agu.
5 Dipôs, bu ten ki panha kes ropa i bisti Aron kel ropa kunpridu, kel ropa sen manga di éfodi,* kel éfodi i kel bólsa ki ta fika na petu. I bu ten ki mara kel sintu bordadu* di éfodi na se sintura ku firméza.
6 Bu ta pô-l kel turbanti* spesial na kabésa i bu ta pô-l kel sinal sagradu di didikason* na turbanti.
7 Panha kel óliu sagradu i baza-l riba kabésa pa skodje-l.
8 “Dipôs, traze se fidjus dianti di mi i bisti-s ku kes ropa kunpridu.
9 Poi Aron i tanbê se fidjus kes faxa na sintura i kes turbanti. Kes ómi li i ses disendenti ta ser saserdóti. Kel-li é un lei pa tudu ténpu. É di kel manera li ki Aron i se fidjus ta ser saserdóti.
10 “Dipôs, bu ten ki leba kel toru dianti di ténda di runion, i Aron i se fidjus ta poi mô riba di kabésa di kel toru.
11 Mata kel toru dianti di Jeová, na entrada di ténda di runion.
12 Poi dédu na sangi di kel toru i pasa-l na kes txifri di altar. Dipôs, baza tudu kel sangi ki resta na pé di altar.
13 Dipôs, panha tudu kel gordura ki ta kubri kes tripa, kel gordura di fígadu, kes dôs rin i kel gordura ki sta riba di es i kema-s, asi pa fumu subi di altar.
14 Má bu ta kema na lumi karni di kel toru, se péli i kes kuza ki sta na tripa, fóra di kanpamentu. É un oférta pa pekadu.
15 “Nton, panha un di kes karneru, i Aron i se fidjus ten ki poi mô riba di kabésa di kel karneru.
16 Mata kel karneru, panha se sangi i brufa-l na tudu kes ladu di altar.
17 Korta kel karneru padás-padás, laba se tripa i se pérna, i poi kes padás na ladu di kunpanheru, djuntu ku kabésa.
18 Bu debe kema tudu kel karneru, asi pa kel fumu subi di altar. É un oférta kemadu pa Jeová, un txeru sábi.* É un oférta ki fazedu ku lumi pa Jeová.
19 “Dipôs, bu ten ki panha kel otu karneru, i Aron i se fidjus ten ki poi mô riba di kabésa di kel karneru.
20 Mata kel karneru, panha un bokadinhu di se sangi i poi na pónta di orédja direita di Aron i na pónta di orédja direita di se fidjus, tanbê na dedon di ses mô direita i na dedon di ses pé direita, i brufa kel sangi na tudu kes ladu di altar.
21 Dipôs, panha un bokadinhu di kel sangi ki sta riba di altar i un bokadinhu di óliu sagradu, i uza-s pa brufa Aron i se ropa, i tanbê se fidjus i ses ropa, asi pa Aron i se ropa i se fidjus i ses ropa bira santu.
22 “Nton, tra gordura di karneru, se rabu gordu, kel gordura ki ta kubri tripa, kel gordura di fígadu, kes dôs rin i kel gordura ki sta riba di es, pamodi el é kel karneru ki ta oferesedu pa skodje saserdóti.
23 Panha tanbê un pon rodóndu, un pon ku fórma di anel ki fazedu ku azeti i un pon finu, déntu di kel sestu di kes pon sen fermentu ki sta dianti di Jeová.
24 Bu debe poi tudu kes kuza li na mô di Aron i na mô di se fidjus, i bu ten ki balansa-s di un ladu pa kel otu, sima un oférta balansadu* dianti di Jeová.
25 Dipôs, bu ta tra-s di ses mô i bu ta kema-s na altar, riba di kel oférta kemadu, sima un txeru sábi dianti di Jeová. É un oférta ki fazedu ku lumi pa Jeová.
26 “Dipôs, panha petu di kel karneru ki oferesedu pa skodje Aron pa ser saserdóti, i balansa-l di un ladu pa kel otu, sima un oférta balansadu dianti di Jeová. Kel-li ta ser bu párti.
27 Bu ten ki santifika kes párti li di kel karneru ki oferesedu pa skodje Aron i se fidjus pa ser saserdóti: kel petu di kel oférta balansadu i kel pérna ki oferesedu pa ser kel párti sagradu.
28 Kel-li ta ser di Aron i di se fidjus. É un lei pa tudu ténpu ki kes israelita debe obi ku el, i el ta ser un párti sagradu ki kes israelita ta oferese. É un párti sagradu pa Jeová di ses sakrifisiu di pas.
29 “Óras ki kes fidju di Aron bazadu óliu i es skodjedu pa ser saserdóti, es ta ben uza kes ropa sagradu ki éra di Aron.
30 Kel fidju di Aron ki fika na se lugar di saserdóti i ki entra na ténda di runion pa sirbi na lugar santu, ta uza kes ropa li duránti 7 dia.
31 “Bu ta panha kel karneru ki oferesedu pa skodje saserdóti i bu ta kuzinha se karni na un lugar santu.
32 Aron i se fidjus ta kume karni di kel karneru i pon ki sta na sestu na entrada di ténda di runion.
33 Es ten ki kume kes kuza li ki oferesedu pa perdon di pekadu óras ki es skodjedu pa ser saserdóti i pa es santifikadu. Má, un algen ki é ka saserdóti* ka pode kume kes kuza li pamodi es é sagradu.
34 Si resta algun karni di kel sakrifisiu ki oferesedu pa skodje saserdóti i tanbê kel pon na kel otu dia di palmanhan, kema-s na lumi. Es ka debe kumedu, pamodi é un kuza sagradu.
35 “É si ki bu ten ki faze ku Aron i se fidjus, di akordu ku tudu kel ki N manda-u. Bu ta dura 7 dia ta skodje-s pa es ser saserdóti.
36 Tudu dia bu ta oferese un toru pa ser oférta pa pekadu, asi pa pidi perdon di Deus i pa santifika kel altar. Tanbê bu debe baza óliu na kel altar pa santifika-l.
37 Duránti 7 dia bu ta santifika altar di pekadu, asi pa el bira un altar más sagradu. Tudu kenha ki toka na altar ten ki ser santu.
38 “É kel-li ki bu ta oferese sénpri na altar: tudu dia dôs karneru di un anu.
39 Oferese un karneru di palmanhan i kel otu karneru óras ki sta ta fika noti.*
40 Djuntu ku kel primeru karneru bu ta oferese un kilu* di farinha finu, misturadu ku un litru* di azeti puru, i un litru di vinhu pa ser oférta di bebida.
41 Bu ta oferese kel sugundu karneru óras ki sta ta fika noti, djuntu ku un oférta di serial i un oférta di bebida, sima kes ki bu faze di palmanhan. Bu ta oferese-s sima un txeru sábi, un oférta ki fazedu ku lumi pa Jeová.
42 Ta ser un oférta kemadu ki ta fazedu sénpri duránti tudu nhos jerason dianti di Jeová, na entrada di ténda di runion, undi N ta parse pa nhos pa N pâpia ku bo.
43 “La, N ta parse pa kes israelita i nha glória ta santifika kel lugar.
44 N ta ben santifika ténda di runion i altar i N ta ben santifika Aron i se fidjus, pa es ser nhas saserdóti.
45 N ta ben mora na meiu di povu di Israel i N ta ser ses Deus.
46 I di serteza es ta ben sabe ma mi é Jeová, ses Deus, ki tra-s di téra di Ijitu pa N mora na ses meiu. Ami é Jeová, ses Deus.
Nótas di rodapé
^ Ô: “patalaxa; laxa”.
^ Djobe Disionáriu di Bíblia.
^ Ô: “faxa pa sintura”.
^ Djobe Disionáriu di Bíblia.
^ Ô: “kel diadema sagradu”.
^ Ô: “ki ta kalma”.
^ Djobe Disionáriu di Bíblia.
^ Na ebraiku ta fla: “un stranjeru”. Kel-li krê fla un ómi ki é ka di família di Aron.
^ Na ebraiku ta fla: “entri kes dôs noti”. Ki krê fla entri kel óra ki sól ta kanba i kel óra ki ta kumesa ta fika sukuru.
