Ézudu 3:1-22
3 Muizés bira pastor di ribanhu di Jetru, se sogru, ki éra saserdóti di Midian. Kantu el staba ta leba ribanhu pa ladu oésti di dizértu, el txiga na Orebe, kel monti di Deus verdaderu.
2 Nton, anju di Jeová parse pa el na un lumi na meiu di un pé di spinhu. Timenti Muizés staba ta djobe pa kel pé di spinhu, el odja ma el staba ku lumi, má el ka staba ta kema.
3 Pur isu, Muizés fla: “Dexa-m txiga más pértu pa N djobe es kuza stranhu i diskubri pamodi ki kel pé di spinhu ka sta ta kema.”
4 Kantu Jeová odja ma el staba ta txiga más pértu pa el djobe, Deus txoma-l di meiu di kel pé di spinhu i el fla-l: “Muizés! Muizés!” El responde: “Ale-m li.”
5 Nton, Deus fla: “Ka bu txiga más pértu. Tra bu sandália di pé, pamodi kel lugar undi bu sta é txon sagradu.”
6 El kontinua ta fla: “Ami é Deus di bu pai, Deus di Abraon, Deus di Izaki i Deus di Jakó.” Nton, Muizés sukundi se róstu, pamodi el staba ku medu di odja pa Deus verdaderu.
7 Jeová fla tanbê: “Di serteza N odja frónta di nha povu ki sta na Ijitu i N obi ses kexa pamodi kes ki sta ta obriga-s trabadja. N sabe dretu modi ki es sta ta sufri.
8 N sta dixi pa N ba liberta-s di mô di gentis di Ijitu. N ta tra-s di kel téra i N ta leba-s pa un téra sábi i grandi, un téra ki ta da leti ku mel, kel tiritóriu di kes kananeu, kes itita, kes amoreu, kes perizeu, kes eveu i kes jebuzeu.
9 Má, kel frónta di povu di Israel dja txiga ti mi, i tanbê N sta odja ma gentis di Ijitu sta ta maltrata-s.
10 Má gósi, ben, pa N manda-u pa Faraó, i bu ta ba tra nha povu, kes israelita, di Ijitu.”
11 Má, Muizés fla Deus verdaderu: “Ken ki é mi pa N bai ti Faraó i tra kes israelita di Ijitu?”
12 Nton el fla-l: “N ta sta ku bo, i pa bu ten serteza ma é mi ki manda-u, N ta da-u kel sinal li: dipôs ki bu tra kel povu di Ijitu, nhos ta ben sirbi* Deus verdaderu na kel monti li.”
13 Má, Muizés fla Deus verdaderu: “Imajina ma N bai ti kes israelita i N fla-s: ‘Deus di nhos gentis grandi manda-m na nhos’, i es pergunta-m: ‘Kal ki é se nómi?’ Kuzê ki N ta fla-s?”
14 Nton, Deus fla Muizés: “N Ta Bira Kel Ki N Disidi* Bira.”* I el fla tanbê: “É kel-li ki bu debe fla kes israelita: ‘N Ta Bira manda-m na nhos.’”
15 Nton, Deus torna fla Muizés:
“É kel-li ki bu debe fla kes israelita: ‘Jeová, kel Deus di nhos gentis grandi, Deus di Abraon, Deus di Izaki i Deus di Jakó manda-m na nhos.’ Kel-li é nha nómi pa tudu ténpu, i é si ki N debe lenbradu di el di jerason pa jerason.
16 Gósi bai, djunta kes ansion di Israel i fla-s: ‘Jeová, kel Deus di nhos gentis grandi, kel Deus di Abraon, di Izaki i di Jakó, parse pa mi i el fla: “Di serteza N sta ta odja nhos i kuzê ki es sta ta faze nhos na Ijitu.
17 Pur isu, N ta fla: N ta ben tra nhos di kel frónta ki nhos sta ta sufri na mô di kes algen di Ijitu i N ta leba nhos pa kel téra di kes kananeu, kes itita, kes amoreu, kes perizeu, kes eveu i kes jebuzeu, pa un téra ki ta da leti ku mel.”’
18 “Di serteza es ta ba obi ku bo, i bu ta bai na rei di Ijitu djuntu ku ansions di Israel, i nhos debe fla-l: ‘Jeová, kel Deus di ebreus, pâpia ku nos. Pur isu, favor, nho dexa-nu faze un viajen di três dia pa dizértu pa nu pode oferese sakrifisiu pa Jeová, nos Deus.’
19 Má, N sabe dretu ma rei di Ijitu ka ta dexa nhos bai. El ta faze kel-li sô si un mô poderozu obriga-l.
20 Pur isu, N ta ben labanta nha mô pa N kastiga Ijitu ku tudu kes milagri ki N ta ben faze la, i dipôs di kel-li el ta dexa nhos bai.
21 I N ta ben poi kes algen di Ijitu ta djuda nhos, asi pa óras ki nhos sai, pa nhos ka sai ku mô baziu.
22 Kada mudjer debe pidi se vizinha i kel mudjer ki sta moradu na se kaza kuzas di prata i di oru i tanbê ropa, i nhos ta pô-s na nhos fidju matxu i na nhos fidju-fémia. I nhos ta ben toma kes rikéza di Ijitu.”
