Ézudu 32:1-35
32 Má, kantu es odja ma Muizés staba ta dura ki dixi di monti, povu djunta na vólta di Aron i es fla-l: “Labanta, faze-nu un deus pa bai nos frenti, pamodi nu ka sabe kuzê ki kontise ku kel Muizés li, kel ómi ki tra-nu di téra di Ijitu.”
2 Nton Aron fla-s: “Nhos tra kes brinku di oru di orédja di nhos mudjer, di nhos fidju matxu i di nhos fidju-fémia i nhos traze-m es.”
3 Nton, tudu algen tra kes brinku di orédja i es leba Aron es.
4 Nton, el panha kel oru ki es traze i el uza un feraménta pa pô-l na fórma di un státua di bizeru. I es kumesa ta fla: “Ó Israel, kel-li é nhos Deus, kel ki tra nhos di téra di Ijitu.”
5 Kantu Aron odja kel-li, el faze un altar dianti di bizeru. Nton Aron fla: “Manhan nu ta ben faze un fésta pa Jeová.”
6 Kel otu dia, es labanta sédu palmanhan, es faze oférta kemadu i es faze kes sakrifisiu di pas. Kantu ki es tirmina povu xinta pa kume i pa bebe. Nton es labanta pa divirti.
7 Jeová fla Muizés: “Bai, dixi, pamodi bu povu, ki bu tra di téra di Ijitu, dja straga.
8 Es disvia faxi di kel kaminhu ki N manda-s pa es sigi. Es faze un státua na fórma di un bizeru pa es, i es sta ta inbaxa se dianti, ta oferese-l sakrifisiu i ta fla: ‘Ó Israel, kel-li é bu Deus, ki tra-u di téra di Ijitu.’”
9 Tanbê Jeová fla Muizés: “Dja N odja ma kel povu li é temozu.
10 Pur isu, ka bu tenta inpidi-m di kaba ku es pamodi N sta ku raiba, i N ta pô-u ta bira un nason grandi na ses lugar.”
11 Nton, Muizés inplora Jeová, se Deus: “Ó Jeová, pamodi ki bu torna xinti txeu raiba di bu povu, dipôs ki bu tra-s di téra di Ijitu ku grandi puder i ku mô fórti?
12 Pamodi ki gentis di Ijitu tinha ki flaba: ‘El tra-s di Ijitu ku mau intenson. El krê mataba es na kes montanha i kababa ku es di téra’? Dexa bu raiba pa la i muda bu disizon di kaba ku bu povu.
13 Lenbra di bus sérvu Abraon, Izaki i Israel, ki bu jura-s pa bu própi kabésa ta fla: ‘N ta poi nhos disendenti* ta bira txeu, sima kes stréla na séu, i N ta da nhos disendenti tudu kel téra ki N mostra nhos, pa ser di ses pa tudu ténpu.’”*
14 Nton, Jeová muda* se disizon i el ka kaba ku se povu sima el flaba.
15 Nton, Muizés vira i el dixi di monti ku kes dôs tábua di Tistimunhu na mô. Kes tábua staba skrebedu na tudu kes dôs ladu, frenti ku tras.
16 É Deus própi ki faze kes tábua, i el skrebe se palavras na es.
17 Kantu Juzué kumesa ta obi barudju di povu ta grita, el fla Muizés: “Sta un barudju di géra na kanpamentu.”
18 Má Muizés fla:
“Kel-li é ka barudju di un múzika di un algen ki ganha géra,Nen é ka barudju di un algen ki perde géra;N sta ta obi barudju di un otu tipu di múzika.”
19 Lógu ki Muizés txiga pértu di kanpamentu i el odja kel bizeru i kes algen ta badja, el fika txeu xatiadu i el bota kes tábua ki staba na se mô na txon, na pé di monti, i el kebra-s.
20 El panha kel bizeru ki es faze, el kema-l na lumi i el pila-l. Dipôs, el spadja-l riba di agu i el poi kes israelita ta bebe-l.
21 Muizés fla Aron: “Kuzê ki kel povu li faze-u pa bu pô-s ta faze un pekadu gravi di kel-li?”
22 Aron responde: “Nha sinhor, ka bu fika xatiadu. Bu sabe dretu ma kel povu li ten tendénsia pa faze kuzas mariadu.
23 Nton es fla-m: ‘Faze-nu un deus ki ta bai nos frenti, pamodi nu ka sabe kuzê ki kontise ku kel Muizés li, kel ómi ki tra-nu di téra di Ijitu.’
24 Pur isu, N fla-s: ‘Ken ki sta ta uza algun kuza di oru pa tra-l i pa da-m.’ Nton, N bota kel oru na lumi i sai kel bizeru li.”
25 Muizés odja ma povu staba diskontroladu, pamodi Aron dexa-s sen kontrolu. Pur isu, es konporta di un manera vergonhozu dianti di ses inimigu.
26 Nton, Muizés fika na entrada di kanpamentu i el fla: “Ken ki sta di ladu di Jeová pa ben pa mi!” I tudu kes levita djunta na se vólta.
27 El fla-s: “É si ki Jeová, kel Deus di Israel, fla: ‘Kada un di nhos debe poi se spada na sintura i anda kanpamentu interu, di un entrada pa kel otu, pa mata se irmon, se vizinhu i se amigu.’”
28 Kes levita faze sima Muizés manda-s. Nton, na kel dia, uns 3 mil ómi matadu.
29 Nton, Muizés fla: “Oji nhos sipara pa sirbi Jeová, pamodi kada un di nhos bai kóntra se própi fidju i kóntra se própi irmon. Oji el ta abênsua nhos.”
30 Lógu na kel otu dia, Muizés fla povu: “Nhos faze un pekadu gravi dimás. Gósi N sta subi monti pa N ba pâpia ku Jeová, pa N odja si N ta pode faze algun kuza pa nhos pekadu purduadu.”
31 Pur isu, Muizés volta pa Jeová i el fla: “Kel povu li faze un pekadu gravi dimás! Es faze un deus di oru pa es!
32 Má gósi, si bu krê, púrdua ses pekadu. Si bu ka sta purdua-s, favor, paga nha nómi di kel livru ki bu skrebe.”
33 Má, Jeová fla Muizés: “Kenha ki N ta paga di nha livru é ken ki peka kóntra mi.
34 Gósi bai, i leba povu pa kel lugar ki N fla-u. Nha anju ta bai bu frenti, i na dia ki N ben pô-s ta presta kónta,* N ta kastiga-s pamodi ses pekadu.”
35 Nton, Jeová kumesa ta kastiga povu pamodi kel bizeru ki es manda Aron faze.
Nótas di rodapé
^ Na ebraiku ta fla: “simenti”.
^ Ô: “pa ser ses propriadadi pa tudu ténpu”.
^ Ô: “lamenta”.
^ Ô: “ki N ben julga-s”.
