Ézudu 34:1-35
34 Nton Jeová fla Muizés: “Faze dôs tábua di pédra sima kes primeru tábua, i N ta skrebe na es kes mésmu kuza ki N skrebeba na kes primeru tábua, ki bu kebra.
2 Pripara pa bu subi monti Sinai manhan di palmanhan i bai parse nha dianti la riba di monti.
3 Má ningen ka pode subi ku bo, i ningen ka pode odjadu na ninhun párti di monti. Nen mésmu ovelha ô vaka ka pode ba kume dianti di monti.”
4 Nton, Muizés faze kes dôs tábua di pédra sima kes primeru. El labanta sédu palmanhan i el subi monti Sinai, sima Jeová mandaba el i el leba kes dôs tábua di pédra na mô.
5 Dipôs, Jeová dixi na núven i el fika la djuntu ku Muizés i Jeová pâpia ku el sobri se própi nómi.
6 Jeová pasa se dianti ta fla: “Jeová, Jeová, Deus di mizerikórdia i konpaxon, ki ten paxénxa,* i ki sta xeiu di amor lial* i di verdadi,*
7 ki ta mostra amor lial pa milharis di jerason óras ki el ta púrdua éru, fadja i pekadu, má di ninhun manera el ka ta dexa di kastiga kenha ki é kulpadu, pamodi el ta traze kastigu di éru di pai riba di fidju i riba di nétu, i riba di tirseru jerason i kuartu jerason.”
8 Muizés inbaxa kel óra ku róstu pa txon.
9 Nton el fla: “Ó Jeová, si é verdadi ma nho sta kontenti ku mi, favor Jeová, bai ku nos i fika na nos meiu, enbóra nos é un povu temozu. Púrdua nos éru i nos pekadu, i seta-nu pa nu ser povu di nho.”
10 El responde: “N ta ben faze un kontratu ku nhos: N ta ben faze kuzas grandi dianti di bu povu interu, kuzas ki nunka ka fazedu na ninhun párti di téra, nen na ninhun nason, i tudu povu ki nhos vive na ses meiu ta ben odja kes trabadju di Jeová, pamodi kel ki N ta ben faze ku nhos é un kuza ki tudu algen ta fika dimiradu.
11 “Presta atenson na tudu kel ki N sta manda-u oji. N ta ben tra di bu dianti kes amoreu, kes kananeu, kes itita, kes perizeu, kes eveu i kes jebuzeu.
12 Toma kuidadu pa bu ka faze ninhun kontratu ku kes algen di kel téra pa undi bu sta bai, asi pa kel-li ka bira un armadilha pa nhos.
13 Má nhos ten ki distrui ses altar i ses pilar sagradu i korta ses pósti sagradu.*
14 Bu ka debe inbaxa dianti di ninhun otu deus, pamodi Jeová é konxedu pa* algen ki ta iziji pa adora-l sô el.* Sin, el é un Deus ki ta iziji pa adora-l sô el.
15 Toma kuidadu pa bu ka faze ninhun kontratu ku kes algen di kel téra li, pamodi óras ki es faze prostituison ku ses deus i es oferese-s sakrifisiu, algen ta konvida-u i bu ta kume se sakrifisiu.
16 I di serteza bu ta kaza bus fidju matxu ku ses fidju-fémia, i ses fidju-fémia ta faze prostituison ku ses deus* i es ta poi bus fidju matxu tanbê ta faze prostituison ku ses deus.
17 “Bu ka debe faze deus di metal.
18 “Bu ten ki faze kel fésta di Pon sen Fermentu. Bu ta kume pon sen fermentu, sima N manda-u. Bu ta faze kel-li duránti 7 dia na ténpu markadu, na mês di abibe,* pamodi foi na mês di abibe ki bu sai di Ijitu.
19 “Tudu primeru fidju matxu é di meu. Tanbê tudu primeru fidju matxu di bus animal é di meu, ka ta inporta si é un bizeru ô un korderu.
20 Si bu ten un buru ki é primeru fidju bu ten ki resgata-l. Bu ta faze kel-li óras ki bu sakrifika un ovelha na lugar di kel buru. Si bu ka sakrifika un ovelha, bu debe kebra kel buru piskôs. Tudu kes primeru fidju di bu família tanbê ten ki resgatadu. Ningen ka pode parse nha dianti ku mô baziu.
21 “Bu ten ki trabadja 6 dia, má na sétimu dia bu ta diskansa.* Ti mésmu na ténpu di trabadja txon i na ténpu di kodjéta, bu ta diskansa.
22 “Bu ta faze Fésta di Simana i bu ta oferese kes primeru frutu maduru di kodjéta di trigu, i bu ta faze Fésta di Baraka* na fin di anu.
23 “Três bês pa anu tudu ómi* ten ki bai adora Jeová, kel Sinhor verdaderu, kel Deus di Israel.
24 Pamodi N ta tra nasons di bu dianti i N ta omenta bu tiritóriu, i ningen ka ta krê ba toma bu téra óras ki bu subi três bês pa anu pa parse dianti* di Jeová, bu Deus.
25 “Bu ka debe oferese sangi di nha sakrifisiu djuntu ku un kuza ki ten fermentu. Bu ka debe guarda ti kel otu dia di palmanhan kel sakrifisiu di fésta di Páskua.
26 “Bu ten ki leba pa kaza di Jeová, bu Deus, kel midjór párti di kes primeru kodjéta di bu txon.
“Bu ka debe kuzinha kabritu na leti di se mai.”
27 Tanbê Jeová fla Muizés: “Bu ten ki skrebe kes palavra li, pamodi é di akordu ku kes palavra li, ki N sta ta faze un kontratu ku bo i ku Israel.”
28 El fika la ku Jeová duránti 40 dia i 40 noti. El ka kume pon nen el ka bebe agu. I El skrebe na kes tábua kes palavra di kontratu, ki é kes 10 Mandamentu.*
29 Dipôs, Muizés dixi di monti Sinai ku kes dôs tábua di Tistimunhu na mô. Kantu el dixi di monti, Muizés ka sabia ma péli di se róstu staba ta brilha txeu pamodi el pâpia ku Deus.
30 Kantu Aron i tudu kes israelita djobe Muizés, es odja ma péli di se róstu staba ta brilha txeu i es fika ku medu di txiga pértu di el.
31 Má Muizés txoma-s, pur isu Aron i tudu xéfi di povu* txiga pértu di el, i Muizés pâpia ku es.
32 Dipôs di kel-li, tudu israelita txiga pértu di el, i el fla-s tudu kes mandamentu ki Jeová da-l na monti Sinai.
33 Óras ki Muizés ta tirminaba di pâpia ku es, el ta kubriba róstu ku un véu.
34 Má óras ki Muizés ta parseba dianti di Jeová pa pâpia ku el, el ta traba kel véu ti óra di sai. Dipôs, el ta saíba i el ta flaba kes israelita kes mandamentu ki el resebe.
35 I kes israelita ta odjaba ma péli di róstu di Muizés ta brilhaba txeu. Nton, Muizés ta torna kubriba róstu ku kel véu ti óras ki el ta entraba pa pâpia ku Deus.
Nótas di rodapé
^ Ô: “ki ka ta xatia faxi”.
^ Ô: “bondadi”.
^ Ô: “i ki é fiel”.
^ Djobe Disionáriu di Bíblia.
^ Na ebraiku ta fla: “Jeová se nómi é”.
^ Ô: “ki ka ta seta rival”.
^ Ô: “ta adora ses deus”.
^ Ô: “guarda sábadu”.
^ Tanbê konxedu pa Fésta di Ténda.
^ Ô: “matxu”.
^ Na ebraiku ta fla: “pa odja róstu”.
^ Na ebraiku ta fla: “kes 10 Palavra”.
^ Na ebraiku ta fla: “asenbleia”.
