Ézudu 38:1-31
38 El faze altar pa oférta kemadu di madera di akásia. El éra kuadradu, ku dôs métru i meiu di kunprimentu, dôs métru i meiu di largura i un métru i meiu di altura.*
2 El faze txifri na kes kuatu kantu. Kes txifri ku altar ta formaba un pésa sô. Dipôs, el kubri-l ku kóbri.
3 Dipôs di kel-la, el faze tudu kes material di altar: kes baldi, kes pá, kes tijéla, kes garfu i kes kuza pa poi braza. El faze tudu kes material di kóbri.
4 Tanbê el faze un gradi pa altar, un redi di kóbri, i el pô-l pa baxu di se borda, na metadi di altura di altar.
5 El faze kuatu argóla di metal fundidu pa kes kuatu kantu i el pô-s na altura di kel gradi di kóbri, asi pa pasa kes vara.
6 Dipôs, el faze kes vara di madera di akásia i el kubri-s di kóbri.
7 El mete kes vara na kes argóla na ladu di altar, asi pa es pode karegaba el. El faze altar sima un kaxa oku di tábua.
8 El faze kel basia di kóbri ku se supórti di kóbri ku kes spedju, ki éra di kes mudjer ki staba organizadu pa sirbi na pórta di ténda di runion.
9 Dipôs, el faze pátiu. Na ladu sul di pátiu, el faze kurtina di linhu di bon kualidadi ki ta midiba 45 métru di kunprimentu.*
10 Tinha 20 pósti i 20 bazi di kóbri, i kes ganxu di kes pósti i ses argóla pa faze ligason éra di prata.
11 Tanbê, na ladu nórti, tinha kurtina ki ta midiba 45 métru. I kes 20 pósti i kes 20 bazi éra di kóbri. Kes ganxu di kes pósti i ses argóla pa faze ligason éra di prata.
12 Má na ladu oésti, kel kurtina tinha 22 métru* di largura. Tinha 10 pósti i 10 bazi, i kes ganxu di kes pósti i ses argóla pa faze ligason éra di prata.
13 Kel largura na ladu lésti, kel ladu ki sól ta sai, éra di 22 métru.*
14 Di un ladu di entrada tinha kurtina di 6 métru i meiu,* ku três pósti i três bazi.
15 I di kel otu ladu di entrada di pátiu tanbê tinha kurtina di 6 métru i meiu,* ku três pósti i três bazi.
16 Tudu kurtina na vólta di pátiu éra di linhu di bon kualidadi.
17 Kes bazi pa kes pósti éra di kóbri, kes ganxu i kes argóla pa faze ligason di kes pósti éra di prata, kel párti di riba di kes pósti éra kubridu di prata i tudu kes pósti di pátiu tinha argóla pa faze ligason di prata.
18 Kel kurtina di entrada di pátiu fazedu ku linha azul, lan roxu, fiu brumedju i linhu di bon kualidadi. El tinha 9 métru di kunprimentu i dôs métru i meiu di altura, el tinha kel mésmu altura ki kes kurtina di pátiu.
19 Ses kuatu pósti i kes kuatu bazi éra di kóbri. Kes ganxu i kes argóla pa faze ligason di kes pósti éra di prata, i riba di kes pósti éra kubridu di prata.
20 Tudu kes staka di tabernáklu i di kes kurtina di pátiu éra di kóbri.
21 Kel-li é kel lista di kes material ki uzadu pa faze tabernáklu, kel tabernáklu di Tistimunhu. Muizés manda faze kel lista li i kes levita kunpri kel responsabilidadi li dibaxu di orientason di Itamar, fidju di Aron, kel saserdóti.
22 Bezalel, fidju di Uri, fidju di Ur i di tribu di Judá, faze tudu kel ki Jeová mandaba Muizés faze.
23 Djuntu ku el staba Oliabe, fidju di Aizamaki, di tribu di Dan. El éra artizon, el ta fazeba dizenhu i el ta bordaba ku linha azul, lan roxu, fiu brumedju i linhu di bon kualidadi.
24 Tudu kel oru ki uzadu na trabadju di lugar santu éra kel mésmu oru ki oferesedu na oférta balansadu: mil kilu.* Es uza kel pézu di prata ki ta uzadu na lugar santu pa peza prata.
25 I kel prata ki kes ómi di povu ki rejistadu leba éra di 3.440 kilu.* Es uza kel pézu di prata ki ta uzadu na lugar santu pa peza prata.
26 Tudu ómi di 20 anu pa riba ki staba rejistadu leba 6 grama* di prata. Es uza kel pézu di prata ki ta uzadu na lugar santu pa peza prata. Pa tudu es éra 603.550 ómi.
27 Es uza 3.420 kilu di prata pa faze kes bazi pa lugar santu i kes bazi pa kurtina. Es uza 3.420 kilu* pa faze 100 bazi, 34,2 kilu* pa kada bazi.
28 Ku 20 kilu* di prata el faze ganxu pa kes pósti, el kubri kel párti di riba i el djunta-s.
29 Kel kóbri ki oferesedu* éra di 2.400 kilu.*
30 Ku tudu kel kóbri el faze bazi pa entrada di ténda di runion, kel altar di kóbri, kel gradi di kóbri di altar, tudu kes material di altar,
31 kes bazi na vólta di pátiu, kes bazi pa entrada di pátiu, tudu kes staka di tabernáklu i tudu kes staka di kes kurtina di pátiu.
Nótas di rodapé
^ Na ebraiku ta fla: “sinku kôvadu di kunprimentu, sinku kôvadu di largura i três kôvadu di altura”. Un kôvadu ta daba 44,5 cm. Djobe Ap. B14.
^ Na ebraiku ta fla: “100 kôvadu”.
^ Na ebraiku ta fla: “50 kôvadu”.
^ Na ebraiku ta fla: “50 kôvadu”.
^ Na ebraiku ta fla: “15 kôvadu”.
^ Na ebraiku ta fla: “15 kôvadu”.
^ Na ebraiku ta fla: “29 taléntu i 730 siklu”. Un taléntu ta daba 34,2 kg. Un siklu ta daba 11,4 g. Djobe Ap. B14.
^ Na ebraiku ta fla: “100 taléntu i 1.775 siklu”.
^ Na ebraiku ta fla: “meiu siklu”.
^ Na ebraiku ta fla: “100 taléntu”.
^ Na ebraiku ta fla: “un taléntu”.
^ Na ebraiku ta fla: “1.775 siklu”.
^ Ô: “oférta balansadu”.
^ Na ebraiku ta fla: “70 taléntu i 2.400 siklu”.
