Ézudu 4:1-31
4 Má Muizés responde: “Má imajina ma es ka kridita na mi i es ka obi ku mi, i es fla: ‘Jeová ka parse pa bo.’”
2 Nton, Jeová pergunta-l: “Kuzê ki bu tene na mô?” El responde: “Un pó.”
3 El fla-l: “Bota-l na txon.” I kantu el bota-l na txon, kel pó bira un kóbra i Muizés fuji di el.
4 Jeová fla Muizés: “Stika mô i pega-l na rabu.” Nton, el stika mô i el pega-l, i kel kóbra bira un pó.
5 Deus fla: “Kel-li é pa es pode kridita ma Jeová, kel Deus di bus gentis grandi, Deus di Abraon, Deus di Izaki i Deus di Jakó, parse pa bo.”
6 Jeová torna fla-l: “Favor, poi mô na petu,* baxu di bu ropa.” Nton, el poi mô na petu, baxu di se ropa. Kantu el tra mô, kel mô staba ku lépra, branku sima névi!
7 Dipôs el fla: “Torna mete mô na ropa.” El torna mete mô na ropa. Kantu el tra, el staba dretu sima kes otu párti di se korpu!
8 El fla: “Si es ka kridita na bo nen es ka presta atenson na kel primeru sinal, di serteza es ta presta atenson na kel sugundu sinal.
9 Má sikrê es ka kridita na kes dôs sinal i es nega obi ku bo, bu ta bai tra un bokadinhu di agu na riu Nilu i bu ta baza-l na txon, i kel agu ki bu ba panha na Nilu ta bira sangi na txon.”
10 Nton Muizés fla Jeová: “Jeová, diskulpa-m, má nunka N ka foi bon na pâpia, nen antis nen dipôs ki bu pâpia ku bu sérvu, pamodi N ta pâpia divagar* i nha língua é pizadu.”
11 Jeová fla-l: “Kenha ki da ómi bóka? Kenha ki ta pô-l fika mudu ô surdu, ta odja dretu ô ta fika ségu? É ka mi, Jeová?
12 Nton, gósi bai i N ta sta ku bo óras ki bu ta pâpia* i N ta inxina-u kuzê ki bu debe fla.”
13 Má el fla: “Diskulpa-m Jeová. Favor, manda kalker otu algen ki bu krê.”
14 Nton Jeová xatia ku Muizés i el fla: “Kuzê ki bu ta atxa di bu irmon Aron, ki é levita? N sabe ma el ta pâpia dretu. El sta ta ben gósi li pa ben inkontra ku bo. Óras ki el odja-u, se korason ta fika kontenti.
15 Nton, pâpia ku el i pô-l palavras na se bóka, i óras ki nhos pâpia N ta sta ku nhos i N ta inxina nhos kuzê ki nhos debe faze.
16 El ta pâpia ku povu na bu lugar, el ta ser bu pórta-vós i bu ta ser sima Deus pa el.*
17 I bu ta leba kel pó ki bu tene na mô i bu ta faze milagri ku el.”
18 Nton, Muizés volta pa Jetru, se sogru, i el fla-l: “Favor, N krê volta pa nhas irmon ki sta na Ijitu pa N odja si inda es sta bibu.” Jetru fla Muizés: “Bai na pas.”
19 Dipôs Jeová fla Muizés na Midian: “Bai, volta pa Ijitu, pamodi tudu kes ómi ki staba ta djobe-u pa mata-u* dja móre.”
20 Nton, Muizés poi se mudjer i se fidjus na buru, i el volta pa téra di Ijitu. Tanbê, Muizés leba kel pó di Deus verdaderu na mô.
21 Nton, Jeová fla Muizés: “Dipôs ki bu volta pa Ijitu, faze tudu kes milagri ki N da-u puder pa bu faze dianti di Faraó. Má N ta dexa pa se korason bira duru, i el ka ta dexa povu bai.
22 Bu debe fla Faraó: ‘É kel-li ki Jeová fla: “Israel é nha fidju, nha primeru fidju.
23 N ta fla-u: dexa nha fidju bai, asi pa el pode sirbi-m. Má si bu nega dexa-l bai, N ta mata bu fidju, bu primeru fidju.”’”
24 Duránti kel viajen, na kel lugar undi ki es staba ta ba durmi, Jeová atxa-l i el tenta mata-l.
25 Dipôs, Zípura panha un pédra moladu* i el faze se fidju sirkunsizon i el poi kel péli ta toka na se pé* i el fla: “É pamodi abo é un noivu di sangi pa mi.”
26 Asi, El dexa-l bai. Zípura fla “noivu di sangi” pamodi kel sirkunsizon.
27 Nton, Jeová fla Aron: “Bai pa dizértu pa bu bai inkontra ku Muizés.” Nton, el bai i el inkontra ku el na monti di Deus verdaderu i el kunprimenta-l ku un beju.
28 Muizés fla Aron tudu kel ki Jeová mandaba el fla, i tudu kes milagri ki El manda-l faze.
29 Dipôs di kel-li, Muizés i Aron bai i es djunta tudu kes ansion di Israel.
30 Aron fla-s tudu kes kuza ki Jeová flaba Muizés, i Muizés faze kes milagri na frenti di povu.
31 Nton povu kridita. Kantu es obi ma Jeová volta se atenson pa kes israelita i ma el odja ses frónta, es inbaxa dianti di Deus.
Nótas di rodapé
^ Kel-li é párti di ropa ki ta fika na petu, ki ta sirbiba di bolsu na ténpu antigu.
^ Na ebraiku ta fla: “nha bóka é pizadu”.
^ Na ebraiku ta fla: “ku bu bóka”.
^ Ô: “bu ta reprizenta Deus pa el”.
^ Ô: “djobe bu alma”.
^ Ô: “faka di pédra”.
^ Talvês krê fla pé di kel anju.
