Ézudu 6:1-30
6 Nton, Jeová fla Muizés: “Gósi, bu ta ben odja kuzê ki N ta faze ku Faraó. Ku nha mô xeiu di puder N ta obriga-l manda-s ses kaminhu. Ku nha mô xeiu di puder N ta obriga-l kóre ku es di se téra.”
2 Dipôs Deus fla Muizés: “Ami é Jeová.
3 I N ta kustuma mostraba Abraon, Izaki i Jakó ma ami é kel Deus Tudu-Poderozu, má sobri nha nómi, Jeová, N ka mostra-s tudu kel ki el ta siginifika.
4 Tanbê N faze nha kontratu ku es pa da-s téra di Kanan, kel téra ki es vive na el sima stranjeru.
5 Gósi, mi própi N obi povu di Israel, ki kes algen di Ijitu tene na skravidon, ta jeme, i N lenbra di nha kontratu.
6 “Pur isu, fla kes israelita: ‘Ami é Jeová, i N ta ben tra nhos dibaxu di kes karga pizadu di kes algen di Ijitu i libra nhos di skravidon. N ta salva nhos ku brasu fórti* i ku kastigu* grandi.
7 Nhos ta bira nha povu i N ta ser nhos Deus, i di serteza nhos ta sabe ma ami é Jeová, nhos Deus, ki sta tra nhos dibaxu di kes karga pizadu di Ijitu.
8 I N ta leba nhos pa kel téra ki N jura* da Abraon, Izaki i Jakó, i N ta da nhos kel téra pa ser di nhos. Ami é Jeová.’”
9 Dipôs, Muizés leba kel mensajen li pa kes israelita, má es ka obi ku Muizés pamodi es staba dizanimadu i pamodi kel skravidon staba duru.
10 Nton Jeová fla Muizés:
11 “Bai i fla Faraó, rei di Ijitu, pa el dexa kes israelita sai di país.”
12 Má, Muizés fla Jeová: “Kes israelita ka obi ku mi. Modi ki Faraó ta obi ku mi, si N ta pâpia ku difikuldadi?”
13 Má Jeová torna fla Muizés i Aron kes órdi ki es devia daba kes israelita i Faraó, rei di Ijitu, asi pa tra kes israelita di téra di Ijitu.
14 Kes-li é nómi di kes xéfi di família:* kes fidju di Ruben, primeru fidju di Israel, éra Anoki, Palu, Esron i Karmi. Kes-li é kes família di Ruben.
15 Kes fidju di Simion éra Jemuel, Jamin, Oade, Jakin, Zoar i Saul, ki éra fidju di un mudjer di Kanan. Kes-li é kes família di Simion.
16 Kes-li é nómi di kes fidju di Levi, di akordu ku ses família: Jérson, Koate i Merari. Levi vive 137 anu.
17 Kes fidju di Jérson éra Libni i Simei, di akordu ku ses família.
18 Kes fidju di Koate éra Anron, Izar, Ebron i Uziel. Koate vive 133 anu.
19 Kes fidju di Merari éra Mali i Muzi.
Kes-li éra kes família di kes levita, di akordu ku ses família.
20 Anron kaza ku Jokebede, ki éra família di se pai.* Jokebede tevi kes fidju li ku el: Aron i Muizés. Anron vive 137 anu.
21 Kes fidju di Izar éra Korá, Nefegi i Zikri.
22 Kes fidju di Uziel éra Mizael, Elizafan i Sitri.
23 Aron kaza ku Elizeba, fidju-fémia di Aminadabe, irman di Nazon. Elizeba tevi kes fidju li ku el: Nadabe, Abiú, Eliazar i Itamar.
24 Kes fidju di Korá éra Asir, Elkana i Abiazafe. Kes-li éra kes família di Korá.
25 Eliazar, fidju di Aron, kaza ku un di kes fidju-fémia di Putiel. El tevi un fidju ku Eliazar i el pô-l nómi di Fineias.
Kes-li é kes xéfi di grupu di família ki éra disendentis di kes fidju di Levi.
26 Jeová fla Aron i Muizés: “Nhos tra povu di Israel di téra di Ijitu, grupu-grupu.”*
27 É Muizés i Aron ki ba pâpia ku Faraó, rei di Ijitu, pa tra povu di Israel di Ijitu.
28 Na dia ki Jeová pâpia ku Muizés na téra di Ijitu,
29 Jeová fla Muizés: “Ami é Jeová. Fla Faraó, rei di Ijitu, tudu kuza ki N sta fla-u.”
30 Nton, Muizés fla Jeová: “N ta pâpia ku difikuldadi, pur isu modi ki Faraó ta ba obi-m?”
Nótas di rodapé
^ Ô: “labantadu”.
^ Na ebraiku ta fla: “julgamentu”.
^ Na ebraiku ta fla: “labanta nha mô pa”.
^ Na ebraiku ta fla: “kes kabésa di kaza di ses pai”.
^ Na ebraiku ta fla: “irman di se pai”.
^ Na ebraiku ta fla: “di akordu ku ses izérsitu”.
