Ézudu 7:1-25
7 Nton, Jeová fla Muizés: “Odja, N ta pô-u ta bira sima Deus* pa Faraó, i Aron, bu irmon, ta bira bu proféta.
2 Bu ta fla tudu kel ki N manda-u. Aron, bu irmon, ta pâpia ku Faraó i Faraó ta dexa kes israelita sai di país.
3 Má ami, N ta dexa pa korason di Faraó fika duru, i N ta faze txeu milagri i sinal na téra di Ijitu.
4 Má Faraó ka ta obi ku nhos. Nton, N ta ben poi nha mô riba di Ijitu ku kastigu grandi, pa N tra di téra di Ijitu kes monti di algen ki é di meu,* nha povu, kes israelita.
5 I gentis di Ijitu di serteza ta ben sabe ma é mi ki é Jeová, óras ki N stika nha mô kóntra Ijitu i N tra kes israelita di ses meiu.”
6 Muizés i Aron faze sima Jeová mandaba es. Es faze sima el fla-s.
7 Muizés tinha 80 anu i Aron tinha 83 anu kantu es pâpia ku Faraó.
8 Nton, Jeová fla Muizés i Aron:
9 “Si Faraó fla nhos: ‘Nhos faze un milagri’, fla Aron: ‘Panha bu pó i bota-l na txon na frenti di Faraó.’ Kel pó ta bira un kóbra grandi.”
10 Nton, Muizés i Aron bai na Faraó i es faze sima Jeová mandaba es. Aron bota se pó na txon na frenti di Faraó i di se sérvus, i kel pó bira un kóbra grandi.
11 Má, Faraó txoma kes ómi ki ten sabedoria i kes fitiseru. I kes saserdóti* di Ijitu faze mésmu kuza ku ses majia.
12 Kada un di es bota ses pó na txon i es bira kóbra grandi. Má kel pó di Aron inguli ses pó.
13 Má simé, korason di Faraó fika duru i el ka obi ku es, sima Jeová dja flaba.
14 Nton Jeová fla Muizés: “Korason di Faraó é duru. El sta nega dexa povu bai.
15 Bai na Faraó di palmanhan. Óras ki el sta ta sai pa bai pa riu Nilu, fika pértu di agu pa bu inkontra ku el. I leba ku bo kel pó ki bira un kóbra.
16 Fla-l: ‘Jeová, kel Deus di ebreus, manda-m na nho i el fla: “Dexa nha povu bai, asi pa es pode sirbi-m na dizértu”, má nho ka obi ti gósi.
17 É kel-li ki Jeová fla: “Gósi nho ta sabe ma mi é Jeová pamodi kuzê ki N ta ben faze. N sta ta ben da agu di riu Nilu ku kel pó ki sta na nha mô, i el ta bira sangi.
18 Kes pexi di Nilu ta móre, Nilu ta fika ta txera mal i kes algen di Ijitu ka ta konsigi bebe agu di Nilu.”’”
19 Dipôs, Jeová fla Muizés: “Fla Aron: ‘Panha bu pó i stika mô pa riba di kes agu di Ijitu, pa riba di kes riu, pa riba di kes kanal,* pa riba di kes pántanu i pa riba di tudu kes lugar ki ta guardadu agu, pa es bira sangi.’ Ta ten sangi na téra di Ijitu interu, ti na kes póti di madera i di pédra.”
20 Muizés i Aron faze lógu sima Jeová mandaba es. El labanta kel pó i el da na agu di riu Nilu na frenti di Faraó i di se sérvus, i tudu kel agu di riu bira sangi.
21 Kes pexi di riu móre i riu kumesa ta txera mal, i kes algen di Ijitu ka konsigi bebe agu di Nilu. Tinha sangi na téra di Ijitu interu.
22 Má kes saserdóti di Ijitu faze mésmu kuza ku ses majia, pur isu korason di Faraó kontinua duru i el ka obi ku es, sima Jeová dja flaba.
23 Dipôs, Faraó bai pa kaza i el ka liga kuzê ki kontise.
24 Nton, tudu kes algen di Ijitu fika ta koba na vólta di Nilu ta djobe agu pa bebe, pamodi es ka ta pode bebeba agu di Nilu.
25 I pasa 7 dia dipôs ki Jeová ataka riu Nilu.
Nótas di rodapé
^ Na ebraiku ta fla: “N ta pô-u ta bira Deus”.
^ Na ebraiku ta fla: “nha izérsitu”.
^ Ô: “kes saserdóti ki ta fazeba majia”.
^ Kel-li krê fla kes kanal di Nilu.
