Ézudu 8:1-32
8 Dipôs Jeová fla Muizés: “Bai na Faraó i fla-l: ‘É kel-li ki Jeová fla: “Dexa nha povu bai, asi pa es pode sirbi-m.
2 Si bu kontinua ta nega dexa-s bai, N ta ben manda un praga di sapu riba di tudu bu tiritóriu.
3 I riu Nilu ta ben fika xeiu di sapu, i es ta sai di agu i es ta entra na bu kaza, na bu kuartu, es ta sta na bu kama, es ta entra na kaza di bu sérvu i di bu povu, na bus fornu i na kes kuza di faze masa.*
4 Kes sapu ta ben riba bo, bu povu i tudu bus sérvu.”’”
5 Dipôs Jeová fla Muizés: “Fla Aron: ‘Panha bu pó i stika bu mô pa riba di kes riu, di kes kanal di Nilu i pa riba di kes pántanu, i poi kes sapu ta invadi téra di Ijitu.’”
6 Nton, Aron stika se mô pa riba di agu di Ijitu i kes sapu kumesa ta sai i ta kubri téra di Ijitu.
7 Má, kes saserdóti* faze mésmu kuza ku ses majia i es poi sapu ta invadi téra di Ijitu.
8 Nton, Faraó txoma Muizés ku Aron i el fla: “Nhos pidi Jeová pa tra kes sapu riba di mi i riba di nha povu, dja ki N krê dexa povu bai, asi pa es ba oferese sakrifisiu pa Jeová.”
9 Nton Muizés fla Faraó: “É nho ki ta fla-m ki ténpu ki N debe pidi Deus pa anho, sérvus di nho, povu di nho i kazas di nho fika livri di kes sapu. Kes sapu ta fika sô na riu Nilu.”
10 Nton el fla: “Manhan.” Pur isu Muizés fla: “Ta ser sima nho fla, asi pa nho sabe ma ka ten ningen ki é sima Jeová, nos Deus.
11 Anho, kaza di nho, sérvus di nho i povu di nho, ta ben fika livri di kes sapu. Es ta ben fika sô na Nilu.”
12 Nton Muizés i Aron sai di dianti di Faraó, i Muizés pidi Jeová pa kaba ku kes sapu ki El mandaba kóntra Faraó.
13 Jeová faze sima Muizés pidi-l, i kes sapu ki staba na kaza, na pátiu i na kanpu kumesa ta móre.
14 Kes algen di Ijitu djunta-s riba di kunpanheru, ti ki fika txeu monti, i téra kumesa ta txera mal.
15 Kantu Faraó odja ma kel situason dja pasaba, el bira se korason duru i el ka obi ku es, sima Jeová dja flaba.
16 Jeová fla Muizés: “Fla Aron: ‘Stika bu pó i da-l na txon, i kel puera ta bira moskitu na téra di Ijitu interu.’”
17 I es faze si. Aron stika mô ku se pó i el da-l na txon, i moskitu bai pa riba di ómi i di animal. Tudu puera bira moskitu na téra di Ijitu interu.
18 Kes saserdóti tenta faze mésmu kuza i faze moskitu ku ses majia, má es ka konsigi. I kes moskitu ataka ómis ku animal.
19 Nton, kes saserdóti ki ta fazeba majia fla Faraó: “É dédu di Deus!” Má korason di Faraó kontinua duru, i el ka obi ku es, sima Jeová dja flaba.
20 Nton, Jeová fla Muizés: “Manhan di palmanhan bai na Faraó óras ki el sta ta sai pa bai pa riu, i fla-l: ‘É si ki Jeová fla: “Dexa nha povu bai, asi pa es pode sirbi-m.
21 Má, si bu ka manda nha povu bai, N ta manda txeu móska grandi* kóntra bo, kóntra bus sérvu, kóntra bu povu i kóntra bus kaza. Kes kaza di Ijitu ta fika xeiu di kes móska, i es ta ben kubri txon ki gentis di Ijitu ta poi pé.
22 Na kel dia, di serteza N ta ben poi téra di Gózen apárti, undi nha povu ta mora. Ka ta ba ten ninhun móska grandi la, i asi bu ta sabe ma ami, Jeová, N sta na kel téra li.
23 N ta ben distrinsa nha povu di bu povu. Kel sinal li ta kontise manhan.”’”
24 I Jeová faze si, i un monti di móska grandi kumesa ta invadi kaza di Faraó i kaza di tudu se sérvus i téra di Ijitu interu. Kes móska distrui país.
25 Dipôs, Faraó txoma Muizés ku Aron i el fla: “Nhos bai, nhos faze sakrifisiu pa nhos Deus, má li na téra di Ijitu.”
26 Má Muizés fla: “Nu ka pode faze kel-li, pamodi kel sakrifisiu ki nu krê oferese pa Jeová, nos Deus, é un kuza ki gentis di Ijitu ka gosta. Si nu bai dianti di gentis di Ijitu i nu oferese sakrifisiu ki es ka gosta, es ka ta da-nu ku pédra?
27 Nu ta faze un viajen di três dia pa dizértu, i la nu ta oferese un sakrifisiu pa Jeová, nos Deus, sima el fla-nu.”
28 Nton Faraó fla: “N ta dexa nhos bai pa nhos ba oferese sakrifisiu pa Jeová, nhos Deus, na dizértu. Má, ka nhos bai mutu lonji. Nhos inplora pa mi.”
29 Nton Muizés fla: “N ta sai di dianti di nho gósi, i N ta bai inplora Jeová, i manhan kes móska grandi ta ben dexa Faraó, se sérvus i se povu. Má Faraó ka debe ingana-nu* otu bês i nega dexa povu bai oferese sakrifisiu pa Jeová.”
30 Muizés sai di dianti di Faraó i el inplora Jeová.
31 Nton, Jeová faze sima Muizés pidi, i kes móska grandi dexa Faraó, se sérvus i se povu. Ka fika nen un.
32 Má, Faraó bira se korason duru otu bês i el ka dexa povu bai.
Nótas di rodapé
^ Kel-li krê fla tijéla di faze masa di pon.
^ Ô: “kes saserdóti ki ta fazeba majia”.
^ Un tipu di móska ki ta morde.
^ Ô: “brinka ku nos”.
