Ézudu 9:1-35
9 Nton, Jeová fla Muizés: “Bai na Faraó i fla-l: ‘É kel-li ki Jeová, kel Deus di ebreus, fla: “Dexa nha povu bai, asi pa es pode sirbi-m.
2 Má si bu nega dexa-s bai i bu kontinua ta inpidi-s,
3 mô di Jeová ta ben sta kóntra bus animal ki sta na kanpu. Kes kabalu, kes buru, kes kamelu, kes vaka i kes ovelha ta ben sufri un duénsa terível.
4 I Jeová di serteza ta ben distrinsa kes animal di Israel i kes animal di Ijitu, i ninhun animal di kes israelita ka ta móre.”’”
5 Tanbê, Jeová marka un ténpu pa faze kel-li. El fla: “Manhan, Jeová ta faze kel-li na país.”
6 I lógu na kel otu dia Jeová faze kel-li, i tudu tipu di animal na Ijitu kumesa ta móre, má ninhun di kes animal di Israel ka móre.
7 Kantu Faraó manda se sérvus pa djobe kuzê ki kontise, el fika ta sabe ma ninhun di kes animal di Israel ka móre. Má simé, korason di Faraó kontinua duru i el ka dexa povu bai.
8 Nton, Jeová fla Muizés i Aron: “Nhos intxi nhos mô ku sinza di un fornu, i Muizés debe bota-l na ar, dianti di Faraó.
9 El ta bira puera riba téra di Ijitu interu, i el ta bira na frunku ku pus na ómi i na animal, na téra di Ijitu interu.”
10 Dipôs, es panha sinza di un fornu i es bai na Faraó. Muizés bota-l na ar i el bira frunku ku pus na ómi i na animal.
11 Kes saserdóti ki ta fazeba majia ka konsigi fika dianti di Muizés, pamodi frunku sai-s na korpu i tanbê na tudu kes algen di Ijitu.
12 Má Jeová dexa korason di Faraó fika duru i el ka obi ku Muizés i Aron, sima Jeová dja flaba Muizés.
13 Nton, Jeová fla Muizés: “Bai manhan di palmanhan na Faraó i fla-l: ‘É kel-li ki Jeová, kel Deus di ebreus, fla: “Dexa nha povu bai, asi pa es pode sirbi-m.
14 Má gósi, N ta manda tudu nhas praga kóntra bo, bus sérvu i bu povu, asi pa bu fika ta sabe ma ka ten ningen ki é sima mi na téra interu.
15 Pamodi pa gósi dja N stikaba nha mô pa kastigaba abo ku bu povu ku un duénsa terível, i bu ta dizaparseba di téra.
16 Má, é pur isu ki N dexa-u fika bibu: pa N mostra-u nha puder i pa papiadu di nha nómi na téra interu.
17 Inda bu sta kontinua ta trata nha povu ku orgulhu i bu sta nega dexa-s bai?
18 Manhan, pa vólta di kel óra li, N ta poi un tenpistadi di granizu ta kai sima nunka ka kontise na Ijitu, désdi dia ki el fundadu ti oji.
19 Pur isu, manda guarda tudu bus animal i tudu kel ki é di bo ki sta na kanpu. Tudu kes ómi i kes animal ki sta na kanpu i ki ka bai pa un lugar suguru ta móre óras ki kel granizu kai riba di es.”’”
20 Tudu kes sérvu di Faraó ki ruspeta palavra di Jeová poi ses sérvu i ses animal na un lugar suguru,
21 má tudu kes ki ka liga palavra di Jeová dexa ses sérvu i ses animal na kanpu.
22 Nton, Jeová fla Muizés: “Stika bu mô pa séu, asi pa granizu kai riba téra di Ijitu interu, riba di ómi i di animal i riba di tudu plantason di kanpu na téra di Ijitu.”
23 Nton, Muizés stika se pó pa séu i Jeová manda strubada* i granizu. Kai lumi* riba téra i Jeová poi granizu ta txobe riba téra di Ijitu.
24 Tinha granizu i tinha lumi na meiu di kel granizu. Kel txuba di granizu éra fórti dimás. Nunka ka kontiseba un kuza di kel-la na país, désdi ki Ijitu bira un nason.
25 Kel granizu kaba ku tudu kuza ki tinha na kes kanpu di Ijitu, ómi i animal. El kaba ku tudu plantason i el distrui tudu kes arvi di kanpu.
26 Sô na téra di Gózen, undi kes israelita staba, ki ka tevi granizu.
27 Nton, Faraó manda txoma Muizés i Aron i el fla-s: “N peka di es bês. Jeová é justu, i mi ku nha povu nu sta eradu.
28 Nhos inplora Jeová pa el para kel strubada i kel granizu. Nton, N ta dexa nhos bai i nhos ka ta fika li más.”
29 Muizés fla-l: “Lógu ki N sai di sidadi, N ta stika nha mô dianti di Jeová. Kes strubada i kel granizu ta para, asi pa nho sabe ma téra é di Jeová.
30 Má, N sabe ma simé, nen nho i nen sérvus di nho, nhos ka ta ben ten grandi ruspetu pa Jeová Deus.”
31 Linhu* i sevada fika distruídu, pamodi sevada staba ku spiga i linhu staba ku flor.
32 Má ninhun tipu di trigu* ka distruídu, pamodi es ta fikaba maduru más tardi.
33 Nton, Muizés sai di dianti di Faraó i el sai di sidadi. El stika se mô dianti di Jeová i kes strubada i kel granizu para, i txuba para di kai riba di téra.
34 Kantu Faraó odja ma txuba, granizu i strubada dja paraba, el peka otu bês i el bira se korason duru, i se sérvus faze mésmu kuza.
35 I korason di Faraó bira duru i el ka dexa kes israelita bai, sima Jeová dja flaba através di Muizés.
Nótas di rodapé
^ Ô: “truvon”.
^ Talvês el sta ta pâpia di relánpagu fórti.
^ Un planta ki es ta kultivaba na Ijitu pa faze ropa di linhu.
^ Na ebraiku ta fla: “trigu i espelta”.
