Primera Koríntius 12:1-31
12 Irmons, N krê pa nhos intende dretu sobri kes don di spritu santu.
2 Nhos sabe ma kantu nhos éra pesoas di nason,* nhos éra influensiadu i inganadu pa kes imajen ki ka ta pâpia. Nhos sigi-s pa undi ki es leba nhos.
3 N krê pa nhos sabe ma ningen ka ta fla: “Jizus é maldisuadu!”, óras ki el ta pâpia orientadu pa spritu di Deus. I ningen ka pode fla: “Jizus é Sinhor!” si spritu santu ka orienta-l.
4 Ten dons diferenti, má ten kel mésmu spritu.
5 Ten maneras diferenti di sirbi, má ten kel mésmu Sinhor.
6 Ten maneras diferenti ki Deus ta aji na pesoas, má simé ten sô un Deus.
7 Má kuzê ki spritu santu ta poi kada un ta faze ta odjadu klaru, i Deus ta da-s el pa djuda otus.
8 Pamodi spritu santu ta da un algen palavra* di sabedoria, i kel mésmu spritu ta da otu algen palavra di konhisimentu.
9 Kel mésmu spritu ta da un algen fé, i otu el ta da-l don di kura.
10 Inda pa kel otu el ta da-l don di faze milagri, pa kel otu don di profetiza, pa kel otu don di intende mensajen ki ben di Deus, pa kel otu don di pâpia na otus língua i pa kel otu don di traduzi na otus língua.
11 Tudu kes kuza li ta fazedu di akordu ku kel mésmu spritu, i kel spritu ta dividi kes don li pa kada algen sima el krê.
12 Pamodi sima korpu é sô un, má el ten txeu ménbru, i tudu kes ménbru di korpu, enbóra es é txeu párti, es é sô un korpu, Kristu é si tanbê.
13 Pamodi nos tudu nu batizadu ku kel mésmu spritu pa forma sô un korpu, ka ta inporta si nos é judeu, gregu, skravu ô livri, i nos tudu nu podu ta bebe kel mésmu spritu.
14 Na verdadi, korpu ka ten sô un ménbru, má el ten txeu.
15 Si pé flaba: “Dja ki mi é ka mô, N ka ta faze párti di korpu”, é ka kel-la ki ta poba el ka ta faze párti di korpu.
16 I si obidu flaba: “Dja ki mi é ka odju, N ka ta faze párti di korpu”, é ka kel-la ki ta poba el ka ta faze párti di korpu.
17 Si korpu interu éra un odju, ku kuzê ki nu ta obiba? Si korpu interu éra un obidu, ku kuzê ki nu ta xintiba txeru?
18 Má, Deus poi kada ménbru di korpu sima el krê.
19 Si tudu ménbru di korpu éra kel mê, modi ki korpu ta sérba?
20 Es é txeu ménbru, má simé sô un korpu.
21 Odju ka pode fla mô: “N ka meste-u”, nen kabésa ka pode fla pé: “N ka meste-u.”
22 Má kes ménbru di korpu ki ta parse ma es é más fraku es tanbê es mestedu,
23 i kes párti di korpu ki nu ta atxa ma es é ka mutu inportanti, nu ta da-s txeu ónra, i kes párti ki é ka mutu bunitu nu ta trata-s ku txeu ruspetu.
24 Má kes párti bunitu di nos korpu ka meste di nada. Deus forma korpu di kel manera li, asi pa da ónra pa kel párti ki meste más txeu.
25 El faze kel-li pa ka tinha divizon na korpu, má pa kes ménbru mostra kel mésmu preokupason pa kunpanheru.
26 Si un ménbru sta sufri, tudu kes otu ménbru ta sufri djuntu ku el. Si un ménbru dadu ónra, tudu kes otu ménbru ta fika kontenti djuntu ku el.
27 Nhos é korpu di Kristu i kada un di nhos é ménbru di es korpu.
28 Deus skodje un lugar pa kada un na kongregason: primeru, pa kes ki é apóstlu; sugundu, pa kes ki é proféta; tirseru, pa kes ki é instrutor; dipôs pa kes ki ta faze milagris; pa kes ki ten don di kura; pa kes ki ta djuda otus; pa kes ki ten kapasidadi di toma kónta; pa kes ki ta pâpia línguas diferenti.
29 Tudu es é apóstlu? Tudu es é proféta? Tudu es é instrutor? Tudu es ta faze milagri?
30 Tudu es ten don di kura? Tudu es ta pâpia otus língua? Tudu es ta traduzi?*
31 Má nhos sforsa pa resebe* kes don más inportanti. Má inda N ta mostra nhos un kaminhu ki é mutu más midjór.
Nótas di rodapé
^ Kel-li krê fla ki é ka krenti.
^ Ô: “mensajen”.
^ Ô: “Tudu es é tradutor”.
^ Ô: “nhos sforsa pa djobe ku zelu”.
