Primera Koríntius 6:1-20
6 Óras ki nhos tene prubléma ku kunpanheru pamodi ki nhos ta bai pa tribunal dianti di ómis injustu, envês di dianti di kes santu?
2 Ô nhos ka sabe ma é kes santu ki ta ben julga mundu? I si é nhos ki ta ben julga mundu, nhos ka ten kapasidadi di rezolve kes prubléma más pikinoti?
3 Nhos ka sabe ma nu ta ben julga anjus? Nton, pamodi ki nhos ka ta konsigi rezolve prublémas di kel vida li?
4 I si nhos ten prubléma di es vida li pa rezolve, pamodi ki nhos ta skodje ómis ki kongregason ka ta seta pa ser nhos juís?
5 N sta pâpia ku nhos pa poi nhos ta xinti vergónha. Na nhos meiu ka ten ninhun ómi ki ten sabedoria ki ta pode julga prubléma entri nhos?
6 Envês di kel-li, irmon ta leba irmon pa tribunal, i el ta akuza-l na frenti di kes ki é ka krenti!
7 Na verdadi, óras ki nhos ta leba kunpanheru pa tribunal dja nhos perde. É ka éra midjór nhos sufri injustisa? É ka éra midjór pa nhos fika ku prujuis?
8 Má, nhos sta ta faze injustisa, i nhos sta ta traze prujuis pa nhos própi irmon!
9 Nhos ka sabe ma kes ki é injustu ka ta erda Reinu di Deus? Ka nhos ingana nhos kabésa.* Kes ki ta faze konportamentu seksual mariadu,* kes ki ta adora deus falsu, kes ki ta faze adultériu, ómis ki ta seta séksu ku ómi, ómi ki ta faze séksu ku ómi,*
10 kes ki é ladron, ganansiozu, kes ki ta bebe dimás, kes ki ta injúria otus algen* i kes ki ta ingana algen pa toma-s ses kuza ka ta erda Reinu di Deus.
11 Alguns di nhos éra si. Má nhos labadu, nhos biradu santu, nhos txomadu justu na nómi di Sinhor Jizus Kristu i ku spritu di nos Deus.
12 Pa mi tudu kuza é dretu,* má é ka tudu kuza ki ta djuda. Pa mi tudu kuza é dretu, má N ka ta dexa nada kontrola-m.*
13 Kumida é pa stômagu i stômagu é pa kumida, má Deus ta ben kaba ku es tudu dôs. Korpu é ka pa konportamentu seksual mariadu* má pa Sinhor, i Sinhor é pa korpu.
14 Má Deus resusita* Sinhor i el ta ben resusita-nu* tanbê ku se puder.
15 Nhos ka sabe ma nhos korpu é ménbrus di Kristu? Nton, N debe tra ménbrus di Kristu i djunta-l ku un prostituta? Klaru ki nau!
16 Nhos ka sabe ma kalker algen ki djunta ku un prostituta es dôs ta bira sô un korpu? Pamodi Deus fla: “Es dôs ta bira sô un karni.”
17 Má ken ki djunta ku Sinhor, el ku Sinhor ta ten mésmu manera di pensa.*
18 Nhos fuji di konportamentu seksual mariadu!* Kalker otu pekadu ki ómi ta faze é fóra di se korpu, má ken ki ta ten konportamentu seksual mariadu sta ta peka kóntra se própi korpu.
19 Nhos ka sabe ma nhos korpu é ténplu di spritu santu ki sta na nhos, ki nhos resebe di Deus? Tanbê, nhos é ka dónu di nhos kabésa,
20 pamodi nhos kunpradu pa un présu. Pur isu, nhos uza nhos korpu pa da Deus glória.
Nótas di rodapé
^ Ô: “Ka nhos ser inganadu”.
^ Djobe Disionáriu di Bíblia.
^ Na gregu ta fla: “ómi ki ta deta ku ómi”.
^ Ô: “kes ki ta uza palavras pa maltrata algen”.
^ Ô: “permitidu”.
^ Ô: “pô-m dibaxu di se autoridadi”.
^ Na gregu é porneia. Djobe Disionáriu di Bíblia.
^ Na gregu ta fla: “labanta”.
^ Na gregu ta fla: “labanta-nu di mórti”.
^ Ô: “ta bira un sô na spritu”.
^ Na gregu é porneia. Djobe Disionáriu di Bíblia.
