Primera Koríntius 7:1-40
7 Gósi, sobri kes kuza ki nhos skrebeba mi, é midjór pa un ómi ka toka na* un mudjer.
2 Má, dja ki ten txeu konportamentu seksual mariadu,* kada ómi debe ten se própi mudjer i kada mudjer debe ten se própi maridu.
3 Maridu debe da se mudjer kel ki el ten direitu, i mudjer tanbê debe faze mésmu kuza pa se maridu.
4 Mudjer ka ten autoridadi riba se própi korpu, má é se maridu ki ten. Di mésmu manera, maridu ka ten autoridadi riba se própi korpu, má é se mudjer ki ten.
5 Ka nhos nega kunpanheru kel direitu li, sô si nhos dôs konkorda na faze kel-li pa un ténpu, asi pa nhos pode tra ténpu pa nhos faze orason. Má dipôs, nhos debe djunta otu bês, asi pa Satanás ka tenta nhos pamodi nhos ka konsigi kontrola nhos kabésa.
6 N sta fla nhos kel-li, pa nhos sabe kuzê ki nhos pode faze, má kel-li é ka un órdi.
7 Má N ta kreba pa tudu ómi sérba sima mi. Má kada un resebe se própi don di Deus, un di un manera i kel otu di otu manera.
8 Gósi, N ta fla pa kes ki é ka kazadu i pa kes ki é viúva ma é midjór pa es si es fika sima mi.
9 Má si es ka ta konsigi kontrola ses kabésa, es pode kaza, pamodi é midjór kaza di ki fika ta arde di paxon.
10 N ta da kes orientason li pa kes ki é kazadu: un mudjer ka debe sipara di se maridu. Kel orientason li é di Sinhor.
11 Má si el sipara, el debe fika sen kaza ô nton el debe konpo ku se maridu. I maridu ka debe dexa se mudjer.
12 Má N ta fla pa kes otu, sin é mi ki sta fla, é ka Sinhor: si algun irmon ten un mudjer ki é ka krenti i kel mudjer krê fika ku el, kel irmon ka debe sipara di el.
13 I si un mudjer ten un maridu ki é ka krenti i kel maridu krê fika ku el, kel mudjer ka debe sipara di se maridu.
14 Pamodi maridu ki é ka krenti é santu pamodi se mudjer, i kel mudjer ki é ka krenti é santu pamodi se maridu. Sinon nhos fidju ka ta sérba santu,* má gósi es é santu.
15 Má si kel ki é ka krenti disidi larga-l, dexa-l bai.* Na kel situason li, kel irmon ô kel irman ka ten obrigason di fika, má Deus txoma nhos pa pas.
16 Pamodi, mudjer, modi ki bu sabe si bu ta salva bu maridu ô nau? Ô, maridu, modi ki bu sabe si bu ta salva bu mudjer ô nau?
17 Má, pa kada un kontinua ta vive na kel situason ki el staba kantu Jeová* txoma-l. Kel-li é un orientason ki N ta da pa tudu kongregason.
18 Algun ómi txomadu kantu el staba sirkunsidadu? El debe kontinua sima el sta. Algun ómi txomadu kantu el ka staba sirkunsidadu? El ka debe faze sirkunsizon.
19 Ka ta inporta si un algen é sirkunsidadu ô nau, kuzê ki é inportanti é pa el obi ku mandamentus di Deus.
20 Kada un debe kontinua sima el staba kantu el txomadu.
21 Kantu bu txomadu bo éra skravu? Ka bu preokupa ku kel-li. Má si bu pode fika livri, pruveta kel oportunidadi.
22 Pamodi tudu kel ki éra skravu kantu el txomadu na Sinhor, el ta bira un sérvu di Sinhor livri. I kel ki éra livri kantu el txomadu, el ta bira skravu di Kristu.
23 Nhos kunpradu pa un présu. Nhos para di bira skravus di ómi.
24 Irmons, kada un debe kontinua sima el staba kantu Deus txoma-l.
25 Gósi, pa kes ki é vírjen,* N ka ten ninhun órdi di Sinhor, má N ta da nha opinion, ami ki é un algen fiel i ki Sinhor mostra mizerikórdia.
26 Pur isu, pamodi prublémas di gósi, N ta atxa ma é midjór pa un ómi kontinua sima el sta.
27 Bu sta maradu na un mudjer? Para di tenta fika livri. Bu ka sta maradu na un mudjer? Para di djobe un mudjer.
28 Má sikrê bu kaza, bu ka sta peka. I si un algen vírjen kaza, el ka ta peka. Má, kes ki kaza ta ten prubléma na ses vida.* Má N sta tenta popa nhos di kel-li.
29 Irmons, tanbê N ta fla nhos, ma ténpu ki resta é poku. Di gósi pa dianti, kes ki ten mudjer pa vive sima ki es ka tene-l,
30 kes ki ta txora sima kes ki ka ta txora, kes ki sta kontenti sima kes ki ka sta kontenti, kes ki ta kunpra sima kes ki ka tene nada,
31 i kes ki ta uza mundu, sima kes ki ka ta uza-l tudu. Pamodi séna di es mundu sta ta muda.
32 Na verdadi, N krê pa nhos sta livri di preokupason. Kel ómi ki é ka kazadu sta preokupadu ku kuzas di Sinhor, na modi ki el pode agrada Sinhor.
33 Má ómi kazadu sta preokupadu ku kuzas di mundu, na modi ki el pode agrada se mudjer,
34 i el sta divididu. Tanbê, mudjer ki é ka kazadu i kes vírjen, sta preokupadu ku kes kuza di Sinhor, pa es pode ser santu na korpu i tanbê na spritu. Má, mudjer kazadu sta preokupadu ku kuzas di mundu, na modi ki el pode agrada se maridu.
35 N sta fla kel-li pa djuda nhos, ka pa poi nhos limiti,* má pa poi nhos ta faze kel ki é dretu i ta sirbi Sinhor sénpri, sen distrai.
36 Má si un algen atxa ma el ka sta konporta dretu pamodi el sta kontinua sen kaza,* i el ka sta na flor di juventudi, nton el debe faze kuzê ki el krê, el ka ta peka. El pode kaza.
37 Má si un algen sta disididu na korason i el ka xinti nisisidadi, má el ta konsigi kontrola* se vontadi i el disidi na se própi korason ka kaza,* el ta faze dretu.
38 Tanbê, kel ki ta kaza* ta faze dretu, má kel ki ka ta kaza ta faze midjór.
39 Mudjer sta maradu na se maridu timenti se maridu sta bibu. Má si se maridu durmi na mórti, el sta livri pa kaza ku ken ki el krê, má sô na Sinhor.
40 Má na nha opinion, el ta ser más filís si el kontinua sima el sta. I N ten serteza ma mi tanbê N ten spritu di Deus.
Nótas di rodapé
^ Ô: “ka ten relason seksual ku”.
^ Li palavra gregu porneia sta na plural. Djobe Disionáriu di Bíblia.
^ Na gregu ta fla: “nhos fidju ta sérba inpuru”.
^ Ô: “sipara”.
^ Ô: “kes ki nunka ka kaza”.
^ Ô: “tribulason na ses karni”.
^ Na gregu ta fla: “ka pa mara nhos”.
^ Ô: “pamodi se virjindadi”.
^ Na gregu ta fla: “má el ten autoridadi riba”.
^ Ô: “kontinua ku se virjindadi”.
^ Ô: “ki da se virjindadi na kazamentu”.
