Primera Timótiu 2:1-15
2 Pur isu, primeru di tudu, N ta rekumenda nhos pa nhos inplora,* pa nhos faze orason, pa nhos faze pididus i pa nhos agradese Deus pa tudu tipu di algen,
2 pa kes ki é rei i pa tudu kes ki sta na puzison altu,* asi pa nu kontinua ta leba un vida kalmu i sosegadu ku seriedadi, i ta mostra ma nu ta adora Deus na tudu kuza.
3 Kel-li é bon i el ta poi Deus, ki é nos Salvador, ta fika kontenti,
4 i se vontadi é pa tudu tipu di algen ser salvu i pa es ten un konhisimentu izatu di verdadi.
5 Pamodi ten sô un Deus i ten sô un mediador* entri Deus i ómis: un ómi ki é Kristu Jizus,
6 ki da se vida pa ser un resgati di valor izatu pa tudu algen.* Ta ben dadu tistimunhu di kel-li na ténpu sértu.
7 É pur isu ki Deus skodje-m pa N prega i pa N ser un apóstlu, asi pa N inxina kes algen di nason sobri fé i verdadi. N sta pâpia verdadi, N ka sta konta mintira.
8 Pur isu, N krê pa na tudu lugar, pa ómis kontinua ta faze orason, ta labanta ses mô ku lialdadi pa Deus, sen raiba i sen faze dibati.
9 Tanbê, mudjer debe bisti dretu,* es debe infeita ses kabésa ku ruspetu i bon juís, ka ku kes móda di transa, nen ku oru ô pérula, nen ku ropa karu dimás,
10 má es debe faze bons óbra, sima ta speradu di kes mudjer ki ta fla ma es ta adora Deus.
11 Óras ki mudjer ta prende, el debe kontinua kaladu* i ku tudu obidiensa.
12 N ka ta permiti pa mudjer inxina ô pa el manda na ómi, má el debe fika kaladu.*
13 Pamodi Adon fazedu primeru, i Eva fazedu dipôs.
14 Tanbê, Adon ka inganadu, má mudjer inganadu konpletamenti i el bira pekadora.
15 Má, el ta ben fika salvu óras ki el ten fidju, désdi ki el* kontinua na fé, na amor i na santidadi, ku bon juís.
Nótas di rodapé
^ Ô: “faze súplika”.
^ Ô: “na puzison di autoridadi”.
^ Djobe Disionáriu di Bíblia.
^ Ô: “pa tudu tipu di algen”.
^ Ô: “debe uza ropa disenti”.
^ Ô: “ku un spritu kétu, kalmu”.
^ Ô: “fika kalmu; fika kétu”.
^ Na gregu ta fla: “es”.
