Primera di Juan 5:1-21
5 Tudu kel ki ta kridita ma Jizus é Kristu nase di Deus. I tudu kel ki ta ama Deus tanbê ta ama kes ki é fidju di Deus.
2 Através di kel-li nu ta sabe ma nu ta ama fidjus di Deus, óras ki nu ta ama Deus i nu ta kunpri se mandamentus.
3 Pamodi amor di Deus siginifika kel-li: pa nu obi ku se mandamentus. I se mandamentus é ka pizadu,
4 pamodi tudu kel ki* nase di Deus ta vense mundu. I kel-li é kel vitória ki vense mundu: nos fé.
5 Kenha ki pode vense mundu? É ka kel ki ten fé ma Jizus é Fidju di Deus?
6 Jizus Kristu ben através di agu i sangi. El ka ben sô ku agu, má ku agu i sangi. I spritu ta da tistimunhu di kel-li, pamodi spritu é verdadi.
7 Pamodi es é três ki ta da tistimunhu:
8 spritu, agu i sangi. I es três sta di akordu.
9 Si nu ta seta tistimunhu di ómi, tistimunhu di Deus é más grandi inda. Pamodi kel-li é tistimunhu di Deus: kel tistimunhu ki el da sobri se Fidju.
10 Ken ki ta poi fé na Fidju di Deus ten tistimunhu déntu di el. Ken ki ka ten fé na Deus ta txoma-l di mintirozu, pamodi el ka poi fé na tistimunhu ki Deus da sobri se Fidju.
11 I kel-li é kel tistimunhu: Deus da-nu vida pa tudu ténpu i es vida sta na se Fidju.
12 Ken ki ten Fidju ten es vida. Ken ki ka ten Fidju di Deus ka ten es vida.
13 N sta skrebe nhos kes kuza li, asi pa nhos sabe ma nhos ten vida pa tudu ténpu, anhos ki poi fé na nómi di Fidju di Deus.
14 I kel-li é kunfiansa* ki nu ten na el: ka ta inporta kuzê ki nu pidi di akordu ku se vontadi, el ta obi-nu.
15 I si nu sabe ma el ta obi-nu óras ki nu ta pidi-l kalker kuza, nu sabe ma nu ta ten kes kuza ki nu pidi, dja ki é na el ki nu pidi kes kuza.
16 Si algen odja se irmon ta faze un pekadu ki ka ta leba pa mórti, el ta pidi, i Deus ta da-l vida. Kel-li é pa kes ki ka faze un pekadu ki ta leba pa mórti. Ten un pekadu ki ta leba pa mórti. N ka sta pidi ningen pa ora pa kel tipu di pekadu li.
17 Tudu injustisa é pekadu, má ten un pekadu ki ka ta leba pa mórti.
18 Nu sabe ma tudu kel ki nase di Deus ka ta kontinua ta faze pekadu, má kel* ki nase di Deus ta proteje-l, i kel Malvadu ka ta pode faze-l nada.*
19 Nu sabe ma nu ben di Deus, má mundu interu sta na puder di Malvadu.
20 I nu sabe ma Fidju di Deus ben i el da-nu intendimentu pa nu pode ganha konhisimentu di kel ki é verdaderu. I nu sta unidu ku kel ki é verdaderu, através di se Fidju, Jizus Kristu. Kel-li é kel Deus verdaderu i vida pa tudu ténpu.
21 Nhas fidju, nhos toma kuidadu ku imajen.*
Nótas di rodapé
^ Na gregu ta fla: “tudu kuza ki”.
^ Ô: “liberdadi na pâpia”.
^ Kel-li krê fla Jizus Kristu, kel Fidju di Deus.
^ Ô: “ka ta pode pega-l”.
^ Na gregu ta fla: “nhos proteje di imajen”.
