Primera di Pedru 5:1-14
5 Pur isu, ami tanbê ki é ansion, tistimunha di kes sufrimentu ki Kristu pasa i un di kes ki tanbê ta ben resebe kel glória ki ta ben mostradu, N sta faze kel pididu li* pa kes ki é ansion na nhos meiu:
2 nhos pastora ribanhu di Deus ki nhos dadu pa toma kónta, ta sirbi sima enkaregadu,* ka pamodi nhos é obrigadu, má di livri vontadi dianti di Deus. Ka pamodi amor pa ganha algun kuza ku dizonestidadi, má ku inpenhu.
3 Ka nhos manda na kes ki é eransa di Deus, má nhos bira izénplu pa ribanhu.
4 I óras ki kel pastor prinsipal mostradu, nhos ta ben resebe kel koroa di glória ki ka ta straga.
5 Di mésmu manera, nhos ki é ómis más jóven, nhos obi ku kes ómi di más idadi.* Má nhos tudu nhos bisti di umildadi* pa kunpanheru, pamodi Deus é kóntra kes orgulhozu, má el ta mostra se grandi bondadi pa kes ki é umildi.
6 Pur isu, nhos umilha dibaxu di mô poderozu di Deus, pa el pode engrandese nhos na ténpu sértu,
7 timenti nhos ta bota tudu nhos preokupason riba di el, pamodi el ta kuida di nhos.
8 Nhos ten bon juís, i nhos mante sienti! Nhos inimigu, Diabu, sta ta anda na nhos vólta sima un lion ki sta ruji, ta djobe algen pa divora.
9 Má nhos toma nhos puzison kóntra el, ku un fé firmi, pamodi nhos sabe ma nhos irmons* na mundu interu sta ta pasa pa kes mésmu sufrimentu.
10 Má, dipôs ki dja nhos sufri pa poku ténpu, kel Deus ki ta da kel grandi bondadi di tudu manera, i ki txoma nhos pa se glória pa tudu ténpu unidu ku Kristu, ta ben konpleta nhos trenu. El ta ben poi nhos ta fika firmi, el ta ben poi nhos ta fika fórti, el ta ben poi nhos riba di alisérsi firmi.
11 Puder é di sel pa tudu ténpu. Amén.
12 Através di Silvanu,* ki pa mi é un irmon fiel, N skrebe nhos ku poku palavra pa N da nhos koraji i pa N da nhos un tistimunhu sinseru ma kel-li é kel grandi bondadi di Deus di verdadi. Nhos mante firmi na el.
13 Kel mudjer* ki sta na Babilónia, i ki skodjedu sima nhos, sta manda nhos mantenha, i tanbê Markus, nha fidju.
14 Nhos kunprimenta kunpanheru ku un beju di irmon.*
Pa nhos ten pas, nhos tudu ki sta unidu ku Kristu.
Nótas di rodapé
^ Ô: “N sta da kel konsedju li”.
^ Ô: “ta djobe-l ku kuidadu”.
^ Ô: “kes ansion”.
^ Ô: “umildadi na menti”.
^ Na gregu ta fla: “família di irmons”.
^ Ki tanbê ta txomadu Silas.
^ ‘Mudjer’ pode krê fla un kongregason.
^ Na gregu ta fla: “beju di amor”.
