Primeru livru di Samuel 27:1-12
-
Filisteus da Davidi Ziklagi (1-12)
27 Má, Davidi fla na se korason: “Un dia N ta móre na mô di Saul. Midjór kuza ki N debe faze é fuji pa téra di filisteus. Asi, Saul ta dexa di djobe-m na tudu téra di Israel i N ta skapa di se mô.”
2 Nton, Davidi i kes 600 ómi ki staba djuntu ku el bai pa undi ki Akís staba. El éra fidju di Maoki, rei di Gate.
3 Davidi ku se trópas fika na Gate ku Akís. Kada un di es fika djuntu ku ses família. Davidi leba se dôs mudjer, Ainoan, di Jesriel i Abigail, ki éra di Karmelu i viúva di Nabal.
4 Kantu Saul obi ma Davidi dja fujiba pa Gate, el dexa di djobe-l.
5 Nton, Davidi fla Akís: “Si nho ta konkorda, dexa-m ba mora na un di kes sidadi ki ta fika na kanpu. Pamodi ki sérvu di nho debe mora na sidadi di rei djuntu ku nho?”
6 I na kel dia Akís da-l Ziklagi. É pur isu ki Ziklagi é di kes rei di Judá ti dia di oji.
7 Davidi vive un anu i kuatu mês na téra di filisteus.
8 Duránti kel ténpu, Davidi ta subiba ku se trópas i es ta atakaba kes jezurita, kes jirzita i kes amalekita. Es ta moraba na kel téra ki ta baba di Telon ti Sur i ta dixiba ti frontera di téra di Ijitu.
9 Óras ki Davidi ta atakaba es, el ka ta dexaba bibu nen ómi nen mudjer. El ta tomaba ses ovelha, ses vaka, ses buru, ses kamelu, ses ropa, i dipôs el ta voltaba pa Akís.
10 Óras ki Akís ta perguntaba el: “Undi ki bu ataka oji?” Davidi ta flaba: “Na sul* di Judá” ô “Na sul di téra di kes jeramelita” ô “Na sul di téra di kes kineu.”
11 Davidi ta mataba tudu ómi i mudjer, asi pa es ka lebaba ninhun di es pa Gate, pamodi el ta flaba: “Es pode ba fla: ‘É kel-li ki Davidi faze.’” (É si ki Davidi ta fazeba duránti kel ténpu ki el vive na kanpu na téra di filisteus.)
12 Akís ta kriditaba na Davidi, i el ta pensaba: ‘Di serteza se povu Israel dja bira ta odia-l, nton el ta bira nha sérvu pa tudu ténpu.’
Nótas di rodapé
^ Ô: “Negebe”.
