Primeru livru di Samuel 3:1-21
-
Samuel txomadu pa ser proféta (1-21)
3 Timenti Samuel staba pikinoti, el staba ta sirbi Jeová dibaxu di orientason di Eli. Má na kes ténpu éra poku algen ki ta resebeba mensajen di Jeová i tanbê éra poku algen ki staba ta resebe vizon di Deus.
2 Un dia, Eli staba detadu na se kuartu. Se vista dja staba fraku i el ka staba ta odja dretu,
3 i Samuel staba ta durmi na ténplu di Jeová. Na kel ténpu, Arka di Deus ta staba na ténplu* i kandelabru* di Deus staba sendedu.
4 Nton, Jeová txoma Samuel i el responde: “Ale-m li.”
5 El kóre, el bai na Eli i el fla-l: “Ale-m li. Nho txoma-m?” Má Eli fla-l: “N ka txoma-u. Torna ba deta.” Nton, el bai i el deta.
6 Jeová torna txoma-l: “Samuel!” Nton, Samuel labanta, el bai na Eli i el fla-l: “Ale-m li, sinhor. Nho txoma-m?” Má Eli fla-l: “N ka txoma-u, nha fidju. Ba deta otu bês.”
7 (Samuel inda ka konxeba Jeová i inda el ka resebeba ninhun mensajen di Jeová.)
8 Nton, Jeová txoma-l pa tirseru bês: “Samuel!” El labanta, el bai na Eli i el fla-l: “Ale-m li, sinhor. Nho txoma-m?”
Nton, Eli da kónta ma éra Jeová ki staba ta txoma Samuel.
9 Pur isu, Eli fla Samuel: “Ba deta. Si el torna txoma-u, bu debe fla: ‘Pâpia Jeová, pamodi bu sérvu sta ta obi.’” Nton, Samuel ba deta na se kuartu.
10 Dipôs, Jeová torna txoma Samuel sima di kes otu bês: “Samuel, Samuel!” Nton, Samuel fla: “Pâpia, pamodi bu sérvu sta ta obi.”
11 Jeová fla Samuel: “N sta ben faze un kuza na Israel ki kalker algen ki obi ta fika ku bóka abértu.
12 Na kel dia, N ta ben faze tudu kes kuza ki N fla kóntra Eli i kóntra se família.
13 I bu ten ki fla-l ma N sta ben faze un julgamentu kóntra se família pa tudu ténpu, pamodi kel éru li: el sabe dretu ma se fidjus ka sta ta ruspeta-m,* i el ka sta faze nada pa koriji-s.
14 É pamodi kel-li ki N jura ma pekadu di família di Eli ka ta pagadu nunka más, nen ku sakrifisiu nen ku oférta.”
15 Samuel fika detadu ti palmanhan. Nton, kantu el labanta el abri kes pórta di kaza di Jeová. Samuel staba ku medu di konta Eli kel vizon ki el tevi.
16 Má Eli txoma Samuel: “Samuel, nha fidju!” El responde-l: “Ale-m li.”
17 Eli pergunta-l: “Kuzê ki el fla-u? Favor, ka bu sukundi-m nada. Pa Deus kastiga-u duru si bu sukundi-m sô un palavra di tudu kuza ki el fla-u.”
18 Nton, Samuel konta-l tudu kuza i el ka sukundi-l nada. Eli fla: “É Jeová. Dexa-l faze kel ki el ta atxa ma é dretu.”
19 Samuel kontinua ta kria i Jeová staba ku el. Deus faze* tudu kes kuza ki Samuel fla.
20 Tudu algen na Israel, di Dan ti Berseba, fika ta sabe ma Jeová skodje Samuel pa ser proféta.
21 Jeová kontinua ta fla Samuel se mensajen na Silu. É si ki Samuel fika ta konxe Jeová.
Nótas di rodapé
^ Kel-li krê fla tabernáklu.
^ Na ebraiku ta fla: “lánpida”.
^ Na ebraiku ta fla: “sta ta maldisua Deus”.
^ Na ebraiku ta fla: “Deus ka dexa kai na txon nada ki el fla”.
