Primera Tesalonisensis 3:1-13
3 Nton, kantu nu ka ta pode aguentaba más, nu atxa ma ta sérba midjór pa nu fikaba nos sô na Atenas,
2 i nu manda nhos Timótiu, nos irmon i sérvu* di Deus ki ta prega kes notísia sábi sobri Kristu, pa poi nhos ta fika firmi* i konsola nhos na nhos fé,
3 asi pa ningen ka fika fraku* pamodi kes prubléma li. Pamodi nhos sabe ma nu ka ta pode ivita sufri kes kuza li.*
4 Pamodi kantu nu staba ku nhos, nu ta kustuma avizaba nhos ma nu ta pasaba pa prublémas, i é kel-li ki sta ta kontise sima nhos sabe.
5 É pur isu, ki kantu N ka staba ta aguenta más, N manda Timótiu pa sabe di nhos lialdadi, pamodi N staba ku medu ma kel Tentador ta tentaba nhos di algun manera, i nos trabadju duru ta fikaba atoa.
6 Má Timótiu kaba di txiga dipôs di vizita nhos i el da-nu bons notísia sobri nhos lialdadi i nhos amor. Tanbê el fla ma sénpri nhos sta ta lenbra di nos ku karinhu i ma nhos tene txeu vontadi di odja-nu, sima nos tanbê nu tene vontadi di odja nhos.
7 É pur isu irmons, ki na tudu nos frónta* i prubléma, nu konsoladu pamodi nhos i pamodi lialdadi ki nhos mostra.
8 Pamodi nu ta xinti animadu* si nhos mante firmi na Sinhor.
9 Modi ki nu ta pode agradese Deus pa nhos i pa kel grandi alegria ki nhos pô-nu ta xinti dianti di nos Deus?
10 Dia ku noti nu ta inplora* ku tudu nos forsa pa nu pode odja nhos* otu bês i pa konpleta kel ki sta falta na nhos fé.
11 Pa Deus, nos Pai, i nos Sinhor Jizus abri-nu kaminhu pa nu ba vizita nhos.
12 Tanbê, pa Sinhor poi nhos ta omenta, sin, ta fika xeiu di amor pa kunpanheru i pa tudu algen, sima nos nu sta xeiu di amor pa nhos,
13 asi pa el poi nhos korason ta fika firmi, sen kulpa i santu dianti di Deus, nos Pai, duránti prezénsa di nos Sinhor Jizus djuntu ku tudu se sérvus santu.
Nótas di rodapé
^ Ô: “ministru”. Ô talvês: “kolaborador”.
^ Ô: “da nhos forsa”.
^ Na gregu ta fla: “balansadu”.
^ Ô: “nu sta diziginadu pa kel-li”.
^ Na gregu ta fla: “nisisidadi”.
^ Na gregu ta fla: “nu ta vive”.
^ Ô: “faze súplika”.
^ Na gregu ta fla: “nhos róstu”.
