Primera Tesalonisensis 5:1-28
5 Irmons, sobri kes dia ô kes ténpu ki Deus skodje, nu ka meste skrebe nhos nada.
2 Pamodi nhos sabe dretu ma dia di Jeová* ta ben izatamenti sima un ladron di noti.
3 Óras ki pesoas sta ta fla: “Pas i suguransa!”, nton, distruison ta ben riba di es dirapenti, sima óras ki mudjer grávida ta xinti dór di ten fidju, i di ninhun manera es ka ta skapa.
4 Má anhos irmons, nhos ka sta na sukuru, asi pa kel dia ka panha nhos sima lus di dia ta panha un ladron,
5 pamodi nhos tudu é fidjus di lus i fidjus di dia. Nos é ka fidjus di noti nen di sukuru.
6 Pur isu, ka nu fika ta durmi sima kes otu algen ta faze, má nu fika kordadu i nu mante sienti.
7 Pamodi kes ki ta durmi, ta durmi di noti, i kes ki ta fika moku, ta fika moku di noti.
8 Má nos, ki é fidjus di dia, nu mante sienti i nu poi kel koleti di fé i di amor, i nu poi nos speransa di salvason sima un kapaseti,
9 pamodi Deus ka skodje-nu pa nu sufri se raiba, má pa nu ganha salvason através di nos Sinhor Jizus Kristu.
10 El móre pa nos, asi ô nu sta kordadu ô nu sta durmi,* pa nu vive djuntu ku el.
11 Pur isu, nhos kontinua ta da kunpanheru koraji* i ta djuda kunpanheru, sima na verdadi nhos sta ta faze.
12 Gósi irmons, nu ta pidi nhos pa nhos ruspeta kes ki ta trabadja duru na nhos meiu, ki ta orienta* nhos na Sinhor i ki ta konsedja nhos.
13 Nhos ten txeu konsiderason pa es i nhos trata-s ku amor pamodi trabadju ki es ta faze. Nhos vive na pas ku kunpanheru.
14 Tanbê irmons, nu krê rekumenda nhos pa nhos da kes dizobidienti konsedju,* pa nhos konsola kes ki sta diprimidu,* pa nhos djuda kes ki sta fraku i pa nhos ten paxénxa ku tudu algen.
15 Nhos toma kuidadu pa ningen ka paga mal ku mal, má nhos sforsa sénpri pa nhos faze kel ki é dretu pa kunpanheru i pa tudu algen.
16 Nhos sta sénpri kontenti.
17 Nhos faze orason sénpri.
18 Nhos agradese pa tudu kuza. Kel-li é vontadi di Deus pa nhos ki é sigidoris di Kristu Jizus.
19 Ka nhos paga lumi di spritu.
20 Ka nhos dispreza kes profesia.
21 Nhos djobe dretu tudu kuza. Nhos pega na kel ki é bon.
22 Nhos ivita tudu tipu di maldadi.
23 Pa kel Deus di pas santifika nhos na tudu kuza. Irmons, pa nhos spritu, alma* i korpu, kontinua sen kulpa i sen difeitu na tudu sentidu duránti prezénsa di nos Sinhor Jizus Kristu.
24 Kel ki sta ta txoma nhos é fiel, i di serteza el ta ben faze-l.
25 Irmons, nhos kontinua ta ora pa nos.
26 Nhos kunprimenta tudu kes irmon ku un beju santu.
27 Na nómi di Sinhor nu sta ta pidi nhos pa es karta ledu pa tudu kes irmon.
28 Pa kel grandi bondadi di nos Sinhor Jizus Kristu sta ku nhos.
Nótas di rodapé
^ Ô: “durmi na mórti”.
^ Ô: “ta konsola kunpanheru”.
^ Ô: “toma kónta di”.
^ Ô: “konsedju ku firméza”.
^ Ô: “dizanimadu”. Na gregu ta fla: “kes ki ten poku alma”.
^ Ô: “vida”. Djobe Disionáriu di Bíblia.
