Sugunda Koríntius 1:1-24
1 Di Paulu, apóstlu di Kristu Jizus di akordu ku vontadi di Deus, i di Timótiu nos irmon, pa kongregason di Deus na Korintu i pa tudu kes santu ki sta na Akaia interu:
2 Pa Deus, nos Pai, i pa Sinhor Jizus Kristu mostra nhos grandi bondadi i da nhos pas.
3 Pa kel Deus i Pai di nos Sinhor Jizus Kristu lovadu. El é Pai xeiu di mizerikórdia i Deus di tudu konsolu,
4 ki ta konsola-nu* na tudu nos prubléma,* asi ku kel konsolu ki nu ta resebe di Deus, nu pode konsola otus, ka ta inporta ki prubléma* ki es sta pasa pa el.
5 Sima nu ta sufri txeu kuza pamodi nu ta sigi Kristu, tanbê nu ta resebe txeu konsolu pamodi Kristu.
6 Si nu sta pasa pa prubléma,* é pa konsola nhos i pa salva nhos. I si nu sta ta konsoladu é pa konsola nhos. Es konsolu sta ta djuda nhos aguenta kes mésmu sufrimentu ki nu sta pasa pa el tanbê.
7 Nu ten tudu kunfiansa na nhos, pamodi nu sabe ma sima nhos sta pasa pa kes mésmu sufrimentu ki nos, tanbê nhos ta resebe kel mésmu konsolu ki nos.
8 Irmons, nu ka krê pa nhos fika sen sabe di kes prubléma ki nu pasa na pruvínsia di Ázia. Nu sufri txeu, más ki kel ki nu ta pode aguentaba, i ti nu fika ta pensa si nu ta moreba ô nau.
9 Na verdadi, nu xinti sima ki nu kondenadu pa móre. Kel-li kontise pa nu ka kunfiaba na nos kabésa, má na Deus ki ta resusita* mortus.
10 El libra-nu di un grandi prigu di mórti, i el ta torna ben libra-nu. I nu ten speransa na el ma el ta kontinua ta libra-nu.
11 Tanbê nhos pode djuda-nu óras ki nhos ta ora pa nos. Pamodi si txeu algen pidi pa nos, Deus ta obi i el ta djuda-nu, i pamodi kel-li txeu algen ta ben agradese.
12 Pamodi nu ta xinti orgulhu di kel-li: nos konsénsia ta da tistimunhu ma nu sta ta konporta na mundu, i inda más ku nhos, ku santidadi i ku sinseridadi ki ta ben di Deus, ka ku sabedoria di ómi, má ku kel grandi bondadi di Deus.
13 Pamodi na verdadi, nu ka sta skrebe nhos nada ki nhos ka ta pode lé* i intende, i N ta spera ma nhos ta kontinua ta intende dretu* kes kuza li,
14 sima tanbê nhos intende, ti sértu pontu, ma nos é razon pa nhos xinti orgulhu, sima tanbê nhos ta ben ser pa nos na dia di nos Sinhor Jizus.
15 Asi, ku kel kunfiansa li, N staba ta faze planu pa N ba vizita nhos primeru, asi pa nhos fikaba kontenti pa sugundu bês.*
16 Pamodi N faze planu na ba vizita nhos na kaminhu pa Masedónia, i óras ki N ta volta di Masedónia, pa nhos kunpanhaba mi párti di kaminhu pa Judea.
17 Kantu N toma kel disizon li, N ka pâpia sô pa pâpia. Nen N ka staba ta pensa na faze di akordu ku nha vontadi, asi pa N fla “sin, klaru ki sin” i dipôs pa N fla “nau, klaru ki nau”.
18 Sima Deus é di kunfiansa, nos palavras é di kunfiansa tanbê, nu ka ta fla “sin” i omésmu ténpu “nau”.
19 Tanbê Fidju di Deus, Jizus Kristu, ki ami, Silvanu* i Timótiu, pâpia ku nhos sobri el, ka ta fla “sin” i dipôs “nau”, má envês di kel-li, kel “sin” ki el fla sénpri ta ser “sin”.
20 Pamodi ka ta inporta kantu promésa ki Deus faze, es ta bira “sin” através di el. Pur isu tanbê, através di el nu ta fla “amén” pa Deus, i kel-li ta da-l glória através di nos.
21 Má, kel ki ta da-nu garantia ma nhos i nos é di Kristu, i kel ki skodje-nu, é Deus.
22 Tanbê, el poi se sélu riba nos i el da-nu un garantia di kel ki ta ben,* ki é spritu, na nos korason.
23 N ta txoma Deus pa ser tistimunha kóntra mi* ma inda N ka bai pa Korintu sô pamodi N ka krê poi nhos ta xinti más piór.
24 É ka pamodi nos é dónu di nhos fé, má nu ta kolabora pa nhos ten alegria, dja ki é pamodi nhos fé ki nhos sta di pé.
Nótas di rodapé
^ Ô: “inkoraja-nu”.
^ Ô: “tribulason”.
^ Ô: “tribulason”.
^ Ô: “tribulason”.
^ Na gregu ta fla: “labanta”.
^ Ô talvês: “ki nhos ka sabe dretu”.
^ Na gregu ta fla: “ti fin”.
^ Ô talvês: “pa nhos traba pruvetu dôs bês”.
^ Ki tanbê ta txomadu Silas.
^ Ô: “sinal di pagamentu; un entrada pa garanti kel ki ta ben”.
^ Ô: “nha alma”.
