Sugunda Koríntius 10:1-18
10 Má gósi, ami Paulu, ki alguns di nhos ta fla ma é umildi óras ki N sta ku nhos, má duru óras ki N ka sta ku nhos, N ta inplora nhos pa brandura i bondadi di Kristu.
2 N ta spera ma óras ki N bai djobe nhos, N ka ta ba lida di un manera duru ku kes ki ta pensa ma nu sta ta anda sima algen di es mundu ta anda.
3 Pamodi, enbóra nu ta vive na es mundu,* nu ka ta luta sima pesoas di mundu.
4 Pamodi kes arma di nos luta é ka di es mundu, má es é armas poderozu ki Deus da-nu pa ronba kes fortaléza.
5 Pamodi nu sta ta ronba ideias falsu i tudu barera ki ta labanta kóntra konhisimentu di Deus, i nu sta ta poi tudu pensamentu prézu, pa pô-l ta obi ku Kristu.
6 I nu sta priparadu pa kastiga tudu dizobidiensa, lógu ki nhos mostra ma nhos obidiensa é konplétu.
7 Nhos ta julga kuzas pa kel ki es ta parse. Si algen ten serteza ma el é di Kristu, el debe pensa otu bês na kel-li: sima el é di Kristu, nos tanbê nos é di Kristu.
8 Pamodi mésmu si N xintiba un bokadinhu más di orgulhu di autoridadi ki Sinhor da-nu pa da nhos koraji, envês di dizanima nhos, N ka ta xintiba vergónha.
9 Má N ka krê poi nhos ta pensa ma N sta ta tenta poi nhos medu ku nhas karta.
10 Pamodi alguns algen ta fla: “Se kartas ten pézu i forsa, má se prezénsa é fraku i se palavra ka ten valor.”
11 Pa kel ómi sabe ma kel ki nu ta fla* na kes karta óras ki nu ka sta la, tanbê é kel ki nu ta ba faze óras ki nu bai djobe nhos.
12 Pamodi nu ka krê ser igual ô konpara ku alguns ki ta rekumenda ses kabésa. Má óras ki es ta julga di akordu ku ses opinion i es ta konpara ses kabésa ku es mê, es ta mostra ma es ka ten intendimentu.
13 Nu ka ta xinti orgulhu di kuzas ki fazedu fóra di tiritóriu ki nu dadu, má nu ta xinti orgulhu sô di tiritóriu ki nu resebe di Deus,* i kel-li ta inklui tanbê prega pa nhos.
14 Na verdadi, nu ka faze nada ki Deus ka dizigina-nu pa nu faze kantu nu txiga na nhos, má nos é kes primeru ki pâpia ku nhos di kes notísia sábi sobri Kristu.
15 Nau, nu ka ta xinti orgulhu fóra di kes tiritóriu ki nu dadu, kel-li krê fla xinti orgulhu di trabadju di otus algen, má nu ta spera ma sima nhos fé ta kontinua ta kria, kel trabadju ki nu ta faze ta kontinua ta kria, déntu di nos tiritóriu. Nton nu ta pode faze más txeu,
16 asi nu ta pode prega kes notísia sábi na kes lugar ki é más lonji ki di nhos. Di kel manera li, nu ka ta xinti orgulhu di kuzê ki otus dja faze na ses tiritóriu.
17 “Má ken ki xinti orgulhu, pa el xinti orgulhu di Jeová.”*
18 Pamodi ken ki ta aprovadu é ka kel ki ta rekumenda se kabésa, má é kel ki Jeová* ta rekumenda.
Nótas di rodapé
^ Na gregu ta fla: “na karni”.
^ Na gregu ta fla: “kel ki nos é na palavra”.
^ Ô: “ki Deus reparti pa medida”.
