Sugunda Koríntius 11:1-33
11 Enbóra N sta parse sima un algen tolu, N ta gostaba pa nhos aguentaba mi. Má na verdadi, nhos sta ta aguenta-m!
2 Pamodi N tene siumis di nhos, un siumis sima di Deus,* pamodi N promete nhos na kazamentu sô pa un maridu, pa N pode aprizenta nhos sima un vírjen pura pa Kristu.
3 N tene medu ma, sima kóbra ingana Eva ku se spertéza, algen pode straga nhos menti i poi nhos ta afasta di sinseridadi i puréza ki nu debe mostra pa Kristu.
4 Pamodi si algen ben i el prega un Jizus diferenti di kel ki nu pregaba, ô si nhos resebe un spritu diferenti di kel ki nhos resebeba ô notísias sábi diferenti di kes ki nhos setaba, nhos ta tolera-l.
5 Pamodi N ta atxa ma mi é ka ménus ki nhos super-apóstlus na ninhun kuza.
6 Má, mésmu si N ka ta pâpia dretu, di serteza N ten konhisimentu. Na verdadi nu dexa kel-li klaru pa nhos di tudu manera i na tudu kuza.
7 N fika kontenti di pâpia di kes notísia sábi di Deus pa nhos sen ninhun rekonpénsa. Má N faze un pekadu pamodi N rabaxa pa nhos pode resebe ónra?
8 É sima ki N furta kes otu kongregason kantu N seta ses ajuda material* pa N sirbi nhos.
9 Má kantu N staba ku nhos i N pasa nisisidadi, N ka bira un karga pa ningen, pamodi kes irmon ki ben di Masedónia djuda-m na tudu nhas nisisidadi. Sin, N faze tudu kel ki N pode pa N ka ser un karga pa nhos i N ta kontinua ta faze-l.
10 Timenti mi é un sigidor di Kristu, ka ten nada ki ta inpidi-m di xinti orgulhu sobri kel-li na tudu Akaia.
11 Pamodi? Pamodi N ka ta ama nhos? Deus sabe ma N ta ama nhos.
12 Má, kuzê ki N sta ta faze, N ta kontinua ta faze, asi pa kaba ku diskulpa di kes ki ta djobe un motivu pa ser sima nos na kes kuza ki es ta xinti orgulhu di es.
13 Pamodi kes ómi li, es é apóstlus falsu, trabadjadoris ki ta ingana otus algen i ki ta finji ma es é apóstlus di Kristu.
14 I N ka ta fika dimiradu, pamodi mésmu Satanás ta finji ma el é anju di lus.
15 Pur isu, nu ka ta fika dimiradu ma se sérvus tanbê ta finji ma es é sérvus di justisa. Má ses fin ta ben ser di akordu ku kel ki es faze.
16 N ta fla nhos otu bês: pa ningen ka pensa ma mi é tolu. Má si nhos ta pensa kel-li, nton nhos seta-m sima un algen tolu, asi pa N pode tanbê ingaba un bokadinhu.
17 Kuzê ki N sta ta fla gósi, N ka sta fla-l ta sigi izénplu di Sinhor, má sima un algen tolu, ki ta kunfia na se kabésa i ki ta ingaba.
18 Dja ki txeu algen sta ta ingaba di kuzas di es mundu,* ami tanbê N ta ingaba.
19 Dja ki nhos ten txeu “sabedoria”, nhos ta fika kontenti di aguenta kes ki é tolu.
20 Na verdadi, nhos ta aguenta kalker algen ki ta faze nhos di skravu, kalker algen ki ta pruveta di nhos, kalker algen ki ta toma nhos kel ki nhos ten, kalker algen ki ta engrandese riba nhos, kalker algen ki ta da nhos na róstu.
21 Pa nos é un vergónha fla kel-li, dja ki pode parse ma nos é fraku.
Má si otus algen ka ta xinti vergónha di ingaba, nton ami tanbê N ka ta xinti vergónha di ingaba, mésmu si algen ta atxa ma mi é tolu.
22 Es é ebreu? Ami tanbê. Es é israelita? Ami tanbê. Es é disendenti* di Abraon? Ami tanbê.
23 Es é sérvu di Kristu? N ta responde sima un algen dodu: ami é mutu más inda. N trabadja más txeu, N podu na kadia más txeu, N sotadu txeu bês ki ka ta da nen pa konta i txeu bês N staba na prigu di móre.
24 Sinku bês N resebe di judeus 40 xikotada ménus un,
25 N sotadu três bês ku vara, un bês N dadu ku pédra, três bês N staba na barku ki inkadja, N pasa un noti i un dia na meiu di mar.
26 N faze txeu viajen, N staba na prigu pamodi rius, na prigu pamodi ladrons, na prigu pamodi nha própi povu, na prigu pamodi nasons, na prigu na sidadi, na prigu na dizértu, na prigu na mar, na prigu na meiu di irmons falsu,
27 N trabadja duru i ku txeu sforsu, N pasa txeu noti sen durmi, ku fómi i ku sedi, txeu bês sen nada pa kume, ku friu i sen nada pa bisti.*
28 Alén di tudu kes kuza li, tudu dia N ten un pézu na mi:* kel preokupason pamodi tudu kongregason.
29 Óras ki un algen sta fraku, ami tanbê N ka ta sta fraku? Óras ki un algen tropesa, ami tanbê N ka ta fika xatiadu?
30 Si N ten ki ingaba, N ta ingaba di kes kuza ki ta mostra nha frakéza.
31 Kel Deus i Pai di Sinhor Jizus, Kel ki ten ki lovadu pa tudu ténpu, sabe ma N ka sta konta mintira.
32 Na Damasku, kel governador ki staba dibaxu di rei Aretas poi guarda na sidadi pa prende-m,
33 má es dixi-m na un sestu* pa un janéla na muralha di sidadi i N skapa di se mô.
Nótas di rodapé
^ Na gregu ta fla: “un zelu di Deus”.
^ Ô: “ses apoiu”.
^ Na gregu ta fla: “di akordu ku karni”.
^ Na gregu ta fla: “simenti”.
^ Na gregu ta fla: “i nu”.
^ Ô: “tudu dia ten kel preson ki N ta infrenta”.
^ Ô: “sestu transadu”.
