Sugunda Koríntius 5:1-21
5 Pamodi nu sabe ma si nos kaza na téra, es ténda, ta ser distruídu,* Deus ta ben da-nu un lugar pa tudu ténpu na séu, un kaza ki é ka mô di ómis ki faze.
2 Pamodi nu ta jeme na es kaza,* ku txeu vontadi di bisti di kel ki é pa nos,* ki ta ben di séu,*
3 asi, pa óras ki nu bisti-l pa nu ka atxadu nu.
4 Na verdadi, nos ki sta na es ténda, nu ta jeme frontadu, pamodi nu ka krê duspi di el, má nu krê bisti di kel otu, asi pa vida inguli kel ki ta móre.
5 Má ken ki pripara-nu pa kel-li é Deus, ki da-nu spritu sima un garantia di kel ki sta pa ben.*
6 Nton, sénpri nu ten serteza di kel-li i nu sabe ma timenti nu ta mora* na korpu, nu sta lonji di Sinhor.
7 Pamodi nu ta anda pa fé, ka pa kel ki nu ta odja.
8 Má nu ten serteza di kel-li i nu ta prifiri sta lonji di korpu i mora ku Sinhor.
9 Ô nu mora ku el ô nu sta lonji di el, nos obijetivu é agrada-l.
10 Pamodi nos tudu nu debe aprizenta* dianti di tribunal di Kristu, asi pa kada un resebe kel ki el merese, pa kes kuza bon ô mau* ki el faze timenti el staba na korpu.
11 Pur isu, dja ki nu sabe kuzê ki é ten grandi ruspetu pa Sinhor, nu ta kontinua ta konvense ómis, má Deus konxe-nu dretu. N ta spera ma nhos tanbê nhos ta rekonhese ki tipu di algen ki nos é.
12 Nu ka sta ta rekumenda nos kabésa pa nhos otu bês, má nu sta ta insentiva nhos pa pâpia di nos ku orgulhu, asi pa nhos konsigi responde kes ki ta xinti orgulhu di kuzê ki otus ta odja envês di kel ki sta na korason.
13 Pamodi si nu perde juís, foi pa Deus; si nu ten juís, é pa nhos.
14 Amor di Kristu ta obriga-nu, pamodi nu txiga kel konkluzon li: sô un ómi móre pa tudu algen, na verdadi, tudu algen dja moreba.
15 I el móre pa tudu algen, asi pa kes ki vive ka kontinua ta vive pa ses kabésa, má pa kel ki móre pa es i ki resusitadu.*
16 Pur isu, di gósi pa dianti nu ka ta julga ningen sô pa kel ki nu ta odja. I si antis nu odjaba Kristu di kel manera li, dja nu ka sta faze si más.
17 Nton, si algen sta unidu ku Kristu, el é un kriason novu. Kes kuza antigu dja pasa. Nhos odja! Kes kuza novu dja bira ta izisti.
18 Má tudu kel-li ta ben di Deus, ki faze-nu pas ku el mê através di Kristu i el da-nu kel trabadju di djuda otus algen faze pas ku el.
19 Kel-li krê fla ma Deus sta ta uza Kristu pa poi pesoas ta faze pas ku el, i el ka sta leba en kónta ses pekadu, i el da-nu kel trabadju di leba es mensajen di faze pas.
20 Pur isu, nos é enbaxador na lugar di Kristu, sima si Deus staba ta inplora através di nos. Dja ki nu sta na lugar di Kristu, nu ta inplora: “Nhos faze pas ku Deus.”
21 Kel ki ka faze pekadu, Deus bira-l pekadu* pa nos, asi pa através di el nu pode bira justisa di Deus.
Nótas di rodapé
^ Ô: “ta disfazedu”.
^ Ô: “morada”.
^ Ô: “bisti di nos morada”.
^ Ô: “nos morada na séu”.
^ Ô: “sinal di pagamentu; un entrada pa garanti kel ki ta ben”.
^ Na gregu ta fla: “timenti nu ten nos kaza”.
^ Ô: “mostradu”.
^ Ô: “nojéntu”.
^ Na gregu ta fla: “labantadu”.
^ Ô: “oférta pa pekadu”.
