Sugunda di Pedru 3:1-18
3 Nhas irmon ki N krê txeu, kel-li é kel sugundu karta ki N sta ta skrebe nhos gósi, i na el, sima na kel primeru, N sta lenbra nhos di kes kuza ki ta djuda nhos uza nhos kapasidadi di pensa di manera klaru,
2 asi pa nhos lenbra di kes kuza ki kes proféta santu flaba antis, i di kel mandamentu di Sinhor i Salvador, ki el fla através di nhos apóstlus.
3 Primeru di tudu, nhos fika ta sabe ma na ténpu di fin, ta ben parse kes algen ki ta faze trósa i es ta ben trosa di akordu ku ses própi dizeju.
4 Es ta ben fla: “Undi ki sta se prezénsa ki prometedu? Pamodi désdi dia ki nos gentis grandi durmi na mórti, tudu kuza sta kontinua sima staba désdi komésu di kriason.”
5 Es ta iginora kel verdadi li di propózitu: dja ten txeu ténpu ki séu izisti i através di palavra di Deus, téra siparadu di agu i na meiu di agu.
6 I através di kes kuza li, mundu di kel ténpu distruídu kantu agu kubri téra interu.
7 Má pa kel mésmu palavra, kel séu i kel téra ki ta izisti gósi, sta ta guardadu pa lumi i es sta ta guardadu ti kel dia di julgamentu i di distruison di kes algen mau.
8 Má, nhas irmon ki N krê txeu, ka nhos skese di kel verdadi li: pa Jeová* un dia é sima mil anu i mil anu é sima un dia.
9 Jeová* ka ta atraza na kunpri se promésa, sima alguns algen ta pensa, má el ten paxénxa ku nhos pamodi el ka krê pa ningen ser distruídu, má el krê pa tudu algen rapende.
10 Má dia di Jeová* ta ben sima un ladron, i na kel dia séu ta ben dizaparse ku un strondu,* i kes kuza ki ten na séu i na téra ta sta kenti dimás i es ta ben disfazedu, i téra i kes óbra ki ten na el ta ben diskubridu.
11 Dja ki tudu kes kuza li ta ben disfazedu di kel manera li, nhos pensa na ki tipu di algen ki nhos debe ser. Nhos debe ser algen ki ta konporta di manera santu i ki ta faze kuzas ki ta mostra ma nhos ta adora Deus,
12 timenti nhos sta spera i nhos sta ku xintidu na* prezénsa di dia di Jeová,* undi ki séu ta ser distruídu ku lumi i kes kuza ki ten na séu ku na téra ta ben direte pamodi kalor fórti!
13 Má ta ben ten un séu novu ku un téra novu ki nu sta ta spera sima el promete, i na es ta ben ten justisa.
14 Pur isu, nhas irmon ki N krê txeu, dja ki nhos sta ta spera kes kuza li, nhos faze tudu kel ki nhos ta pode pa na fin el atxa nhos sen mantxa, sen difeitu i na pas.
15 Tanbê, nhos pensa ma paxénxa di nos Sinhor siginifika salvason, sima tanbê nos irmon Paulu ki nu krê txeu, skrebe nhos di akordu ku sabedoria ki el dadu.
16 El pâpia di kes kuza li na tudu karta ki el skrebe. Má alguns di kes kuza ki sta na es é difísil di intende, i kes iginoranti* i kes ki sta fraku na fé* sta ta distorse-s, sima es ta faze tanbê ku kes otu párti di Skrituras, pa ses própi distruison.
17 Pur isu, nhas irmon ki N krê txeu, dja ki nhos sabe di kes kuza li, nhos toma kuidadu pa nhos ka disviadu pamodi éru di kes algen mau i pa nhos ka perde nhos firméza na fé.
18 Má, nhos kontinua ta kria na kel grandi bondadi i na konhisimentu di nos Sinhor i Salvador Jizus Kristu. Pa el dadu glória gósi i tanbê pa tudu ténpu. Amén.
Nótas di rodapé
^ Kel-li krê fla ku barudju di un kuza ki ta pasa faxi.
^ Ô: “nhos sta dizeja ku txeu vontadi”. Na gregu ta fla: “poi ta ben más faxi”.
^ Ô: “kes ki ka inxinadu”.
^ Ô: “ki inda ka sta firmi”.
