Sugundu livru di Samuel 1:1-27
1 É kel-li ki kontise dipôs ki Saul móre. Davidi volta dipôs ki el ganha géra kóntra kes amalekita, i el fika dôs dia na Ziklagi.
2 Na tirseru dia, un ómi ben di kanpamentu di Saul ku se ropa ratxadu i ku téra na kabésa. Kantu el txiga pértu di Davidi, el inbaxa ku róstu pa txon.
3 Davidi pergunta-l: “Di undi ki bu ben?” El responde: “N skapa di kanpamentu di Israel.”
4 Davidi pergunta-l: “Kuzê ki kontise? Fla-m favor.” Nton, el fla-l: “Kes trópa di Israel fuji di géra i txeu di es panha pankada i es móre. Ti mésmu Saul i se fidju Jonatan móre.”
5 Nton, Davidi pergunta kel ómi ki leba kel notísia: “Modi ki bu sabe ma Saul ku se fidju Jonatan, móre?”
6 Kel ómi fla-l: “Pur akazu N staba na monti Jilboa, i N odja Saul ta aguenta na se lansa, i kes karu di géra i kes ómi ki staba montadu na kabalu staba ta txiga pértu di el.
7 Kantu el djobe pa tras, el odja-m, el txoma-m i N fla-l: ‘Ale-m li!’
8 El pergunta-m: ‘Abo é kenha?’ N responde-l: ‘Ami é amalekita.’
9 Nton, el fla-m: ‘Favor, txiga pértu mi i mata-m, pamodi N sta ta sufri txeu, má inda N ka móre.’
10 Pur isu, N txiga pértu di el i N mata-l, pamodi N sabia ma el ka ta konsigi skapaba dipôs ki es da-l pankada gravi. Nton, N tra-l koroa* di se kabésa i kel pulsera ki el tinha na brasu, i N traze-s pa nho.”
11 Kantu Davidi obi kel-li, el ratxa se ropa i tudu kes ómi ki staba djuntu ku el faze mésmu kuza.
12 Es kumesa ta txora i ta lamenta, i es faze jejun ti noti pa Saul, pa se fidju Jonatan, pa povu di Jeová i pa kaza di Israel, pamodi spada mata-s.
13 Davidi pergunta kel ómi ki traze kel notísia: “Abo é di undi?” El fla: “Ami é fidju di un amalekita ki ben mora na Israel.”
14 Davidi fla-l: “Pamodi ki bu ka xinti medu di labanta bu mô pa mata kel algen ki Jeová skodje?”
15 Nton, Davidi txoma un di se trópa i el fla-l: “Ben i mata kel ómi li.” Nton, kel trópa da-l ku spada i el móre.
16 Davidi fla kel ómi: “Abo é kulpadu pa bu própi mórti,* pamodi bu própi bóka kondena-u, kantu bu fla: ‘N mata kel algen ki Jeová skodje.’”
17 Dipôs, Davidi kanta un múzika tristi pa Saul i pa se fidju Jonatan,
18 i el fla ma es debe inxinaba povu di Judá kel múzika. Kel múzika tristi txomaba “Kel Arku”, i el sta skrebedu na livru di Jazar. El ta fla:
19 “Ai Israel, bu beléza dja móre riba di bus monti.
Kes ómi balenti dja kai!
20 Ka nhos konta kel-li na Gate,Ka nhos da avizu di kel-li na kes rua di Askalon,Asi pa kes fidju-fémia di filisteus ka fika kontenti,I pa kes fidju-fémia di kes ómi ki ka sirkunsidadu ka grita di alegria.
21 Ó montis di Jilboa,Pa txuba nen orbadju ka kai riba nhos,Nen pa nhos txon ka da ninhun kumida ki pode oferesedu pa Deus,Pamodi é la ki mantxadu kes skudu di kes ómi balenti,I ningen más ka ta pasa óliu na skudu di Saul.
22 Jonatan éra bon na uza se flexa,I Saul sénpri ganha géra ku se spada,Es tra sangi di ses inimigu i gordura di kes ómi balenti.
23 Saul i Jonatan, pesoas ta amaba nhos i es kreba nhos txeu kantu nhos staba bibu,Nen na mórti nhos ka siparadu.
Nhos éra más rápidu ki ágia,I más fórti ki lion.
24 Ó fidjus-fémia di Israel, nhos txora pa Saul,Pamodi el bisti nhos ku ropa finu i di kor brumedju,El poi jóias di oru na nhos ropa.
25 Ó Israel, odja modi ki kes ómi balenti móre na géra!
Jonatan sta mortu riba di bus monti!
26 Ó Jonatan nha irmon, N sta tristi dimás pamodi bo,N gostaba txeu di bo.
Pa mi, bu amizadi tinha más valor di ki amor di mudjer.
27 Kes ómi balenti kaiI kes arma di géra ka ta sirbi más!”
