Sugundu livru di Samuel 10:1-19
-
Davidi ganha kes géra kóntra kes amonita i kes síriu (1-19)
10 Algun ténpu dipôs, rei di kes amonita móre, i se fidju Anun bira rei na se lugar.
2 Nton, Davidi fla: “N ta mostra amor lial pa Anun, fidju di Naás, sima se pai mostra amor lial pa mi.” Pur isu, Davidi manda se sérvus pa ba konsola-l pamodi se pai móre. Má kantu sérvus di Davidi txiga na téra di amonitas,
3 kes prínsipi di kes amonita fla Anun, ses sinhor: “Bu ta atxa ma Davidi manda se sérvus pa konsola-u pamodi el krê onra bu pai? Bu ka ta atxa ma el manda-s pa es ben splora sidadi, pa djobe modi ki el sta i pa kaba ku el?”
4 Nton, Anun pega kes sérvu di Davidi i el tra-s metadi di ses barba, el korta-s ses ropa na metadi, na altura di pólpa i dipôs el manda-s bai ses kaminhu.
5 Kantu es fla Davidi kuzê ki kontise, kel óra el manda alguns ómi pa ba inkontra ku se sérvus, pamodi es podu ta pasa txeu vergónha. I rei manda fla-s: “Nhos fika na Jerikó i nhos volta óras ki nhos barba kria.”
6 Ku ténpu, kes amonita da kónta ma Davidi staba ku ódiu di es. Nton, kes amonita manda mensajerus pa kontrata 20 mil trópa* síriu, di Bete-Reobe i di Zobá. Tanbê es kontrata rei di Maká, ku mil ómi i 12 mil ómi di Istobe.*
7 Kantu Davidi fika ta sabe di kel-li, el manda Joabe i tudu se trópa, i tanbê kes trópa más fórti.
8 Nton, kes amonita bai i es fika na puzison di géra, na entrada di porton di sidadi. I kes síriu di Zobá i di Riobe, djuntu ku kes trópa di Istobe* i di Maká, fika apárti na kanpu abértu.
9 Kantu Joabe odja ma kes trópa staba ta binha kóntra el pa frenti i pa tras, el skodje alguns di kes midjór trópa di Israel i el pô-s na puzison di géra pa es luta ku kes síriu.
10 El dexa se irmon Abizai ta komanda kes otu trópa,* asi pa el pode poba es na puzison di géra pa es lutaba kóntra kes amonita.
11 Nton, Joabe fla-l: “Si kes síriu bira fórti dimás pa mi, bu ta ben djuda-m. Má si kes amonita bira fórti dimás pa bo, N ta ba djuda-u.
12 Nu ten ki ser fórti i luta ku koraji pa nos povu i pa kes sidadi di nos Deus, i Jeová ta faze kel ki el ta atxa ma é midjór.”
13 Nton, Joabe i se trópas avansa pa ba luta kóntra kes síriu, i es fuji di se dianti.
14 Kantu kes amonita odja ma kes síriu dja fujiba, es fuji tanbê di Abizai i es entra na sidadi. Dipôs di kel géra kóntra kes amonita, Joabe volta pa Jiruzalen.
15 Kantu kes síriu odja ma Israel ganha-s, es djunta otu bês.
16 Nton, Adadezer manda buska kes síriu ki staba na zóna di riu Eufratis,* i es ben pa Elon. Ken ki staba ta komanda-s éra Sobaki, xéfi di trópa di Adadezer.
17 Kantu Davidi fika ta sabe di kel-li, kel óra el djunta tudu trópa di Israel, el trabesa Jurdon i el txiga na Elon. Nton kes síriu fika na puzison di géra pa infrenta Davidi i pa luta kóntra el.
18 Má kes síriu fuji di Israel. Davidi mata 700 kondutor di karu di géra i 40 mil síriu ki staba montadu na kabalu. Tanbê el mata Sobaki, xéfi di ses trópa la mê.
19 Kantu tudu kes rei, ki éra sérvu di Adadezer, odja ma Israel ganha-s, kel óra es faze pas ku Israel i es bira sérvus di Israel. I kes síriu fika ku medu di djuda kes amonita otu bês.
Nótas di rodapé
^ Ô: “trópa apé”.
^ Ô: “ómi di Tobe”.
^ Ô: “kes ómi di Tobe”.
^ Na ebraiku ta fla: “réstu di povu na mô di”.
^ Na ebraiku ta fla: “di Riu”.
