Sugundu livru di Samuel 15:1-37
15 Dipôs di tudu kes kuza li, Absalon ranja un karu, alguns kabalu i 50 guarda.*
2 Absalon ta labantaba sédu i el ta fikaba na ladu di strada ki ta bai pa porton di sidadi. Sénpri ki un algen ta lebaba rei un asuntu pa pidi justisa, Absalon ta txomaba el i el ta perguntaba el: “Abo é di ki sidadi?” Kel algen ta respondeba: “Bu sérvu é di un di kes tribu di Israel.”
3 Absalon ta flaba el: “Bu ten razon i bu pididu é justu. Má rei ka ranja ningen pa obi kuzê ki bu ten pa fla.”
4 Absalon ta flaba: “Si mi éra juís di país, tudu algen ki tinha un kexa ô un asuntu pa faze justisa, N ta ranjaba manera pa el fazedu justisa.”
5 Óras ki un algen ta txigaba pértu di el pa inbaxaba se dianti, Absalon ta pegaba el na mô, ta labantaba el i ta daba el beju.
6 Absalon ta fazeba kel-li ku tudu kes israelita ki ta ba pidiba rei pa faze-s justisa. Di kel manera li, Absalon ta furtaba korason di kes ómi di Israel.
7 Na fin di kuatu anu,* Absalon fla rei: “Favor, dexa-m bai pa Ebron pa N ba paga nha votu ki N faze pa Jeová.
8 Kantu N staba ta vive na Jezur, na Síria, N faze kel votu li: ‘Si Jeová torna leba-m pa Jiruzalen, N ta faze un oférta* pa Jeová.’”
9 Nton, rei fla-l: “Bai na pas.” El sai i el bai pa Ebron.
10 Dipôs, Absalon manda alguns mensajeru pa bai sukundidu pa tudu kes tribu di Israel, i pa fla-s: “Lógu ki nhos obi son di buzina, nhos da kel avizu li: ‘Absalon dja bira rei na Ebron!’”
11 I 200 ómi di Jiruzalen bai pa la djuntu ku Absalon. Es konvidadu i es bai sen diskunfia di nada, pamodi es ka sabia kuzê ki staba ta kontise.
12 Tanbê, kantu Absalon oferese sakrifisiu, el manda txoma Aitofel, kel jilonita, ki ta daba Davidi konsedju, i ki staba na se sidadi, na Jilu. Kel planu ba ta ganha forsa i nunbru di kes algen ki ta apoiaba Absalon ba ta bira kada bês más txeu.
13 Un dia, algen fla Davidi: “Kes ómi di Israel dja pasa pa ladu di Absalon.”
14 Kel óra, Davidi fla tudu se sérvus ki staba ku el na Jiruzalen: “Nu fuji, pamodi ninhun di nos ka ta skapa di Absalon! Nhos dispatxa, sinon el ta pega-nu i el ta traze disgrasa riba nos i el ta mata kes algen di sidadi ku spada!”
15 Kes sérvu di rei responde-l: “Sérvus di nho sta prontu pa faze tudu kel ki rei disidi faze.”
16 Nton, rei sai i tudu kes algen di se família bai se tras, má el dexa 10 konkubina* pa toma kónta di kaza.
17 Rei sai i tudu povu bai se tras, i es para na Bete-Meraki.
18 Davidi staba ta rabista tudu kes algen ki bai djuntu ku el*, tudu kes keretita, kes peletita i kes 600 jeteu ki staba ta sigi Itai désdi ki el sai di Gate.
19 Nton rei fla Itai, kel jeteu: “Pamodi ki bu sta ben ku nos tanbê? Volta i fika ku kel novu rei, pamodi bo é un stranjeru i bu tevi ki fuji di bu téra.
20 Dja ten poku ténpu ki bu txiga li, N ka sta ben obriga-u anda djuntu ku nos di un ladu pa kel otu, dja ki N ka sabe pa undi ki N sta bai. Volta i leba bus irmon djuntu ku bo, i pa Jeová mostra-u amor lial i pa nunka el ka bandona-u!”
21 Má Itai fla rei: “N ta jura pa Jeová, kel Deus bibu, i N ta jura pa vida di sinhor rei, ma ka ta inporta undi ki nho sta, sérvu di nho ta sta la tanbê, ô pa móre ô pa vive!”
22 Pur isu, Davidi fla Itai: “Nton bu pode pasa.” Itai, kel jeteu, trabesa vali djuntu ku tudu kes ómi i kes mininu ki staba djuntu ku el.
23 Timenti povu staba ta trabesa vali di Sedron, na direson di strada ki ta bai pa dizértu, kes algen ki ta moraba na kes zóna di Jiruzalen fika ta txora altu. Rei fika na entrada di vali.
24 Zadoki tanbê staba la djuntu ku tudu kes levita ki staba ta karega arka di kontratu di kel Deus verdaderu i es poi kel Arka di Deus verdaderu na txon. Abiatar txiga la timenti tudu algen staba ta sai di sidadi i ta tirmina di trabesa vali.
25 Má rei fla Zadoki: “Leba Arka di Deus verdaderu pa sidadi. Si Jeová sta kontenti ku mi, el ta torna traze-m i el ta dexa-m odja Arka i kel lugar undi ki el sta.
26 Má si el fla: ‘N ka sta kontenti ku bo,’ nton pa el faze ku mi kel ki el ta atxa ma é dretu.”
27 Rei fla saserdóti Zadoki: “Abo é ka videnti?* Nhos volta pa sidadi na pas, i nhos leba nhos dôs fidju djuntu ku nhos: Aimás, bu fidju, i Jonatan, fidju di Abiatar.
28 N ta fika ta spera na dizértu, pértu di kes kaminhu di Jurdon, ti ki nhos manda-m notísia.”
29 Nton, Zadoki i Abiatar torna leba Arka di Deus verdaderu pa Jiruzalen, i es fika la.
30 Davidi staba ta txora timenti el staba ta subi monti di Olivera. El staba sen sapatu i ku kabésa kubértu. Tudu kes algen ki staba djuntu ku el tanbê kubri kabésa i es subi monti ta txora.
31 Nton es fla Davidi: “Aitofel é un di kes ki sta djuntu ku Absalon ta faze planu kóntra bo.” Davidi fla: “Ó Jeová, favor, bira konsedju di Aitofel sima konsedju di un ómi tolu!”
32 Kantu Davidi txiga la riba di monti, undi ki povu ta kustuma adoraba* Deus, Uzai, kel arkita, staba ta spera-l ku se ropa kunpridu ratxadu i ku téra na kabésa.
33 Má, Davidi fla-l: “Si bu bai ku mi, bu ta ser un karga pa mi.
34 Má, si bu volta pa sidadi i bu fla Absalon: ‘Ó rei, ami é bu sérvu. Na pasadu ami éra sérvu di bu pai, má gósi ami é bu sérvu.’ Asi bu ta pode djuda-m i straga planu di Aitofel.
35 Saserdóti Zadoki i Abiatar ta sta la ku bo. Konta Zadoki i Abiatar tudu kuza ki bu obi na kaza di rei.
36 Djuntu ku es sta ses dôs fidju: Aimás, fidju di Zadoki, i Jonatan, fidju di Abiatar. Fla-s pa es ben konta-m tudu kuza ki es obi.”
37 Nton Uzai, amigu di Davidi,* txiga Jiruzalen kantu Absalon staba ta entra na sidadi.
Nótas di rodapé
^ Na ebraiku ta fla: “50 ómi pa kóre se dianti”.
^ Ô talvês: “40 anu”.
^ Ô: “N ta ben adora”. Na ebraiku ta fla: “N ta faze sirvisu”.
^ Djobe Disionáriu di Bíblia.
^ Ô: “tudu kes ki bai djuntu ku Davidi pasa se dianti”.
^ Djobe Disionáriu di Bíblia.
^ Ô: “inbaxaba dianti di”.
^ Ô: “kel algen ki ta daba Davidi konsedju”.
