Sugundu livru di Samuel 2:1-32
2 Dipôs di kel-li, Davidi pergunta Jeová: “N debe bai pa un di kes sidadi di Judá?” Jeová responde-l: “Bu pode bai.” Davidi pergunta-l: “Pa undi ki N debe bai?” El fla-l: “Bai pa Ebron.”
2 Nton, Davidi bai pa la djuntu ku se dôs mudjer, Ainoan di Jesriel, i Abigail, kel viúva di Nabal di Karmelu.
3 Tanbê, Davidi leba kes ómi ki staba djuntu ku el, i kada un di es leba ses família, i es fika ta mora na kes sidadi pértu di Ebron.
4 Dipôs, kes ómi di Judá bai i la es skodje Davidi pa ser rei di tribu di Judá.
I es fla Davidi: “É kes ómi di Jabes-Jiliade ki intera Saul.”
5 Nton, Davidi manda mensajerus na kes ómi di Jabes-Jiliade, pa fla-s: “Pa Jeová abênsua nhos, pamodi nhos mostra amor lial pa Saul, nhos sinhor, kantu nhos intera-l.
6 Pa Jeová mostra nhos amor lial i pa el ka bandona nhos. Ami tanbê N ta ben mostra nhos bondadi pa kel ki nhos faze.
7 Má gósi, nhos ser fórti i nhos ten koraji, pamodi Saul, nhos sinhor, sta mortu i tribu di Judá dja skodje-m pa N ser ses rei.”
8 Má Abner, fidju di Ner, xéfi di trópa di Saul, dja lebaba Isbozete, fidju di Saul, pa Manain, ki ta fika na kel otu ladu di riu.
9 El pô-l ta ser rei di Jiliade, di kes asurita, di Jesriel, di Efrain, di Benjamin i di Israel interu.
10 Isbozete, fidju di Saul, tinha 40 anu kantu el bira rei di Israel i el governa duránti dôs anu. Má, tribu di Judá ta apoiaba Davidi.
11 Davidi governa tribu di Judá, na Ebron, duránti 7 anu i 6 mês.
12 Un ténpu dipôs, Abner, fidju di Ner, i kes sérvu di Isbozete, fidju di Saul, sai di Manain i es bai pa Jibion.
13 Joabe, fidju di Zeruia, i kes sérvu di Davidi tanbê sai i es inkontra ku es na kel tanki grandi, na Jibion. Un grupu xinta na un ladu di kel tanki, i kel otu grupu xinta na kel otu ladu.
14 Nton, Abner fla Joabe: “Nu dexa kes ómi labanta i luta* nos dianti.” Joabe responde: “Bon ideia.”
15 Nton, es labanta i es fika frenti di kunpanheru prontu pa luta. Es skodje 12 benjaminita di grupu di Isbozete, fidju di Saul, i 12 trópa di Davidi.
16 Es pega kunpanheru na kabésa i kada un di es mete kunpanheru spada na ladu, i tudu es kai i es móre omésmu ténpu. Pur isu, es txoma kel lugar di Elkate-Azurin, ki ta fika na Jibion.
17 Na kel dia, kel géra ki kontise dipôs foi txeu violéntu. Na fin, kes trópa di Davidi ganha Abner i kes trópa di Israel.
18 Kes três fidju di Zeruia tanbê staba la: Joabe, Abizai i Azael. Azael ta konsigi koreba faxi sima un gazéla na kanpu.
19 Azael kumesa ta pirsigi Abner. El bai ta kóre tras di Abner, sen disvia nen pa direita nen pa skerda.
20 Kantu Abner djobe pa tras, el pergunta: “Azael, é bo?” Azael responde: “Sin, é mi.”
21 Nton, Abner fla-l: “Bai pa direita ô pa skerda, pega un di kes ómi li i toma tudu kuza ki el ten.” Má Azael ka krê paraba di pirsigi-l.
22 Abner torna fla Azael: “Para di pirsigi-m. Sinon N ten ki mata-u. Dipôs di kel-li, modi ki N ta djobe Joabe, bu irmon, na kara?”
23 Má Azael ka para. Nton, Abner mete-l párti tras di se lansa na bariga i kel lansa sai-l pa kósta. El kai i el móre la mê. Tudu algen ki staba ta pasa na kel lugar ki Azael móre, ta paraba la.
24 Dipôs, Joabe i Abizai bai tras di Abner. Kantu sól staba ta kanba, es txiga na monti di Amá, ki ta fika na frenti di Jia, na kaminhu pa dizértu di Jibion.
25 Kes benjaminita djunta ku Abner, i es forma un grupu di trópa i es ba fika riba di un otu monti.
26 Nton, Abner grita pa Joabe: “Pa más kantu ténpu nu ta kontinua ta mata kunpanheru? Inda bu ka odja ma kel-li sta traze-nu sô disgostu? Nton, kuzê ki bu sta spera pa bu manda bus trópa pa para di pirsigi ses irmon?”
27 Nton, Joabe fla: “N ta jura pa kel Deus verdaderu ki sta bibu, ma si bu ka papiaba, kes trópa ta paraba di pirsigi ses irmon sô manhan di palmanhan.”
28 Dipôs, Joabe toka buzina, se trópas para di pirsigi Israel i géra kaba.
29 Duránti kel noti interu, Abner i se trópas anda pa Arabá i es trabesa Jurdon. Es anda na meiu di un vali* i dipôs es txiga na Manain.
30 Dipôs ki Joabe para di pirsigi Abner, el djunta tudu algen. Alén di Azael, staba ta falta 19 sérvu di Davidi.
31 Má, kes sérvu di Davidi ganha kes benjaminita i kes trópa di Abner. Es mata 360 ómi.
32 Dipôs, es panha Azael, es leba-l i es intera-l na sipultura di se pai, na Belen. Dipôs, Joabe i se trópas anda noti interu, i es txiga na Ebron sédu palmanhan.
