Sugundu livru di Samuel 4:1-12
4 Kantu Isbozete, fidju di Saul, fika ta sabe ma Abner móre na Ebron, el perde koraji* i tudu israelita fika txeu preokupadu.
2 Na trópas di Isbozete, tinha grupus di bandidu i es tinha dôs xéfi: un txomaba Baaná i kel otu txomaba Rekabe. Es éra fidju di Rimon, kel bierotita, di tribu di Benjamin. (Sidadi di Bierote tanbê ta fazeba párti di tiritóriu di Benjamin.
3 Kes algen di Bierote fuji pa Jitain i es fika ta mora la sima stranjeru ti dia di oji.)
4 Jonatan, fidju di Saul, tinha un fidju ki éra manku i ki txomaba Mefibozete. El tinha sinku anu kantu txiga notísia di Jesriel, ma Saul i Jonatan móre. Nton, kel mudjer ki ta kuidaba di Mefibozete panha-l i el fuji ku el. Má timenti el staba ta fuji dizusperadu, Mefibozete kai i el fika manku.
5 Un dia, Rekabe i Baaná, kes fidju di Rimon, kel bierotita, bai pa kaza di Isbozete na kel óra más kenti di dia, meiu-dia, timenti el staba ta diskansa.
6 Rekabe i se irmon Baaná entra na kaza, ta finji ma es ba panha trigu, i es da Isbozete ku faka na bariga, dipôs es fuji.
7 Kantu es entra na kaza, Isbozete staba na se kuartu, detadu na kama. Es mata-l ku faka i es korta-l kabésa. Dipôs, es panha se kabésa i es anda duránti un noti interu pa strada di Arabá.
8 Es leba rei Davidi kabésa di Isbozete, na Ebron, i es fla-l: “Kel-li é kabésa di Isbozete, fidju di Saul, inimigu di nho ki krê mataba nho. Oji Jeová dja faze vingansa pa sinhor rei, kóntra Saul i se disendentis.”
9 Má, Davidi fla Rekabe i se irmon Baaná, fidjus di Rimon, kel bierotita: “N ta jura pa Jeová, kel Deus bibu, ki libra-m di tudu sufrimentu,
10 ma kantu un ómi ben i el fla-m: ‘Saul sta mortu,’ ta pensa ma el traze-m un bon notísia, N pega-l i N mata-l na Ziklagi. Kel-li é pagamentu ki N da kel mensajeru!
11 N ten mutu más razon pa faze kel-li ku kes ómi mau ki mata un ómi justu na se própi kaza i na se kama! N ka debe pidi nhos kónta pa se sangi i tra nhos di téra?”
12 Nton, Davidi manda se trópas pa mata kes dôs ómi. Es korta-s ses mô ku ses pé i es prinda ses korpu djuntu di kel posu di agu, na Ebron. Má es panha kabésa di Isbozete i es intera-l na sipultura di Abner, na Ebron.
Nótas di rodapé
^ Na ebraiku ta fla: “se mô fika fraku”.
