Sugundu livru di Samuel 5:1-25
5 Un ténpu dipôs, tudu tribu di Israel ba atxa Davidi na Ebron i es fla-l: “Nos é di mésmu sangi.*
2 Na pasadu, kantu Saul éra nos rei, éra nho ki ta giaba Israel na ses géra.* I Jeová fla-u: ‘Bu ta ben pastora nha povu Israel i bu ta ben ser líder di Israel.’”
3 Nton, tudu kes ansion di Israel ba atxa rei Davidi na Ebron i rei faze un kontratu ku es na Ebron, dianti di Jeová. Dipôs, es skodje Davidi pa ser rei di Israel.
4 Davidi tinha 30 anu kantu el bira rei i el governa duránti 40 anu.
5 Na Ebron, el governa Judá duránti 7 anu i 6 mês, i na Jiruzalen el governa Israel i Judá duránti 33 anu.
6 I rei ku se trópas bai pa Jiruzalen pa luta kóntra kes jebuzeu ki ta moraba na kes téra. Kes jebuzeu faze trósa di Davidi i es fla: “Nunka bu ka ta entra li! Ti kes ségu i kes manku ta tra-u di li.” Es ta pensaba: ‘Davidi nunka ka ta entra li.’
7 Má, Davidi toma sidadi di Sion, ki oji ta txomadu sidadi di Davidi.
8 Davidi fla na kel dia: “Kes algen ki sta ba ataka kes jebuzeu debe bai pa túnel di agu pa ‘mata kes ségu i kes manku,’ ki Davidi ta ôdia!” É pur isu ki ta fladu: “Kes ségu i kes manku nunka ka ta entra na es kaza.”
9 Dipôs, Davidi ba mora na kel sidadi, i es bira ta txoma-l* di Sidadi di Davidi. Davidi kumesa ta faze konstruson na un monti ki ta txomadu Milu* i na otus lugar déntu di sidadi.
10 Nton, Davidi ba ta bira kada bês más fórti, i Jeová, Deus di izérsitu, staba ku el.
11 Iron, rei di Tiru, manda mensajerus pa Davidi. Tanbê el manda madera di sédru, karpinterus i pedrerus pa faze paredi, i es kumesa ta faze un kaza pa Davidi.
12 Davidi intende ma Jeová poi se reinu ta fika firmi na Israel i ma Deus engrandese se reinu pa djuda se povu Israel.
13 Dipôs ki Davidi muda di Ebron pa Jiruzalen el ranja más konkubina* i más mudjer, i el tevi más fidju matxu i más fidju-fémia.
14 Kes-li é nómi di se fidjus ki nase na Jiruzalen: Samua, Sobabe, Natan, Salumon,
15 Ibar, Elizua, Nefege, Jafia,
16 Elizama, Eliada i Elifelete.
17 Kantu kes filisteu fika ta sabe ma Davidi skodjedu pa ser rei di Israel, tudu es kumesa ta djobe-l. Kantu Davidi fika ta sabe di kel-li, el ba sukundi na un lugar suguru.
18 Nton, kes filisteu ben i es spadja na vali di Refain.
19 Davidi djobe orientason na Jeová i el pergunta-l: “N debe ba ataka kes filisteu? Bu ta intrega-s na nha mô?” Jeová responde Davidi: “Bu pode bai. Bu pode ten serteza ma N ta intrega kes filisteu na bu mô.”
20 Nton, Davidi bai pa Baal-Perazin i el mata kes filisteu. Pur isu, Davidi fla: “Jeová bai nha dianti sima agu ta ronba paredi, i el kaba ku nhas inimigu.” É pur isu ki el poi kel lugar nómi di Baal-Perazin.
21 Kes filisteu dexa ses imajen la, i Davidi ku se trópas panha-s i es leba-s.
22 Dipôs, kes filisteu torna ben i es spadja na vali di Refain.
23 Nton, Davidi pidi orientason na Jeová, má Jeová fla-l: “Ka bu ataka-s pa frenti. Da vólta pa tras, i ataka-s na frenti di kes arvi.*
24 I óras ki nhos obi barudju di trópas ta marxa na meiu di kes arvi, nhos ataka sen medu, pamodi Jeová dja bai nhos dianti pa kaba ku kes trópa di filisteu.”
25 Nton, Davidi faze sima Jeová fla-l, i el mata kes filisteu désdi Jeba ti Jezer.
Nótas di rodapé
^ Na ebraiku ta fla: “bu osu i bu karni”.
^ Na ebraiku ta fla: “éra nho ki ta saíba ku Israel i éra nho ki ta entraba ku Israel”.
^ Ô talvês: “el bira ta txoma-l”.
^ Un palavra na ebraiku ki siginifika “intxi”. Talvês kel monti li fazedu pa djuda proteje sidadi.
^ Djobe Disionáriu di Bíblia.
^ Na ebraiku ta fla: “arvis di baka”. Kel nómi baka é transliterason di un palavra na ebraiku. Má ka sabedu sértu é ki tipu di arvi.
